ຫ້ອງການກະສິກຳ ແລະ ປ່າໄມ້ເມືອງປາກລາຍ ຈັດກອງປະຊຸມສົ່ງເສີມການລ້ຽງສັດ, ເກັບຊື້ – ສົ່ງອອກ ແລະ ການຂ້າສັດສະໜອງຊີ້ນພາຍໃນເມືອງ

133

ໃນວັນທີ 21 ຕຸລາ 2021 ຫ້ອງການກະສິກຳ ແລະ ປ່າໄມ້ເມືອງປາກລາຍ ແຂວງໄຊຍະບູລີ ໄດ້ເປີດກອງປະຊຸມວຽກງານສົ່ງເສີມການລ້ຽງສັດ, ເກັບຊື້ – ສົ່ງອອກ ແລະ ການຂ້າສັດສະໜອງຊີ້ນພາຍໃນເມືອງ ໂດຍການເປັນປະທານຂອງ ທ່ານ ກອງສີ ວົງສີ ເຈົ້າເມືອງປາກລາຍ, ມີຫົວໜ້າຫ້ອງການ, ຜູ້ປະກອບການ, ວິຊາການສະມາຄົມກຸ່ມລ້ຽງສັດພາຍໃນເມືອງເຂົ້າຮ່ວມ.

ທ່ານ ສຸລິຈັນ ສີປະມວນ ຫົວໜ້າຫ້ອງການກະສິກໍາ ແລະ ປ່າໄມ້ເມືອງປາກລາຍ ໄດ້ຂຶ້ນສະເໜີບົດລາຍງານປີ 2021 ວ່າ: ການລ້ຽງສັດເພື່ອສະໜອງຊີ້ນພາຍໃນເມືອງສະມາຄົມລ້ຽງສັດຂອງພວກເຮົາແມ່ນມີທ່າແຮງຫຼາຍດ້ານໃນການປູກຝັງ – ລ້ຽງສັດເປັນສິນຄ້າ ເຊິ່ງທົ່ວເມືອງມີເນື້ອທີ່ດິນກະສິກຳທັງໝົດ 44.049 ເຮັກຕາ, ມີສັດລ້ຽງທັງໝົດ 556.171 ໂຕ, ໃນນີ້ມີຊ້າງ 26 ໂຕ, ຄວາຍ 19.333 ໂຕ, ງົວ 33.333 ໂຕ, ແກະ – ແບ້ 3.000 ໂຕ, ໝູ 19.000 ໂຕ ແລະ ສັດປີກ 466.664 ໂຕ, ມີໜອງປາ 1.533 ໜອງ ໃນເນື້ອທີ່ 169,48 ເຮັກຕາ.

ຄາດໝາຍສູ້ຊົນແຕ່ນີ້ຮອດປີ 2025 ໃນທົ່ວເມືອງໃຫ້ມີສັດລ້ຽງທັງໝົດ 626.287 ໂຕ, ໃນນີ້ ຊ້າງ 26 ໂຕ, ຄວາຍ 19.700 ໂຕ, ງົວ 45.792 ໂຕ, ແກະ – ແບ້ 3.556 ໂຕ, ໝູ 21.717 ໂຕ, ແລະ ສັດປີກ 535.487 ໂຕ, ມີໜອງປາ 1.600 ໜອງ ໃນເນື້ອທີ່ 180 ເຮັກຕາ.

ຂ່າວ: ເກດ ອານຸສອນ