ດີໃຈນຳເດ! ແຂວງຫົວພັນ ແຈ້ງການ 18 ຕຸລານີ້ ເລີ່ມເປີດການຮຽນ-ການສອນທຸກຂັ້ນແລ້ວ

161

ເນື່ອງຈາກການລະບາດຂອງໂຄວິດ-19 ເຮັດໃຫ້ຫຼາຍເຂດຕ້ອງມີການປ່ຽນແປງ ຕ້ອງໄດ້ຢຸດ, ໂຈະການຮຽນ – ການສອນ, ໃນຄວາມເປັນຈິງວຽກງານການສຶກສາແມ່ນຕ້ອງເລີ່ມປະຕິບັດກັນມາແຕ່ຕົ້ນເດືອນ 9 (ກັນຍາ) ຂອງທຸກໆປີ, ໃນນັ້ນລວມທັງແຂວງຫົວພັນທີ່ບໍ່ມີການຕິດເຊື້ອກໍໂຈະເຊັ່ນດຽວກັນ.

ຫຼ້າສຸດນີ້ ຫົວພັນປະກາດຈະໄດ້ອະນຸຍາດໃຫ້ເປີດການຮຽນ-ສອນຄືນແລ້ວໃນທົ່ວແຂວງ ໂດຍພະແນກສຶກສາ ແລະ ກີລາແຂວງຫົວພັນອອກແຈ້ງການເລກທີ 169/ສກຂ ລົງວັນທີ 15 ຕຸລາ 2021 ໃຫ້ເປີດການຮຽນ-ການສອນ ການສຶກສາກ່ອນໄວຮຽນ, ສາຍສາມັນສຶກສາ, ການສຶກສານອກໂຮງຮຽນ, ອາຊີວະສຶກສາ ແລະ ວິທະຍາໄລຄືນໃໝ່ໃນທົ່ວແຂວງ.

No photo description available.

May be an image of text

ແຈ້ງການລະບຸວ່າ: ຫົວໜ້າພະແນກສຶກສາທິການ ແລະ ກີລາແຂວງ ຂໍແຈ້ງການເຖິງທ່ານຫົວໜ້າຫ້ອງການສຶກສາທິການ ແລະ ກີລາເມືອງ 10 ເມືອງ, ໂຮງຮຽນອ້ອມຂ້າງແຂວງທັງພາກລັດ ແລະ ເອກະຊົນໃຫ້ເປີດການຮຽນ-ການສອນຄືນໃໝ່ລາຍລະອຽດມີດັ່ງນີ້:

1 ໃຫ້ສືບຕໍ່ການຮຽນ-ການສອນ ການສຶກສາກ່ອນໄວຮຽນ, ສາຍສາມັນສຶກສາ, ການສຶກສານອກໂຮງຮຽນ, ອາຊີວະສຶກສາ ແລະ ວິທະຍາໄລ ເລີ່ມແຕ່ວັນທີ 18 ຕຸລາ 2021 ເປັນຕົ້ນໄປ.

2 ໃຫ້ປະຕິບັດຕາມຫຼັກສູດພື້ນຖານ 80% ຊ່ວງໄລຍະການລະບາດພະຍາດໂຄວິດ-19 ສໍາລັບຊັ້ນປະຖົມສຶກສາແລະ ມັດທະຍົມສຶກສາ, ສ່ວນຊັ້ນຮຽນອະນຸບານແມ່ນໃຫ້ປະຕິບັດຕາມຫຼັກສູດເກົ່າ, ບໍ່ປ່ຽນແປງ.

3 ການຈັດຕັ້ງການປະຕິບັດແຜນການສອນ ແລະ ປະຕິທິນແມ່ນໃຫ້ປະຕິບັດຕາມຄໍາສັ່ງແນະນໍາຂອງກະຊວງສຶກສາທິການ ແລະ ກີລາ ສະບັບເລກທີ 934/ສສກ ລົງວັນທີ 17 ກັນຍາ 2021 ແລະ ຄໍາສັ່ງແນະນໍາຂອງພະແນກສຶກທິການ ແລະ ກີລາແຂວງ ສະບັບເລກທີ 166/ສກຂ ລົງວັນທີ 01 ຕຸລາ 2021 ແລະ ປະຕິບັດຕາມເອກະສານທີ່ແຈກຢາຍໃຫ້ຫ້ອງການສຶກສາທິການ ແລະ ກີລາເມືອງ ແລະ ໂຮງຮຽນ.

