ຄະນະສະເພາະກິດ ປະກາດປິດການເຂົ້າ-ອອກ ເທດສະບານ ເມືອງທ່າແຂກ ຮອດວັນທີ 13 ກັນຍາ

761

ອີງໃສ່ສະພາບການລະບາດຂອງພະຍາດໂຄວິດ-19 ຢູ່ພາຍໃນແຂວງຄໍາມ່ວນ ໄດ້ມີກໍລະນີຜູ້ ຕິດເຊື້ອຢູ່ໃນຊຸມຊົນເພີ່ມຂຶ້ນຈໍານວນຫຼາຍ, ເຊິ່ງມີຄວາມສ່ຽງສູງທີ່ຈະມີການແຜ່ລະບາດໃນຊຸມຊົນອອກເປັນວົງກວ້າງ ໂດຍສະເພາະແມ່ນຢູ່ເທດສະບານເມືອງທ່າແຂກ, ສະນັ້ນ ຄະນະສະເພາະກິດ ເພື່ອປ້ອງ ກັນ, ຄວບຄຸມ ແລະ ແກ້ໄຂ ພະຍາດໂຄວິດ-19 ຂັ້ນແຂວງ ຈື່ງອອກແຈ້ງການດັ່ງນີ້:

1. ໃຫ້ທຸກພາກສ່ວນເອົາໃຈໃສ່ເປັນເຈົ້າການຈັດຕັ້ງປະຕິບັດ ຄໍາສັ່ງຂອງ ເຈົ້າແຂວງ ສະບັບເລກທີ 07/ຈຂ, ລົງວັນທີ 31 ສິງຫາ 2021ຢ່າງເຂັ້ມງວດ ແລະ ເດັດຂາດ.
2. ໃຫ້ປິດການເຂົ້າ-ອອກ ເທດສະບານ ເມືອງທ່າແຂກ ຈົນເຖິງ ເວລາ 12:00 ໂມງ ຂອງວັນທີ 13 ກັນຍາ 2021, ຫ້າມບຸກຄົນໃນເທດສະບານເມືອງທ່າແຂກ, ບຸກຄົນຕ່າງແຂວງ ແລະ ຕ່າງເມືອງ ເດີນທາງ ເຂົ້າ-ອອກ ເທດສະບານເມືອງທ່າແຂກ ໂດຍເດັດຂາດ, ຖ້າມີຄວາມຈໍາເປັນຕ້ອງໄດ້ຮັບອະນຸຍາດຈາກຄະນະ ສະເພາະກິດຂັ້ນແຂວງ.
– ລົດຂົນສົ່ງສິນຄ້າ, ລົດໂດຍສານ, ລົດສ່ວນບຸກຄົນ ທີ່ເດີນທາງຜ່ານແຂວງຄໍາມ່ວນ ຫ້າມຈອດ ເອົາຄົນ ຂຶ້ນ-ລົງໂດຍເດັດຂາດ. ຖ້າມີການລະເມີດໃຫ້ປະຕິບັດຕາມມາດຕະການຢ່າງເຂັ້ມງວດ.


3. ຫ້າມບໍ່ໃຫ້ມີການສັນຈອນໄປ-ມາ ພາຍໃນເທດສະບານເມືອງທ່າແຂກ ນັບແຕ່ເວລາ 21:30 ໂມງ ຂອງແຕ່ລະວັນ ຈົນເຖິງເວລາ 05:30 ໂມງຂອງວັນຖັດໄປ, ຍົກເວັ້ນກໍລະນີເຈັບເປັນ, ເສຍຊີວິດ, ເຫດການສຸກເສີນຈໍາເປັນ ແລະ ຜູ້ໄປເກັບຕົວຢ່າງເພື່ອກວດຫາເຊື້ອພະຍາດໂຄວິດ-19. ມອບໃຫ້ເຈົ້າຫນ້າທີ່ປ້ອງກັນຊາດ, ປ້ອງກັນຄວາມສະຫງົບແຂວງ, ເມືອງທ່າແຂກ ແລະ ບ້ານ ຕິດຕາມ, ກວດກາ ແລະ ລາດຕະເວນ ຖ້າມີການລະເມີດໃຫ້ປະຕິບັດຕາມລະບຽບກົດຫມາຍຢ່າງເຂັ້ມງວດ.


4. ໃຫ້ປິດຕະຫຼາດ ຫຼັກ 2, ຕະຫຼາດຫຼັກ 3 ແລະ ຕະຫຼາດເພັດມະນີ ເນື່ອງຈາກມີກໍລະນີຜູ້ຕິດເຊື້ອໃນ ຊຸມຊົນ, ສ່ວນຕະຫຼາດ ນາໂບ ມອບໃຫ້ເມືອງທ່າແຂກ ແລະ ພາກສ່ວນກ່ຽວຂ້ອງ ຕິດຕາມ, ແນະນຳ ໃຫ້ ບັດມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ.
5. ຫ້າມຈັດງານຕ່າງໆ, ງານບຸນປະເພນີພາຍໃນວັດ, ບ້ານ, ເຮືອນ ແລະ ສະຖານທີ່ອື່ນໆໂດຍເດັດຂາດ; ຍົກເວັ້ນກໍລະນີເສຍຊີວິດ ທີ່ບໍ່ແມ່ນຍ້ອນສາເຫດພະບາດໂຄວິດ-19. ສ່ວນການຄົບງັນແມ່ນໃຫ້ເຮັດແບບ ລຽບງ່າຍບໍ່ຢູ່ງານດົນເກີນໄປ, ບໍ່ໃຫ້ມີການຈັດໂຕະກິນ-ດື່ມພາຍໃນງານ ແລະ ການສົ່ງສະການແມ່ນໃຫ້ປະຕິບັດມາດຕະການຢ່າງເຂັ້ມງວດ.


