ເຈົ້າແຂວງຫຼວງພະບາງກວດກາຄວາມພ້ອມສະຖານີຂົນສົ່ງໂດຍສານທາງລົດໄຟລາວ-ຈີນ

187

ວັນທີ 28 ພະຈິກ 2021 ນີ້ ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ ພ້ອມດ້ວຍ ຄະນະ ແລະພາກແນການກ່ຽວຂ້ອງ ໄດ້ເຄື່ອນໄຫວຢ້ຽມຢາມ ແລະກວດກາຄວາມພ້ອມ ຢູ່ສະຖານີ ລົດໄຟລາວ-ຈີນ ເຊິ່ງຕັ້ງຢູ່ເຂດບ້ານຊຽງລ້ອມ ນະຄອນ ຫຼວງພະບາງ ໂດຍມີ ທ່ານ ຫຼີ່ ຈື່ ກົງ ຫົວໜ້າກົງສູນໃຫຍ່ ພ້ອມດ້ວຍ ຄະນະ ແລະຄະນະຮັບຜິດຊອບທາງລົດໄຟລາວ-ຈີນ ໃຫ້ການຕ້ອນຮັບ.


ການເຄື່ອນໄຫວກວດກາຄັ້ງນີ້ ເພື່ອກຽມຄວາມພ້ອມ ຂອງສະຖານທີ່ສະຖານີ ເພື່ອກຽມເປີດເສັ້ນທາງລາວໄຟລາວ-ຈີນ ທີ່ຈະໄດ້ຈັດຂື້ນ ໃນເດືອນ ທັນວາ 2021 ທີ່ຈະມາເຖິງນີ້,ໂດຍຄະນະການນໍາແຂວງຫຼວງພະບາງ ນໍາໂດຍທ່ານ ເຈົ້າແຂວງຫຼວງພະບາງ ກໍໄດ້ເດີນສໍາຫຼວດກວດກາ ຕາມສະຖານທີ່ຕ່າງໆ ຢູ່ສະຖານີດັ່ງກ່າວ ເປັນຕົ້ນແມ່ນຫ້ອງໂຖງຮັບຜູ້ໂດຍສານ ຫຼື ຫ້ອງລໍຖ້າຂອງຜູ້ໂດຍສານ,ຫ້ອງນໍ້າ,ຈຸດບໍລິການອາຫານ-ເຄື່ອງດຶ່ມ,ຫ້ອງຮັບແຂກ,ສະຖານທີ່ກໍ່ສ້າງອ້ອມຮອບສະຖານີ ແລະຍັງໄດ້ຂື້ນຊົມຫ້ອງໂດຍສານເທິງລົດໄຟຕື່ມອີກ.