4 ມອບໃຫ້ຫ້ອງການສຶກສາທິການ ແລະ ກີລາເມືອງ ແຈ້ງໃຫ້ຄະນະນໍາຂັ້ນເມືອງ, ຂັ້ນບ້ານ ແລະ ພາກສ່ວນທີ່ກ່ຽວຂ້ອງຂອງຕົນຮັບຊາບດ້ວຍ.

5 ໃຫ້ຫ້ອງການສຶກສາທິການ ແລະ ກີລາເມືອງແນະນໍາຄູ, ນັກຮຽນໃຫ້ປະຕິບັດມາດຕະການປ້ອງກັນສະກັດກັ້ນຕ້ານພະຍາດໂຄວິດ-19 ເຊັ່ນ: ປະຕິບັດໄລຍະຫ່າງໃນຫ້ອງຮຽນ ແລະ ນອກຫ້ອງຮຽນຕາມສະພາບຄວາມເປັນຈິງຂອງໂຮງຮຽນ, ໃຊ້ຜ້າອັດປາກ-ດັງ ແລະ ໝັ່ນລ້າງມືໃສ່ສະບູ ຫຼື ເຈວ ເປັນປົກກະຕິ ແລະ ການແນະນໍາຂອງແພດ.

6 ອະນຸຍາດໃຫ້ພະນັກງານ ແລະ ຄູ-ອາຈານມາປະຈໍາການ ແລະ ສິດສອນເປັນປົກກະຕິ, ແຕ່ຕ້ອງປະຕິບັດມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ, ສໍາລັບຜູ້ທີ່ບໍ່ທັນໄດ້ສັກວັກແຊັງໃຫ້ປະຕິບັດດັ່ງນີ້:

ພະນັກງານ ແລະ ຄູ-ອາຈານຜູ້ໃດບໍ່ທັນໄດ້ສັກວັກແຊັງຍ້ອນເຫດຜົນ (ແມ່ຍິງຖືພາ, ລູກອ່ອນ), ມີພະຍາດປະຈໍາຕົວແມ່ນໃຫ້ມີໃບຢັ້ງຢືນຈາກແພດ ແລະ ໃຫ້ມາປະຈໍາການ, ສິດສອນໄດ້.

ຜູ້ທີ່ບໍ່ມີເຫດຜົນອ້າງອີງແມ່ນໃຫ້ຫ້ອງການສຶກສາ-ກີລາເມືອງ ແລະ ໂຮງຮຽນ, ເອີ້ນຜູ້ກ່ຽວມາສັກວັກແຊັງຖ້າຜູ້ກ່ຽວບໍ່ຍອມມາສັກວັກແຊັງ, ຖ້າແມ່ນພະນັກງານບໍລິຫານແມ່ນບໍ່ໃຫ້ມາປະຈໍາການ ແລະ ໃຫ້ລາຍງານ ຄະນະສະເພາະກິດຂັ້ນເທິງຂອງຕົນເພື່ອປະຕິບັດຕາມລະບຽບ, ຄູ-ອາຈານສອນແມ່ນໃຫ້ລາຍງານຄະນະສະເພາະກິດຂັ້ນເທິງຂອງຕົນຄົ້ນຄວ້າພິຈາລະນາ ແລະ ປະຕິບັດຕາມລະບຽບ.

7 ມອບໃຫ້ຄູ-ອາຈານຊີ້ນໍາ, ຕິດຕາມນັກຮຽນຜູ້ທີ່ມີອາການໄຂ້, ໄອຈາມ ຫຼື ຜູ້ທີ່ມີອາການອື່ນໆແມ່ນໃຫ້ລາຍງານຜູ້ອໍານວຍການ, ຜູ້ປົກຄອງນັກຮຽນໃຫ້ນໍາພາໄປກວດພະຍາດໃຫ້ທັນຕາມການເວລາ.