ພິທີເຊັນສັນຍາໂຄງການສ້ອມແປງ ແລະ ຟື້ນຟູເສັ້ນທາງດິນແດງ 2 ເສັ້ນຢູ່ເມືອງທ່າແຕງ

110

ພິທີເຊັນສັນຍາໄດ້ຈັດຂຶ້ນໃນວັນທີ 27 ຕຸລາ 2021 ທີ່ຫ້ອງປະຊຸມຊັ້ນສອງຫ້ອງວ່າການປົກຄອງເມືອງ ລະຫວ່າງ ຫ້ອງການໂຍທາທິການ ແລະ ຂົນສົ່ງເມືອງ ແລະ 2 ບໍລິສັດຮັບເໝົາກໍ່ສ້າງ ໂດຍການເປັນປະທານຂອງ ທ່ານ ແສງສຸບັນ ໄຊສະຫວັນ ຮອງເຈົ້າເມືອງທ່າແຕງ, ມີທ່ານ ເພັດສະໝອນ ຈັນທະວິໄຊ ຫົວໜ້າຫ້ອງການໂຍທາທິການ ແລະ ຂົນສົ່ງເມືອງ ແລະ ຜູ້ຕາງໜ້າບໍລິສັດຮັບເໝົາກໍ່ສ້າງພ້ອມພາກສ່ວນກ່ຽວຂ້ອງເຂົ້າຮ່ວມ.

ທ່ານ ສຸກັນ ຈະເລີນຜົນ ຮອງຫົວໜ້າຫ້ອງການແຜນການ ແລະ ການລົງທຶນເມືອງທ່າແຕງ ກ່າວວ່າ: ບໍລິສັດທີ່ຊະນະໃນການປະມູນ ແລະ ໄດ້ຮັບບຸລິມະສິດດຳເນີນກິດຈະການກໍ່ສ້າງມີສອງບໍລິສັດ ຄື: ບໍລິສັດສອນກໍ່ສ້າງ ແລະ ສ້ອມແປງຂົວ – ທາງ ຈໍາກັດ ເປັນຜູ້ຮັບເໝົາກໍ່ສ້າງສ້ອມແປງເສັ້ນທາງແຍກ 16 E ບ້ານຈະກໍາໃຫຍ່ ຫາ ບ້ານກົກໄຮ ຍາວ 9,25 ກິໂລແມັດ ກວ້າງ 6 ແມັດ ມູນຄ່າ 1 ຕື້ 299 ລ້ານກວ່າກີບ ແລະ ບໍລິສັດສຸກປະສົງກໍ່ສ້າງ ແລະ ສ້ອມແປງຂົວ – ທາງ ຈໍາກັດ.

ຮັບເໝົາກໍ່ສ້າງສ້ອມແປງເສັ້ນທາງແຕ່ແຍກ 16 E ບ້ານທ່າແຕງໄຕ້ ຫາ ບ້ານຕຸ້ມຍໍ ຍາວ 14,55 ກິໂລແມັດ ກວ້າງ 6 ແມັດ ມີມູນຄ່າ 1 ຕື້ 273 ລ້ານກວ່າກີບ ໂດຍສັນຍາກໍ່ສ້າງໃຫ້ສຳເລັດພາຍໃນ 5 ເດືອນ ນັບແຕ່ເດືອນພະຈິກ 2021 ເຖິງເດືອນເມສາ 2022, ປະກອບມີໜ້າວຽກຈົກດິນບວມອອກບາງຈຸດ, ຍົກລະດັບໜ້າທາງ ພ້ອມອັດແໜ້ນ, ຈົກຮ່ອງລະບາຍນໍ້າ ແລະ ກໍ່ສ້າງທໍ່ລອດທາງ 1 ແຫ່ງ ໂດຍນໍາໃຊ້ທຶນຂອງລັດຖະບານລາວຮ່ວງໄພພິບັດ 100%.

ຂ່າວ: ເຈີນ ແດນວົງວິຈິດ