6. ຫ້າມພະນັກງານ, ລັດຖະກອນ, ພໍ່ແມ່ປະຊາຊົນ ພາຍໃນເທດສະບານເມືອງທ່າແຂກ ອອກຈາກເຮືອນ ຫຼື ບ່ອນພັກອາໄສຂອງຕົນຢ່າງເດັດຂາດ, ຍົກເວັ້ນກໍລະນີທີ່ຈໍາເປັນ ເຊັ່ນ: ໄປໂຮງຫມໍກໍລະນີເຈັບສຸກເສີນ, ໄປຊື້ ເຄື່ອງອຸປະໂພກ-ບໍລິໂພກ; ສາມາດໄປໄດ້ແຕ່ໃຫ້ການຈັດຕັ້ງທີ່ກ່ຽວຂ້ອງ ແລະ ອໍານາດການປົກຄອງບ້ານ ຕິດຕາມ, ກວດກາ, ຄຸ້ມຄອງດ້ານຈໍານວນ ແລະຂອບເຂດການເຄື່ອນໄຫວຢ່າງເຂັ້ມງວດ.
– ໃຫ້ພໍ່ແມ່ປະຊົນໃນຂອບເຂດເທດສະບານເມືອງທ່າແຂກ ພ້ອມກັນກະກຽມເຄື່ອງ ອຸປະໂພກ-ບໍລິໂພກ, ຢາປົວພະຍາດ, ສະບຽງອາຫານໄວ້ໃນຄົວເຮືອນໃຫ້ພຽງພໍ.
7. ໃຫ້ພະນັກງານ-ລັດຖະກອນ ແລະ ພະນັກງານບໍລິສັດ ເຮັດວຽກຢູ່ເຮືອນຂອງຕົນເອງ: ຍົກເວັ້ນ ຄະນະສະເພາະກິດ ແລະ ແພດ-ຫມໍ, ກໍາລັງ ປກຊ ປກສ, ເຈົ້າຫນ້າທີ່ໄດ້ຮັບມອບຫມາຍໃຫ້ໄປປະຈໍາການຢູ່ດ່ານສາກົນ ແລະ ເຈົ້າຫນ້າທີ່ປະຕິບັດພາລະກິດໃນການຕ້ານ ແລະ ສະກັດກັ້ນການແຜ່ລະບາດຂອງພະຍາດ ໂຄວິດ-19.


8. ຫ້າມສວຍໂອກາດກັກຕຸນ ແລະ ຂຶ້ນລາຄາສິນຄ້າ ເກີນລາຄາປົກກະຕິ ເປັນຕົ້ນ ແມ່ນເຄື່ອງອຸປະ ໂພກ-ບໍລິໂພກ ແລະ ເຄື່ອງອຸປະກອນການແພດ ແລະ ອື່ນໆ; ມອບໃຫ້ ເຈົ້າຫນ້າທີ່ກ່ຽວຂ້ອງຕິດຕາມ, ກວດກາ ຖ້າຫາກມີຜູ້ລະເມີດ ໃຫ້ດໍາເນີນມາດຕະການປັບໄຫມ ຕາມລະບຽບກົດຫມາຍຢ່າງເຂັ້ມງວດ.
9. ໃຫ້ພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ, ຄະນະສະເພາະກິດເມືອງທ່າແຂກ ເປັນເຈົ້າການສົມທົບກັບພາກສ່ວນກ່ຽວຂ້ອງ ເອົາໃຈໃສ່ລົງໂຄສະນາປະຊາສໍາພັນ ເພື່ອໃຫ້ປະຊາຊົນໄດ້ຮັບ ຊາບໂດຍທົ່ວເຖິງ.
10, ໃຫ້ກໍາລັງ ປກຊ ແລະ ປກສ ແຂວງ, ຄະນະສະເພາະກິດເມືອງທ່າແຂກ ເປັນເຈົ້າການຊີ້ນໍາ ການຈັດຕັ້ງທຸກພາກສ່ວນເອົາໃຈໃສ່ລົງໂຄສະນາເຜີຍແຜ່ ແນະນໍາໃຫ້ທຸກບ້ານ ແລະ ຊີ້ນໍາ ອໍານາດການ ປົກຄອງບ້ານໃຫ້ເຂັ້ມງວດ ພ້ອມທັງເອົາໃຈໃສ່ໃນການກວດກາ, ລາດຕະເວນ ຕະຫຼອດ 24 ຊົ່ວໂມງ; ຖ້າພົບ ເຫັນກຸ່ມຄົນ, ບຸກຄົນມີການລະເມີດໂດຍສະເພາະການຊຸມແຊວ, ດື່ມສິ່ງມຶນເມົາ, ຫຼີ້ນການພະນັນ ແລະ ອື່ນໆ ມອບໃຫ້ເຈົ້າຫນ້າທີ່ປະຕິບັດຕາມລະບຽບກົດຫມາຍຢ່າງເຂັ້ມງວດ.


ດັ່ງນັ້ນ, ຈຶ່ງແຈ້ງມາຍັງທຸກພາກສ່ວນເພື່ອຮັບຊາບ ແລະ ພ້ອມກັນຈັດຕັ້ງປະຕິບັດເນື້ອໃນແຈ້ງການ ສະບັບນີ້ຢ່າງເຂັ້ມງວດ ນັບແຕ່ວັນທີ 04 ກັນຍາ 2021 ເຖິງ ວັນທີ 13 ກັນຍາ 2021, ໃນກໍລະນີມີການ ປ່ຽນແປງຈະແຈ້ງໃຫ້ຊາບຕື່ມແຕ່ລະໄລຍະ.