ສຳເລັດກວ່າ 50% ແລ້ວ ໂຄງການຟາມລ້ຽງງົວ ແລະ ໝູ ແຂວງຜົ້ງສາລີ

359

ທ່ານ ຄຳຜອຍ ວັນນະສານ ເຈົ້າແຂວງຜົ້ງສາລີ ພ້ອມດ້ວຍຂະແໜງການທີ່ກ່ຽວຂ້ອງຂັ້ນແຂວງ ໄດ້ລົງເຄື່ອນໄຫວຕິດຕາມຊຸກຍູ້ໂຄງການຟາມລ້ຽງງົວ ແລະ ຟາມລ້ຽງໝູເປັນສິນຄ້າ ຂອງບໍລິສັດ ບຸນທະວິໄຊ ກໍ່ສ້າງ, ສ້ອມແປງເຄຫາສະຖານ, ຂົວ-ທາງ ແລະ ຊົນລະປະທານ ໃນທ້າຍອາທິດທີ່ຜ່ານມານີ້.

ໂດຍໄດ້ຮັບການຕ້ອນຮັບ ແລະ ຮັບຟັງການລາຍງານຈາກ ທ່ານ ເຫຼັກ ສຸກສັນ ອຳນວຍການ ບໍລິສັດ ບຸນທະວິໄຊ ກໍ່ສ້າງ, ສ້ອມແປງເຄຫາສະຖານ, ຂົວ-ທາງ ແລະ ຊົນລະປະທານ. ເຊິ່ງຟາມລ້ຽງງົວ ແມ່ນຕັ້ງຢູ່ເຂດບ້ານພູນັ່ງເກົ່າ ເມືອງບຸນເໜືອ ແຂວງຜົ້ງສາລີ, ເປັນການລົງທຶນຂອງເອກະຊົນ 100%, ມີມູນຄ່າການລົງທຶນ 48.605.000.000 ກີບ ແລະ ມີເນື້ອທີ່ສໍາປະທານດິນລັດຈໍານວນ 97 ເຮັກຕາ.

May be an image of 5 people, people standing, outdoors and tree

ເຊິ່ງມາຮອດປັດຈຸບັນໜ້າວຽກດັ່ງກ່າວແມ່ນສາມາດຈັດຕັ້ງປະຕິບັດໄດ້ 80% ສຳລັບຟາມລ້ຽງໝູແມ່ນຕັ້ງຢູ່ເຂດບ້ານ ເດີ່ນກິລາ ເມືອງບຸນເໜືອ ແຂວງຜົ້ງສາລີ, ເປັນການລົງທຶນດ້ວຍເອກະຊົນ 100% ມີມູນຄ່າການລົງທຶນ 13.492.675.200 ກີບ ມີເນື້ອທີ່ທັງໝົດ 22.470 ຕາແມັດ ເນື້ອທີ່ທີ່ນໍາໃຊ້ເຂົ້າໃນໂຄງການແມ່ນເປັນພື້ນທີ່ສ່ວນບຸກຄົນ ( ທີ່ເປັນກໍາມະສິດຂອງເຈົ້າຂອງກິດຈະການເອງ 100% ).

ບັນດາໜ້າວຽກທີ່ທາງບໍລິສັດ ສຳເລັດແມ່ນທະລຸ, ເປີດກວ້າງເສັ້ນທາງ, ວາງທໍ່ເສັ້ນທາງເຂົ້າເຖິງຟາມ ໄລຍະ 6,5 ກິໂລແມັດ, ປັບສະຖານທີ່ຕັ້ງຫ້ອງການ, ຄອກສັດ ແລະ ສາງເກັບມ້ຽນອາຫານ, ຕັ້ງຫ້ອງການ ແລະ ເຮືອນພັກພະນັກງານ, ຕັ້ງສາງເກັບມ້ຽນອາຫານ ສໍາເລັດ 50%, ຕັ້ງຄອກໝູອະນຸບານ 1 ຫຼັງ ຂະໜາດ 14 ແມັດ x 75 ແມັດ ສໍາເລັດ 50%, ຕັ້ງຄອກໝູອະນຸບານ 3 ຫຼັງ ຂະໜາດ 14 ແມັດ x 75 ແມັດ ສໍາເລັດ 50%.

May be an image of one or more people, people standing and outdoors

ສຳລັບວຽກທີ່ຈະສືບຕໍ່ຈັດຕັ້ງປະຕິບັດຕໍ່ໜ້າ ແມ່ນກໍ່ສ້າງສາງເກັບມ້ຽນອາຫານໃຫ້ສໍາເລັດ, ສືບຕໍ່ກໍ່ສ້າງບັນດາຄອກລ້ຽງໝູ 6 ຫຼັງໃຫ້ສໍາເລັດ, ສືບຕໍ່ກໍ່ສ້າງລະບົບນໍ້າໃຊ້ໃນຟາມ, ກໍ່ສ້າງໄຟຟ້າທີ່ຈະນໍາໃຊ້ເຂົ້າໃນຟາມເຊິ່ງໄດ້ຈາກ 3 ແຫຼ່ງຄື: (ຈາກໄຟຟ້ານໍ້າຢອດ, ຈາກແສງຕາເວັນ ແລະ ຈາກໄບໂອແກັສ), ລ້ອມຮົ້ວອ້ອມຟາມ ເຊິ່ງມີຄວາມຍາວ 700 ແມັດ ແລະ ກໍ່ສ້າງເຮືອນສໍາລັບເກັບນໍ້າເຊື້ອ ຄາດວ່າຕົ້ນປີ 2022 ໃຫ້ໄດ້ນໍາເຂົ້າມາລ້ຽງໃນຟາມ ແລະ ໃຫ້ໄດ້ຈໍາໜ່າຍໝູຊີ້ນໃນຕະຫຼາດເມືອງບຸນເໜືອໃນກາງປີ 2022.

ຂ່າວຈາກ: Media LAOS