ຜູ້ຕາງໜ້າອົງການ KOICA ປະຈຳ ສປປ ລາວ ໄດ້ຮັບການປະດັບຫຼຽນ ແລະ ໃບຍ້ອງຍໍ

289

ທີ່ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສ.ເກົາຫຼີ, ທ່ານ ທ່ຽງ ບຸບຜາ ເອກອັກຄະລັດຖະທູດລາວ ປະຈໍາ ສ.ເກົາຫຼີ ໄດ້ຕາງໜ້າໃຫ້ລັດຖະບານ ສປປ ລາວ ໃຫ້ກຽດປະດັບຫຼຽນກາມິດຕະພາບ ແກ່ທ່ານ ຊັງຊູ ໂອ ( Sungsoo Oh ) ຫົວໜ້າອົງການຮ່ວມມືສາກົນ ສ.ເກົາຫຼີ ແລະ ມອບໃບຍ້ອງຍໍລັດຖະບານໃຫ້ແກ່ທ່ານ ນາງ ວອນຢຸງ ຢໍ ( Wongyoung Yeo ) ຮອງຫົວໜ້າອົງການຮ່ວມມືສາກົນ ສ.ເກົາຫຼີ ຫຼື Korea International Cooperation Agency ( KOICA ) ປະຈໍາ ສປປ ລາວ ທີ່ມີຜົນງານດີເດັ່ນໃນການເຄື່ອນໄຫວປະຕິບັດໜ້າທີ່ວຽກງານຢູ່ ສປປ ລາວ ໄລຍະແຕ່ປີ 2017 – 2020 ແລະ ໄດ້ຮັບຜົນສຳເລັດໃນການປະກອບສ່ວນຊຸກຍູ້ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງ ສປປ ລາວ – ສ.ເກົາຫຼີ ເມື່ອມໍ່ໆມານີ້.

May be an image of 1 person and standing

ທ່ານເອກອັກຄະລັດຖະທູດລາວ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນງານການເຄື່ອນໄຫວຂອງສອງທ່ານ ເຊິ່ງຕະຫຼອດໄລຍະການປະຕິບັດໜ້າທີ່ຢູ່ ສປປ ລາວ 3 ປີ ໄດ້ປະກອບສ່ວນເຂົ້າໃນການພັດທະນາເສດຖະກິດ – ສັງຄົມຂອງລາວ ກໍຄືການຍົກສູງ ແລະ ສົ່ງເສີມການພົວພັນຮ່ວມມືສອງຝ່າຍ ສປປ ລາວ – ສ.ເກົາຫຼີ ໂດຍສະເພາະໃນດ້ານການພັດທະນາຊັບພະຍາກອນມະນຸດ, ສາທາລະນະສຸກ, ພື້ນຖານໂຄງລ່າງ ແລະ ອື່ນໆ.