ຫຼາຍບ້ານພາຍໃນເມືອງອາດສະພອນສ້ອມແປງເສັ້ນທາງຄືນໃໝ່

171

ເພື່ອເຮັດໃຫ້ການສັນຈອນໄປມາຫາສູ່ກັນລະຫວ່າງບ້ານຫາບ້ານ, ບ້ານຫາເມືອງ ແລະລູກຫຼານຂອງປະຊາຊົນທຽວໄປມາໂຮງຮຽນໃຫ້ມີຄວາມສະດວກສະບາຍຂຶ້ນກວ່າເກົ່າ ດັ່ງນັ້ນໃນວັນທີ 9 ພະຈິກ 2021 ນີ້ໄດ້ມີການສ້າງຂະບວນການສ້ອມແປງຖະໜົນຫົນທາງຂອງປະຊາຊົນ ບັນດາບ້ານຕ່າງໆພາຍໃນເມືອງອາດສະພອນ ຢູ່ໃນຄວາມຮັບຜິດຊອບການບຳລຸງ ແລະຮັກສາຖະໜົນຫົນທາງໃນເຂດບ້ານຂອງຕົນ

ກໍ່ໄດ້ສ້ອມແປງຄືນໃໝ່ພາຍຫຼັງໝົດຈາກລະດູຝົນອັນທີ່ເຮັດໃຫ້ຖະໜົນຫົນທາງເປ່ເພເກີດມີບວກ, ຂຸມຫຼາຍ ເຮັດໃຫ້ການສັນຈອນໄປມາລຳບາກ, ການສ້ອມແປງທາງໃນຄັ້ງນີ້ ມີ: ບ້ານໜອງເດີ່ນໄດ້ສ້ອມແປງທາງແຕ່ຫ້ວຍສັງຄຽງ ຫາສາຍຫ້ວຍບອນໃນໄລຍະທາງ 2 ກິໂລແມັດ ໃຊ້ງົບປະມານ 2ລ້ານ5ແສນກີບ, ບ້ານສອງຫ້ອງແມ່ນສ້ອມແປງທາງໄປຮອດສົ້ນບ້ານກຸດແຄນ ໃນໄລຍະທາງ 4 ກິໂລແມັດ

ໃຊ້ງົບປະມານ 3ລ້ານກີບ ແລະບ້ານກຸດແຄນແມ່ນໄດ້ສ້ອມແປງທາງແຕ່ເຂດຕໍ່ກັບບ້ານໜອງເດີ່ນໄປຮອດສົ້ນບ້ານທາງໄປບ້ານສອງ ແລ້ວຕໍ່ໄປຮອດ ທາງເຂົ້າບ້ານໄຊໂພນສິມລວມໄລຍະທາງ 4 ກິໂລແມັດໃຊ້ງົບປະມານ 3ລ້ານ7ແສນກີບ, ໂດຍນຳໃຊ້ລົດໄຖໃຫຍ່ມາໄຖຮ່ອງນ້ໍາໄຫຼບາງຈຸດທີ່ເຫັນໄດ້ນຳ້ອັ່ງຊ່ວງລະດູຝົນ, ດຸດ, ກວາດດິນຂຶ້ນຖົມຂຸມໜ້າທາງບ່ອນເປັນບວກ, ຂຸມເລິກ

ໂດຍໄດ້ການປະກອບສ່ວນຂອງບຸກຄົນພາຍໃນບ້ານຈຳນວນ 3 ຄັນ ແລະບັນດາຜູ້ປະກອບການ, ນັກທຸລະກິດພ້ອມທັງປະຊາຊົນແມ່ນໄດ້ຮ່ວມໃຈກັນປະກອບທຶນຮອນຊື້ນ້ຳມັນ, ການສ້າງຂະບວນການໃນຄັ້ງນີ້ແມ່ນພາຍໃຕ້ການຊີ້ນຳ-ນຳພາຂອງທ່ານ ນາງ ອິນປອນ ພອນວິໄລ ກຳມະການພັກເມືອງ ປະທານສະຫະພັນແມ່ຍິງເມືອງຜູ້ຊີ້ນຳໜ່ວຍພັກບ້ານໜອງເດີ່ນ, ທ່ານ ນາງໂສດາ ຈັນວັນເພັງ ກຳມະການພັກເມືອງ ຫົວໜ້າໂຄສະນາອົບຮົມເມືອງ ຜູ້ຊີ້ນຳໜ່ວຍພັກບ້ານສອງຫ້ອງ ແລະບ້ານກຸດແຄນ, ທ່ານພອນໄຊ ມີວໍລະຈັກ ອງຫົວໜ້າ ຫ້ອງການ ຍທຂ ເມືອງ ແລະບັນດາທ່ານອຳນາດການປົກຄອງບ້ານທັງສາມບ້ານດັ່ງກ່າວ.