ກຳນົດ 5 ຮູບແບບການຮຽນ ຂອງເແຂວງຫຼວງພະບາງ ອີງຕາມເງື່ອນໄຂຕົວຈິງ

179

ການລະບາດໂຄວິດ-19 ເຮັດໃຫ້ວຽກງານການສຶກສາພົບກັບຂໍ້ຫຍຸ້ງຍາກຫຼາຍຢ່າງ ເຊິ່ງຕ້ອງໄດ້ມີການດັດປ່ຽນຮູບແບບການຮຽນ-ສອນ ໃຫ້ເຂົ້າກັບສະຖານະການທີ່ເປັນຢູ່ໃນຕອນນີ້ ເຊິ່ງພະແນກສຶກສາທິການ ແລະ ກີລາແຂວງຫຼວງພະບາງ ໄດ້ມີແຜນພັດທະນາລະບົບການຈັດການຮຽນ-ການສອນສໍາລັບສາຍສາມັນສຶກສາ ແນໃສ່ການຈັດການຮຽນ-ການສອນພາຍໃນແຂວງຫຼວງພະບາງໃຫ້ໄດ້ດໍາເນີນຢ່າງເປັນປົກກະຕິ ສົກຮຽນ 2021-2022 ນີ້.

May be an image of 1 person and indoor

ໂດຍການໃຫ້ສໍາພາດຂອງ ທ່ານ ວົງເພັດ ອຸດົມລິດ ຫົວໜ້າພະແນກສຶກສາທິການ ແລະ ກີລາແຂວງຫຼວງພະບາງ ໄດ້ກ່າວວ່າ: ສຳລັບການເປີດສົກຮຽນ 2021-2022 ພາຍຫຼັງທີ່ກະຊວງສຶກສາທິການ ແລະ ກີລາໄດ້ຈັດພິທີເປີດສົກຮຽນໃໝ່ຢ່າງເປັນທາງການໃນວັນທີ 6 ກັນຍາ 2021 ເອກະພາບທົ່ວປະເທດ, ແຕ່ແຂວງຫຼວງພະບາງແມ່ນພວມຢູ່ໃນໄລຍະການສືບຕໍ່ປະຕິບັດມາດຕະການປ້ອງກັນ ແລະ ແກ້ໄຂການແຜ່ລະບາດຂອງພະຍາດໂຄວິດ-19. ດັ່ງນັ້ນ, ເພື່ອເຮັດໃຫ້ການດໍາເນີນການຮຽນ-ການສອນສາມາດດຳເນີນເປັນປົກກະຕິ ແລະ ສອດຄ່ອງກັບສະພາບຕົວຈິງຂອງແຕ່ລະທ້ອງຖິ່ນ.

May be an image of 2 people, people standing, bicycle and road

ອີງໃສ່ທິດທາງຊີ້ນໍາ ແລະ ປະຕິບັດຕາມຂໍ້ຕົກລົງຂອງກະຊວງສຶກສາທິການ ແລະ ກີລາ ສະບັບເລກທີ 3868/ສສກ ລົງວັນທີ 6 ກັນຍາ 2021 ວ່າດ້ວຍການອະນຸມັດນໍາໃຊ້ເອກະສານທິດທາງການຈັດການຮຽນ-ການສອນສໍາລັບສາຍສາມັນສຶກສາໃນສະພາບທີ່ມີການແຜ່ລະບາດຂອງພະຍາດໂຄວິດ-19, ປັດຈຸບັນພະແນກສຶກສາທິການ ແລະ ກີລາແຂວງຫຼວງພະບາງ ກໍໄດ້ມີການວາງແຜນການຈັດການຮຽນ-ການສອນໃນຮູບແບບໃໝ່ໂດຍໃຫ້ສອດຄ່ອງກັບຍຸກ New Normal.

ເຊິ່ງຮູບແບບຂອງການຈັດການຮຽນ-ການສອນໃນຮູບແບບໃໝ່ນັ້ນ ປະກອບມີ 5 ຮູບແບບຄື: ການຮຽນໃນຫ້ອງຮຽນ (On Site), ການຮຽນຢູ່ເຮືອນ (Home School), ການຮຽນຜ່ານໂທລະພາບ/ວິທະຍຸ ( On Air) ການຮຽນຜ່ານອິນເຕີເນັດ (Online) ຮຽນແບບອອນລາຍ-ການຮຽນຜ່ານແອັບພລິເຄຊັນ, ການຮຽນ-ການສອນແບບປະສົມປະສານ (Blended Learning).

ຮູບພາບປະກອບຈາກອິນເຕີເນັດ