ສໍາລັບຄວາມພ້ອມສະຖານີ ແລະເສັ້ນທາງ ຄະນະຮັບຜິດຊອບກຸ່ມບໍລິສັດກໍ່ສ້າງທາງລົດໄຟ ລາວ-ຈີນ ກໍໄດ້ລາຍງານໃຫ້ຮູ້ວ່າ: ສະຖານທີ່ອ້ອມຮອບ ແລະສະຖານີຂົນສົ່ງໂດຍສານຂອງທາງລົດໄຟລາວ-ຈີນ ທີ່ບ້ານຊຽງລ້ອມ ນະຄອນ ຫຼວງພະບາງ ໄດ້ສໍາເລັດເປັນຈໍານວນຫຼາຍແລ້ວ ລ້າສຸດແມ່ນການກໍ່ສ້າງໂຕສະຖານີຫຼວງພະບາງແມ່ນສໍາສໍາເລັດແລ້ວ,ເຊິ່ງການຕົບແຕ່ງສະຖານີຫຼວງພະບາງ ແມ່ນມີລັກສະນະໂດດເດັ່ນທາງດ້ານວັດທະນະທໍາ ທີ່ປະສົມປະສານກັບແບບຕົ້ນ ໂພວັດຊຽງທອງ ແລະ ລວດລາຍດອກບົວຈາກຫໍພິພິທະພັນພະ(ລາດຊະວັງ) ແລະ ຈາກບ່ອນອື່ນໆ ,ທັງຍັງເປັນເຄື່ອງໝາຍໃນການສໍາເລັດອາຄານສະຖານີ 10 ແຫ່ງຂອງເສັ້ນທາງລົດໄຟລາວ-ຈີນ ຊ່ວງບໍ່ເຕັນ-ນະຄອນຫຼວງວຽງຈັນ ແລະໄດ້ເປັນພື້ນຖານອັນໜັກແໜ້ນໃຫ້ແກ່ການເປີດນຳໃຊ້ທາງລົດໄຟ ລາວ-ຈີນ ທີ່ມີຄຸນນະພາບສູງ.ສະເພາະຫຼັງຄາຂອງອາຄານສະຖານີມີໂຄງສ້າງແບບ “ສາມລວງຕັ້ງໜຶ່ງລວງຂວາງ” ເຊິ່ງມີຄວາມໂຄ້ງຫຼາຍ ແລະປະສົມປະສານກັບຫຼັງຄາແບບຊົງຈົ່ວ ,ເຊິ່ງໂຄງສ້າງເຫຼັກນັ້ນມີຫຼາຍເຖິງ 5ຊັ້ນ ແລະໃຊ້ວັດສະດຸຫຼາຍກວ່າ 500 ຊະນິດ, ມີຫຼາຍຂັ້ນຕອນການປະກອບແລະຕິດຕັ້ງ ຖືໄດ້ວ່າມີຄວາມຫຍຸ້ງຍາກໃນການກໍ່ສ້າງເປັນອັນດັບຕົ້ນໆ ແລະຕໍ່ກັບບັນຫາດັ່ງກ່າວທາງໂຄງການຈຶ່ງໄດ້ສ້າງແຜນງານພິເສດຂຶ້ນ ໄດ້ນໍາໃຊ້ເຕັກໂນໂລຊີ BIMຈໍາລອງແບບກໍ່ສ້າງ ເພື່ອປັບຈຸດເຊື່ອມຕໍ່ລະຫວ່າງໂຄງເຫຼັກກັບໂຄງເບຕົງ ສາມາດຊ່ວຍໃນການກໍ່ສ້າງໃຫ້ມີປະສິດທິພາບສູງ ,ເຊິ່ງໃຊ້ເວລາ 161 ວັນຈິ່ງສໍາລັດການກໍ່ສ້າງຂອງພາກສ່ວນຫຼັງຄາ.


ປັດຈຸບັນນີ້ທາງລົດໄຟລາວ-ຈີນໄດ້ສໍາເລັດການກໍ່ສ້າງ ແລະຢູ່ໃນຊ່ວງການກວດກາຄວາມພ້ອມເພື່ອຮັບຮອງ,ເຊິ່ງຈະເປີດການນໍາໃຊ້ໃນເດືອນທັນວາຂອງປີນີ້.


ສະຖານີດັ່ງກ່າວຕັ້ງຢູ່ເມືອງມໍລະດົກໂລກ ເປັນເມືອງທີ່ມີຊື່ສຽງທາງດ້ານວັດທະນະທໍາ ແລະ ສະ ຖານທີ່ທ່ອງທ່ຽວທີ່ຂຶ້ນຊື່ຂອງປະເທດລາວ ເຊິ່ງເອີ້ນຂານວ່າເມືອງຫຼວງພະບາງ”ນະຄອນຫຼວງບູຮານພັນປີ”, ສະຖານີແຫ່ງນີ້ມີເນື້ອທີ່ກໍ່ສ້າງທັງໝົດ 7.970 ຕາແມັດ ແລະມີຂະໜາດໃຫຍ່ຮອງລົງມາຈາກສະຖານີນະ ຄອນຫຼວງວຽງຈັນ ແລະໄດ້ຕິດຕັ້ງເປັນ 2 ບ່ອນຂຶ້ນລົງລົດ ແລະ 4 ເສັ້ນທາງລົດໄຟ ເຊິ່ງຈະເປີດເປັນບ່ອນຂົນສົ່ງໂດຍສານ ແລະ ຂົນສົ່ງສິນຄ້າ.

ຂ່າວ: ເພັດສາຄອນ ສິມມະວົງ