ຢຶດຢາບ້າໄດ້ 6 ລ້ານເມັດ ຢູ່ເມືອງຕົ້ນເຜິ້ງ

141

ເຈົ້າໜ້າທີ່ກອງບັນຊາການ ປກສ ເມືອງຕົ້ນເຜິ້ງ ແຂວງບໍ່ແກ້ວ ໄດ້ຮັບແຫຼ່ງຂ່າວຈາກພົນລະເມືອງດີໃນວັນທີ 25 ຕຸລາ 2021 ເວລາປະມານ 2:14 ໂມງ ວ່າຈະມີການຂົນສົ່ງຢາເສບຕິດຈາກເມືອງຕົ້ນເຜິ້ງ ຫາ ເມືອງຫ້ວຍຊາຍ.

ກອງບັນຊາການ ປກສ ເມືອງຕົ້ນເຜິ້ງ ຈຶ່ງໄດ້ຈັດຕັ້ງກຳລັງວິຊາສະເພາະລົງສົມທົບກັບ ປກສ – ປກຊ ທີ່ປະຈໍາຢູ່ຈຸດກວດທາງເຂົ້າໂຄງການກໍ່ສ້າງສະໜາມບິນ ເຂດບ້ານໃຫຍ່ສີເມືອງງາມ ຕິດຕາມພົບເຫັນລົດເປົ້າໝາຍ 2 ຄັນ ບໍ່ມີປ້າຍທະບຽນ ຄື: ລົດຍີ່ຫໍ້ປາຣາໂດ 1 ຄັນ ແລະ ລົດຣີໂວສີຂາວ 1 ຄັນ ແລ່ນອອກຈາກເສັ້ນທາງເວັ້ນສະໜາມບິນເຂດຫາງບ້ານໃຫຍ່ສີເມືອງງາມ.

ທາງເຈົ້າໜ້າທີ່ຈຶ່ງໄດ້ສະແດງຕົວເພື່ອກວດກາລົດເປົ້າໝາຍດັ່ງກ່າວ ແຕ່ຄັນທີ່ໜຶ່ງແລ່ນໜີດ້ວຍຄວາມໄວໄປທາງເສັ້ນທາງຈາກບ້ານໃຫຍ່ສີເມືອງງາມໄປຫາບ້ານດອນທາດ ຄັນທີສອງຈອດຫ່າງຈາກເຈົ້າໜ້າທີ່ 50 – 60 ແມັດ ແລ້ວຜູ້ຂັບໄດ້ແລ່ນລົບໜີເຂົ້າໄປໃນປ່າທາງເຈົ້າໜ້າທີ່ໄດ້ແລ່ນນໍາແຕ່ບໍ່ທັນ.

ຫຼັງຈາກນັ້ນ, ທາງເຈົ້າໜ້າທີ່ ປກສ – ປກຊ ເມືອງ ຈຶ່ງໄດ້ສົມທົບກັບພາກສ່ວນທີ່ກ່ຽວຂ້ອງກວດກາລົດຣີໂວຄັນດັ່ງກ່າວ ພົບຢາເສບຕິດປະເພດຢາບ້າ ຈຳນວນ 30 ເປົາ ເທົ່າກັບ 3.000 ມັດ ຫຼື 6.000.000 ເມັດ, ຕໍ່ຜູ້ກະທຳຜິດດັ່ງກ່າວ ທາງເຈົ້າໜ້າທີ່ກອງບັນຊາການ ປກສ ເມືອງຕົ້ນເຜິ້ງ ໄດ້ມອບໃຫ້ພະແນກສະກັດກັ້ນ ແລະ ຕ້ານຢາເສບຕິດ ຫ້ອງຕໍາຫຼວດກອງບັນຊາການ ປກສ ແຂວງບໍ່ແກ້ວ ສືບຕໍ່ດຳເນີນການຕິດຕາມເພື່ອຊອກຫາຜູ້ກະທໍາຜິດມາດຳເນີນຄະດີຕາມລະບຽບກົດໝາຍ.

ຮູບ – ຂ່າວ: ກອງບັນຊານການ ປກສ ເມືອງຕົ້ນເຜິ້ງ