ເມືອງຕົ້ນເຜິ້ງ ຫ້າມເຂົ້າ-ອອກ ລະຫວ່າງ ບ້ານຕໍ່ບ້ານ

70

ປັດຈຸບັນເມືອງຕົ້ນເຜິ້ງ ໄດ້ເພີ່ມທະວີຄວາມເຂັ້ມງວດການເຂົ້າ-ອອກ ລະຫວ່າງ ບ້ານຕໍ່ບ້ານ ໂດຍສະເພາະບ້ານທີ່ຕິດກັບບ້ານພຽງງາມ ບ້ານສາມຫຼ່ຽມຄຳ ບ້ານດອນມູນ ແລະ ບ້ານໂພນໂຮມ ເຊິ່ງເປັນພື້ນທີ່ສີແດງ ໂດຍໄດ້ມີການສ້າງຮົ້ວກັ້ນການສັນຈອນໃສ່ເສັ້ນທາງຮ່ອມແຕ່ລະເສັ້ນພາຍໃນບ້ານ.

May be an image of motorcycle, road and street

ໂດຍໄດ້ມອບໃຫ້ ປກສ-ກອງຫຼອນຕັ້ງຈຸດກວດກາ-ປ້ອງກັນເວນຍາມຢູ່ເສັ້ນທາງໃຫຍ່ ບໍລິເວນເຊື່ອມຕໍ່ກັບບ້ານພື້ນທີ່ສີແດງ ເພື່ອບໍ່ໃຫ້ມີການເຂົ້າ-ອອກຂອງປະຊາຊົນ ລະຫວ່າງ ບ້ານແດງກັບບ້ານອື່ນໆ ໃນກໍລະນີຈໍາເປັນ ເຊັ່ນ: ໄປທຳການຜະລິດ, ໄປເກັບກ່ຽວເຂົ້ານາປີ ແມ່ນໃຫ້ເຂົ້າ-ອອກຕາມເສັ້ນທາງສະເພາະທີ່ທາງບ້ານອະນຸຍາດ ເຊິ່ງມີກຳລັງ ປກສ-ກອງຫຼອນປະຈໍາຢູ່ກວດກາຢ່າງເຄັ່ງຄັດ.

May be an image of one or more people, people standing and road

ພ້ອມທັງໃຫ້ປີດຮ້ານຂາຍຍົກ-ຂາຍຍ່ອຍ, ຮ້ານຂາຍໂທລະສັບ, ຮ້ານສ້ອມແປງລົດຈັກ-ລົດໃຫຍ່ຢູ່ບ້ານພື້ນທີ່ສີແດງ ແລະ ບ້ານໃຫຍ່ ຕົ້ນເຜິ້ງ; ປິດການຂົນສົ່ງດ່ວນຕ່າງໆຢູ່ພາຍໃນເມືອງເປັນການຊົ່ວຄາວ, ຫ້າມພໍ່ແມ່ປະຊາຊົນຊາວຄ້າຂາຍ ເຄື່ອນໄຫວສົ່ງເຄື່ອງອອນລາຍ ແລະ ຝາກເຄື່ອງນໍາບໍລິສັດຂົນສົ່ງຕ່າງໆ ແລະ ມາດຕະການອື່ນໆ ຈົນກວ່າຈະມີແຈ້ງການສະບັບໃໝ່ ຫຼື ຈົນກວ່າການແຜ່ລະບາດພະຍາດໂຄວິດ-19 ຈະຢຸດເຊົາ.

ປັດຈຸບັນຕົວເລກຜູ້ຕິດເຊື້ອໃນຊູມຊົນໃນເມືອງຕົ້ນເຜິ້ງ ມີຈໍານວນເພີ່ມຂຶ້ນໃນແຕ່ລະວັນ ແລະ ມີຈໍານວນບ້ານສີແດງເພີ່ມຂຶ້ນ. ທ່ານ ອຸ່ນເຮືອນ ແສງສຸລິຍາ ນາຍບ້ານບ້ານໃຫຍ່ຕົ້ນເຜິ້ງ ໄດ້ໃຫ້ຮູ້ວ່າ: ຜ່ານການຈັດຕັ້ງປະຕິບັດມາດຕະການດັ່ງກ່າວ ເລີ່ມແຕ່ວັນທີ 7 ຕຸລາ ເປັນຕົ້ນມາ ເຫັນວ່າປະຊາຊົນສ່ວນໃຫຍ່ພາຍໃນບ້ານໃຫຍ່ຕົ້ນເຜິ້ງ ເຊິ່ງເປັນບ້ານທີ່ຕິດກັບບ້ານພື້ນທີ່ສີແດງ ໄດ້ປະຕິບັດມາດຕະການຕ່າງໆຕາມແຈ້ງການຢ່າງເຂັ້ມງວດ ແຕ່ກໍຍັງມີປະຊາຊົນ ຊາວຄ້າຂາຍຈໍານວນໜຶ່ງຍັງມີທ່າທີລະເມີດຕໍ່ມາດຕະການ.

ດັ່ງນັ້ນ, ຈຶ່ງຂໍຮຽກຮ້ອງໃຫ້ຜູ້ທີ່ຍັງລະເມີດມາດຕະການ ກໍຄືທຸກພາກສ່ວນໃນສັງຄົມ ປະຕິບັດມາດຕະການຕາມແຈ້ງການດັ່ງກ່າວຢ່າງເຂັ້ມງວດ ເພື່ອຄວາມປອດໄພຂອງສັງຄົມ ແລະ ຕົວທ່ານເອງ.

ຈາກ:ໜັງສືພິມບໍ່ແກ້ວ