ຈັດພິທີທຳລາຍສິນຄ້າໝົດອາຍຸ ແລະ ສິນຄ້າຫ້າມຈໍາໜ່າຍ ຢູ່ເມືອງພີນ

326

ທີ່ຫ້ອງການອຸດສາຫະກຳ ແລະ ການຄ້າເມືອງພີນ ແຂວງສະຫວັນນະເຂດ ໄດ້ຈັດພິທີມອບສົ່ງສິນຄ້າໝົດອາຍຸ ແລະ ສິນຄ້າຫ້າມຈໍາໜ່າຍ ເພື່ອນໍາໄປທໍາລາຍຖິ້ມ ໃນຕອນເຊົ້າວັນທີ 1 ກັນຍາ 2021 ໂດຍການເຂົ້າຮ່ວມຂອງ ທ່ານ ສົມສະໜຸກ ເພັດຊົມພູ ຮອງເຈົ້າເມືອງພີນ, ມີທ່ານ ຂັນແກ້ວ ສຸວັນນະສານ ຫົວໜ້າຫ້ອງການອຸດສາຫະກຳ ແລະ ການຄ້າເມືອງ ພ້ອມດ້ວຍພະນັກງານຫ້ອງການອຸດສາຫະກຳ ແລະ ການຄ້າເຂົ້າຮ່ວມ.

ທ່ານ ຂັນແກ້ວ ສຸວັນນະສານ ໄດ້ລາຍງານໃຫ້ຮູ້ວ່າ: ຜ່ານການຈັດຕັ້ງປະຕິບັດໃນໄລຍະ 1 ປີຜ່ານມາ ໜ່ວຍງານການຄ້າພາຍໃນ ກໍຄືຈຸງານກວດກາການຄ້າຂັ້ນເມືອງ ໄດ້ເອົາໃຈໃສ່ລົງຕິດຕາມ ກວດກາສິນຄ້າທີ່ລະເມີດຕໍ່ກົດລະບຽບຄຸ້ມຄອງການຄ້າ ເປັນຕົ້ນສິນຄ້າເສື່ອມຄຸນ, ສິນຄ້າໝົດອາຍຸການນໍາໃຊ້, ສິນຄ້ານອກລະບົບ. ຈຸງານກວດກາສິນຄ້າສາມາດກວດຢຶດ – ອາຍັດສິນຄ້າໄດ້ດັ່ງນີ້: ປະເພດສິນຄ້າເສື່ອມຄຸນນະພາບ ( ເສຍຄຸນ ) ມີຈໍານວນ 24 ລາຍການ, ປະເພດສິນຄ້າຫ້າມຈໍາໜ່າຍ ມີຈໍານວນ 9 ລາຍການ ລວມທັງໝົດແມ່ນ 33 ລາຍການ ມູນຄ່າລວມ 8.976.000 ກີບ.