ແຂວງສາລະວັນ ແລະ ແຂວງຄຳມ່ວນ ໄດ້ຮັບເຄື່ອງຜະລິດອົກຊີຈາກແຂວງຈຳປາສັກ

133

ພິທີມອບ – ຮັບໄດ້ມີຂຶ້ນໃນວັນທີ 10 ກັນຍາ 2021 ທີ່ຫ້ອງວ່າການແຂວງຈໍາປາສັກ, ຕາງໜ້າໃຫ້ຄະນະນຳແຂວງ ກ່າວມອບໂດຍ ທ່ານ ວັນນະໄຊ ຊາດຕະກຸນ ຫົວໜ້າຫ້ອງວ່າການແຂວງ, ຫົວໜ້າກອງເລຂາຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ – 19 ຂັ້ນແຂວງ ແລະ ກ່າວຮັບໂດຍຜູ້ຕາງໜ້າໃຫ້ສອງແຂວງສາລະວັນ ແລະ ແຂວງຄຳມ່ວນ ໂດຍມີພາກສ່ວນທີ່ກ່ຽວຂ້ອງເຂົ້າຮ່ວມ.

ເຄື່ອງທີ່ມອບໃຫ້ແຂວງສາລະວັນ ປະກອບມີ: ເຄື່ອງຜະລິດອົກຊີ ຂະໜາດ 10 ລິດ ຈໍານວນ 3 ໜ່ວຍ; ຂະໜາດ 5 ລິດ ຈໍານວນ 2 ໜ່ວຍ ມູນຄ່າ 30 ລ້ານກີບ; ແຂວງຄຳມ່ວນ ມີເຄື່ອງຜະລິດອົກຊີ ຂະໜາດ 10 ລິດ ຈໍານວນ 2 ໜ່ວຍ; ຂະໜາດ 5 ລິດ ຈໍານວນ 3 ໜ່ວຍ ມູນຄ່າ 30 ລ້ານກີບ.

ໂອກາດນີ້, ທ່ານ ວັນນະໄຊ ຊາດຕະກຸນ ໄດ້ກ່າວວ່າ: ແຂວງຈຳປາສັກ ມີຄວາມພູມໃຈ ແລະ ຍິນດີທີ່ໄດ້ປະກອບສ່ວນມອບອຸປະກອນການແພດ, ເຄື່ອງຜະລິດອົກຊີໃນການຊຸກຍູ້ວຽກງານດ້ານສາທາລະນະສຸກ ໃຫ້ທັງສອງແຂວງສາລະວັນ ແລະ ແຂວງຄຳມ່ວນ ໂດຍສະເພາະແມ່ນເພື່ອປະກອບສ່ວນເຂົ້າໃນວຽກງານປ້ອງກັນ ສະກັດກັ້ນ, ຄວບຄຸມ ແລະ ແກ້ໄຂການລະບາດພະຍາດໂຄວິດ – 19.