ເຈົ້າແຂວງສະຫວັນນະເຂດ ລົງເຄື່ອນໄຫວຊີ້ນຳວຽກງານທີ່ເມືອງວິລະບູລີ

162

ໃນວັນທີ 21 ກັນຍາ 2021 ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມຄະນະ ໄດ້ລົງເຄື່ອນໄຫວຊີ້ນຳວຽກງານດ້ານຕ່າງໆທີ່ເມືອງວິລະບູລີ. ພ້ອມນີ້, ທ່ານກໍໄດ້ລົງເບິ່ງສະຖານທີ່ຕົວຈິງທີ່ຈະໃຊ້ເປັນໂຮງໝໍພາກສະໜາມ ແລະ ໃຊ້ເປັນສູນກັກກັນສຳລັບການປ້ອງກັນການແຜ່ລະບາດຂອງພະຍາດໂຄວິດ-19 ທີ່ທາງບໍລິສັດລ້ານຊ້າງມິເນໂຣນສ໌ ລິມິເຕັດ ຈະໃຊ້ເປັນສູນກັກກັນສຳລັບພະນັກງານຂອງບໍລິສັດຕົນ.

May be an image of outdoors and tree

ທ່ານ ຄຳຜຸຍ ສີບຸນເຮືອງ ເຈົ້າເມືອງວິລະບູລີ ໄດ້ລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຂອງເມືອງວິລະບູລີ, ມາຮອດປັດຈຸບັນ ແມ່ນປະຕິບັດໄດ້ 40,62% ໃນຈໍານວນທັງໝົດ 96 ໂຄງການ. ສະເພາະຕົ້ນປີ 2021 ໄດ້ຮັບທຶນພັດທະນາທັງໝົດ 11.700 ລ້ານກີບ, ໃນນີ້ ທຶນລັດ 50% ແລະ ທຶນບໍ່ຄໍາ 50%, ສາມາດຈັດຕັ້ງປະຕິບັດໄດ້ 28 ໂຄງການ ກວມເອົາ 19,79% ຂອງແຜນປີ, ມີມູນຄ່າລົງທຶນທັງໝົດ 52.149 ລ້ານກີບ ກວມເອົາ 4,4% ຂອງທຶນ.

ສ່ວນດ້ານການປ້ອງກັນ, ຄວບຄຸມ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ພາຍໃນເມືອງວິລະບູລີ, ອໍານາດການປົກຄອງເມືອງວິລະບູລີ ໄດ້ເອົາໃຈໃສ່ເຂົ້າໃນການຈັດຕັ້ງຜັນຂະຫຍາຍບັນດາມະຕິ, ຄຳສັ່ງ ແລະ ແຈ້ງການຕ່າງໆ ກ່ຽວກັບມາດຕະການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຂອງສູນກາງ, ຂອງແຂວງວາງອອກຢ່າງເຂັ້ມງວດ.

ພ້ອມນີ້,​ທ່ານເຈົ້າແຂວງພ້ອມຄະນະກໍໄດ້ລົງເບິ່ງສູນກັກກັນຂອງເມືອງເພື່ອຄວບຄຸມການແຜ່ລະບາດຂອງພະຍາດໂຄວິດ-19 ເຊິ່ງເມືອງວິລະບູລີ ໄດ້ເອົາໂຮງຮຽນ ມສ ພູຄຳ ເປັນສູກກັກກັນຂອງເມືອງ. ຕໍ່ມາ, ທ່ານເຈົ້າແຂວງ ພ້ອມດ້ວຍຄະນະນຳຂອງແຂວງກໍໄດ້ລົງເບິ່ງພື້ນທີ່ຕົວຈິງໃນຂອບເຂດບ້ານຜາພິລາງ ທີ່ມີຊາຍແດນຕິດຈອດກັບບ້ານໜອງກະປາດ ເມືອງບົວລະພາ ແລະ ລົງບ້ານໂພນຄຳ ທີ່ມີຊາຍແດນຕິດຕິດຈອດກັບບ້ານນາໂມ້ ເມືອງໄຊບົວທອງ ແຂວງຄຳມ່ວນ.