ຖ້າບໍ່ຢາກຕິດເຊື້ອໂຄວິດ-19 ຕ້ອງຈິງຈັງໃນການປະຕິບັດມາດຕະການຢ່າງເຂັ້ມງວດ

172

ມື້ນີ້ ທ່ານ ດຣ. ສີສະຫວາດ ສຸທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ກ່າວວ່າ: ການລະບາດໃນຊຸມຊົນ ຢູ່ ສປປ ລາວ ຍັງມີສະພາບໜ້າເປັນຫ່ວງຫຼາຍທີ່ສຸດ ແລະ ເປັນສັນຍານເຕືອນບອກວ່າ ທຸກຄົນແມ່ນມີຄວາມສ່ຽງສູງ ທີ່ສາມາດຕິດເຊື້ອພະຍາດນີ້ໄດ້ທຸກເວລາ ຖ້າຫາກບັນດາທ່ານລະເຫຼີງໃນການປ້ອງກັນຕົນເອງ ແລະ ບໍ່ປະຕິບັດມາດຕະການທີ່ທາງຄະນະສະເພາະກິດວາງອອກຢ່າງເຄັ່ງຄັດ ແລະ ເຂັ້ມງວດ.

May be an image of 1 person

ສະນັ້ນຂໍໃຫ້ທຸກຄົນ ທຸກຄອບຄົວ ຖ້າບໍ່ຈໍາເປັນໃຫ້ຢູ່ບ້ານ; ຖ້າຫາກທ່ານເປັນໄຂ້, ເປັນຫວັດ ຫຼື ໄອ ຫຼື ຫາຍໃຈຜິດປົກກະຕິ ສົມທົບກັບທ່ານຮູ້ສຶກວ່າຕົນໄດ້ສໍາຜັດກັບຄວາມສ່ຽງແລ້ວໃຫ້ໂທປຶກສາສາຍດ່ວນທັນທີ ຫຼື ແຈ້ງໄປເຖິງສະຖານບໍລິການສາທາລະນະສຸກທີ່ໃກ້ທີ່ສຸດ ເພື່ອຂໍກວດຊອກຫາເຊື້ອ.

ຜູ້ທີ່ບໍ່ທັນສັກວັກແຊັງ ຫຼື ສັກຍັງບໍ່ຄົບ ໄປສືບຕໍ່ສັກ ແຕ່ຜູ້ກ່ຽວຕ້ອງກຽມໜັງສືຢັ້ງຢືນຈາກອໍານາດປົກຄອງບ້ານໄປພ້ອມ ເຈົ້າໜ້າທີ່ຈະໄດ້ອໍານວຍຄວາມສະດວກໃນການເດີນທາງໄປສັກວັກແຊັງ ເພື່ອສ້າງພູມຄຸມກັນໝູ່ ແລະ ພູມຄຸ້ມກັນໃຫ້ຕົວທ່ານເອງ ທັງຊ່ວຍຫຼຸດຜ່ອນຄວາມຮຸນແຮງ ແລະ ຫຼຸດຜ່ອນການເສຍຊີວິດ ຖ້າຕິດເຊື້ອ.

May be an image of child, sitting, standing and indoor

ຂໍແຈ້ງໃຫ້ທຸກທ່ານຊາບອີກຄັ້ງໜຶ່ງວ່າ ການບໍລິການສັກວັກແຊັງຖືກກໍານົດຢູ່ຫຼາຍຈຸດຄື: ຈຸດທີ 1). ຢູ່ສູນການຄ້າລາວ-ໄອເຕັກ; 2). ໂຮງໝໍເມືອງ 9 ຕົວເມືອງ; 3); ຢູ່ວັດຈີນ ບ້ານດົງປາແລບ (ຈັນ ເຖິງ ສຸກ) ແລະ ຍັງມີທີມເຄື່ອນທີ່ໃຫ້ບໍລິການໃນເຂດທີ່ມີການລະບາດ.

ຮຽກຮ້ອງມາຍັງພໍ່ແມ່, ພີ່ນ້ອງ, ປະຊາຊົນ ແລະ ທຸກພາກສ່ວນໃນສັງຄົມ ຈົ່ງພ້ອມໃຈກັນປະຕິບັດການດໍາລົງຊິວິດປົກກະຕິແບບໃໝ່ (new normal) ໂດຍໝັ່ນລ້າງມື, ໃສ່ຜ້າອັດປາກ-ດັງ, ຮັກສາໄລຍະຫ່າງ, ບໍ່ກິນເຂົ້າຮ່ວມກັນເປັນກຸ່ມ, ຫຼີກລ່ຽງການຊຸມແຊວເປັນກຸ່ມ, ພວກເຮົາຕ້ອງຮ່ວມແຮງຮ່ວມໃຈກັນເພື່ອພ້ອມກັນຜ່ານຜ່າວິກິດນີ້ໄປດ້ວຍກັນ.