ສປປລາວ ພົບຜູ້ຕິດເຊື້ອໂຄວິດ-19 ໃໝ່ 274 ກໍລະນີ, ໃນຊຸມຊົນພາຍໃນ 54 ຄົນ

340

ສະຖານະການໂຄວິດ 19 ຢູ່ລາວມື້ນີ້ ປະຈຳວັນທີ 1 ກັນຍາ 2021 ຈາກການຖະແຫຼງຂອງທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໃຫ້ຮູ້ວ່າ ສະພາບການລະບາດພະຍາດໂຄວິດ-19 ຢູ່ ສປປ ລາວ, ມາຮອດມື້ນີ້ໄດ້ກວດວິເຄາະທັງໝົດ 3.828 ຄົນ, ໃນນັ້ນ ກວດພົບຜູ້ຕິດເຊື້ອໃໝ່ ທັງໝົດ 274 ຄົນ

ຕິດເຊື້ອໃນຊຸມຊົນເຖິງ 54 ຄົນ ເປັນຜູ້ສຳຜັດໃກ້ຊິດນຳຜູ້ຕິດເຊື້ອທີ່ຜ່ານມາ ແລະ ກໍລະນີນໍາເຂົ້າ ມີ 220 ຄົນ ຈາກ ແຂວງວຽງຈັນ 1 ຄົນ, ຄຳມ່ວນ 4 ຄົນ, ສາລະວັນ 3 ຄົນ ,ຈຳປາສັກ 45 ຄົນ ແລະ ສະຫວັນນະເຂດ 167 ຄົນ ເຊິ່ງກວດພົບຈາກແຮງງານລາວ ຫຼື ຜູ້ທີ່ເດີນທາງມາຈາກປະເທດເພື່ອນບ້ານ ເຂົ້າຕາມຈຸດຜ່ານແດນສາກົນ.

54 ກໍລະນີຕິດເຊື້ອໃນຊຸມຊົນມີຄື:ນະຄອນຫຼວງ 2 ຄົນ,  ແຂວງ ສະຫວັນນະເຂດ 12 ຄົນ, ບໍ່ແກ້ວ 18 ຄົນ, ຈໍາປາສັກ 14 ຄົນ,ຄຳມ່ວນ 4 ຄົນ,ຫຼວງນ້ຳທາ 1 ຄົນ, ຫຼວງພະບາງ 1 ຄົນ,  ໄຊຍະບູລີ 1 ຄົນ ແລະ  ແຂວງວຽງຈັນ 1 ຄົນ

ມາຮອດມື້ນີ້ ພວກເຮົາມີຕົວເລກຜູ້ຕິດເຊື້ອສະສົມທັງໝົດ 15.289 ຄົນ, ເສຍຊີວິດສະສົມ 14 ຄົນ (ໃໝ່ 0 ຄົນ) ແລະ ຄົນເຈັບກໍາລັງປິ່ນປົວ ທັງໝົດ 5.418 ຄົນ.

ມື້ວານນີ້ ທາງຫ້ອງວ່າການສຳນັກງານນາຍົກລັດຖະມົນຕີ ໄດ້ອອກແຈ້ງການ ການສືບຕໍ່ປະຕິບັດມາດຕະການປ້ອງກັນ, ຄວບຄຸມ ແລະ ສະກັດກັ້ນການລະບາດຂອງພະຍາດ COVID-19 ໃນໄລຍະວັນທີ່ 1-15 ກັນຍາ 2021, ສະບັບເລກທີ 1094/ຫສນຍ ລົງວັນທີ 31 ສິງຫາ 2021, ເຊີ່ງຂ້າພະເຈົ້າຈະຂະຫຍາຍບາງເນື້ອໃນທີ່ສຳຄັນຂອງແຈ້ງການດັ່ງກ່າວໃຫ້ບັນດາທ່ານໄດ້ເຂົ້າໃຈເຖີງຈຸດປະສົງໃນການອອກມາດຕະການດັ່ງກ່າວເຫຼົ່ານັ້ນ.

ດັ່ງທີ່ພວກທ່ານໄດ້ຕິດຕາມຖະແຫຼງການພົບເຫັນວ່າມີຫຼາຍແຂວງລວມທັງນະຄອນຫຼວງແມ່ນເລີ່ມມີສັນຍານການຕິດເຊື້ອເຂົ້າສູ່ຊຸມຊົນ ດ້ວຍເຫດນັ້ນຈີ່ງມີມາດຕະການຂໍ້ 1.6 ຫ້າມບຸກຄົນເດີນທາງເຂົ້າ-ອອກເຂດທີ່ມີການຕິດເຊື້ອ (ເຂດແດງ) ແລະ ຂໍ້ 1.11 ປິດການສັນຈອນພາຫະນະຢູ່ນະຄອນຫຼວງວຽງຈັນແຕ່ເວລາ 22:00-05:00 ໂມງເຊົ້າ; ຂໍ້ 1.8 ຫ້າມຈັດປະຊຸມ, ງານໂຮມຊຸມນຸມ ຫຼື ຈັດກິດຈະກຳຕ່າງໆທີ່ມີຜູ້ເຂົ້າຮ່ວມຫຼາຍກ່ວາ 20 ຄົນ ໃນເຂດທີ່ມີການລະບາດພະຍາດ….ເຂິ່ງເປັນມາດຕະການເພື່ອສະກັດກັ້ນການແຜ່ເຊື້ອພະຍາດ ໂຄວີດ-19 ຈາກຄົນຜູ້ໜື່ງຫາຄົນຜູ້ໜື່ງໄດ້ຢ່າງສີ້ນເຊີງ ແລ້ວໃຫ້ໜ່ວຍແພດເກັບຕົວຢ່າງເຄື່ອນທີ່ສາມາດຊອກຄົ້ນຫາກໍລະນີຕິດເຊື້ອລວມທັງຜູ້ສຳຜັດໃກ້ຊິດໄດ້ໂດຍໄວ ເພື່ອນຳເອົາເຂົາເຈົ້າເຫຼົ່ານັ້ນເຂົ້າໃນສູນຈຳກັດບໍລິເວນ.