ກວດເບິ່ງ 5 ກໍລະນີຕິດເຊື້ອ ໃນຊຸມຊົນນະຄອນຫຼວງວຽງຈັນ ວັນທີ 27 ສິງຫາ

242

ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ພ້ອມດ້ວຍທ່ານ ດຣ ຄຳພົ້ວ ສຸດທິສົມບັດ ຫົວໜ້າກົມປິ່ນປົວ ແລະ ຟື້ນຟູໜ້າທີ່ການ ຕາງໜ້າຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ ໂຄວິດ-19  ຖະແຫຼງຂ່າວປະຈຳວັນ ທີ 27 ສິງຫາ 2021ທີ່ກະຊວງສາທາລະນະສຸກ.

ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກ່າວວ່າ: ໃນວັນທີ 26 ສິງຫາ 2021 ໄດ້ກວດວິເຄາະທັງໝົດ 3.740 ຄົນ ກວດພົບຜູ້ຕິດເຊື້ອໃໝ່ ທັງໝົດ 247 ຄົນ ເຊິ່ງຕິດເຊື້ອໃນຊຸມຊົນເຖິງ 103 ຄົນ ເປັນຜູ້ສຳຜັດໃກ້ຊິດນຳຜູ້ຕິດເຊື້ອທີ່ຜ່ານມາ ຄື: ນະຄອນຫຼວງ 5 ຄົນ, ບໍ່ແກ້ວ 29 ຄົນ, ອຸດົມໄຊ 5 ຄົນ, ຫຼວງພະບາງ 4 ຄົນ, ຫຼວງນໍ້າທາ 18 ຄົນ ແລະ ຢູ່ສະຫວັນນະເຂດ 42 ຄົນ.

ສ່ວນ ກໍລະນີນໍາເຂົ້າ ມີ 144 ຄົນ ຈາກ ນະຄອນຫຼວງ 16 ຄົນ, ຄຳມ່ວນ 14 ຄົນ, ສາລະວັນ 25 ຄົນ, ສະຫວັນນະເຂດ 52 ຄົນ, ຈຳປາສັກ 36 ຄົນ ແລະ ບໍ່ແກ້ວ 1 ຄົນ ເຊິ່ງກວດພົບຈາກແຮງງານລາວ ທີ່ກັບມາແຕ່ປະເທດເພື່ອນບ້ານ ເຂົ້າຕາມຈຸດຜ່ານແດນສາກົນ.ມາຮອດມື້ນີ້ ພວກເຮົາມີຕົວເລກຜູ້ຕິດເຊື້ອສະສົມທັງໝົດ 14.351 ຄົນ, ຄົນເຈັບເສຍຊີວິດສະສົມ 12 ຄົນ(ໃໝ່0) ແລະ ຄົນເຈັບກໍາລັງປິ່ນປົວ ທັງໝົດ 4.928 ຄົນ.

ກໍລະນີ ຕິດເຊື້ອໃນຊຸມຊົນ 5 ຄົນຂອງນະຄອນຫຼວງວຽງຈັນມີຄື: ຜູ້ທີ 1 ເພດຊາຍ ອາຍຸ 40 ປີ, ອາຊີບ ພະນັກງານ ບໍລິສັດຂົນສົ່ງ, ບ້ານຢູ່ຄຳຮຸ່ງ, ເມືອງໄຊທານີ; ຜູ້ທີ 2 ເພດຊາຍ ອາຍຸ 26 ປີ, ອາຊີບ ພະນັກງານ ບໍລິສັດຂົນສົ່ງ, ບ້ານຢູ່ດົງຄຳຊ້າງ, ເມືອງຫາດຊາຍຟອງ; ຜູ້ທີ 3 ເພດຍິງ ອາຍຸ 40 ປີ, ອາຊີບ ແມ່ເຮືອນ, ບ້ານໜອງແຫ້, ເມືອງຫາດຊາຍຟອງ (ເປັນພັນລະຍາຜູ້ຕິດເຊື້ອທີ່ຜ່ານມາ); ຜູ້ທີ 4 ເພດຊາຍ ອາຍຸ 17 ປີ, ອາຊີບ ນັກຮຽນ, ບ້ານໜອງແຫ້ວ ເມືອງຫາດຊາຍຟອງ (ລູກຜູ້ຕິດເຊື້ອທີ່ຜ່ານມາ) ແລະ ຜູ້ທີ 5 ເພດຊາຍ ອາຍຸ 24 ປີ, ອາຊີບ ພະນັກງານໄອທີ ຢູ່ໂຮງແຮມແລນມາກ, ບ້ານຢູ່ໜອງແຫ້ວເມືອງຫາດຊາຍຟອງ.

ສ່ວນຜູ້ຕິດເຊື້ອໃນຊຸມຊົນຢູ່ແຂວງບໍ່ແກ້ວ 29 ຄົນ, ໃນນັ້ນ 3 ກໍລະນີ ແມ່ນມາຈາກບ້ານ ຂອນແກ້ວ, ເມືອງ ຫ້ວຍຊາຍ, ແຂວງ ບໍ່ແກ້ວ ຕິດຈາກກໍລະນີ ທີ່ຢູ່ບ້ານພິບູນທອງ, ເມືອງ ຫ້ວຍຊາຍ, ແຂວງ ບໍ່ແກ້ວ ໃນນັ້ນ ມີ 13 ກໍລະນີ ແມ່ນ ບ້ານຄຸນບົງ, ເມືອງຕົ້ນເຜີ້ງ, ແຂວງບໍ່ແກ້ວ; 8 ກໍລະນີ ແມ່ນ ບ້ານສີເມືອງງາມ, ເມືອງຕົົ້ນເຜີ້ງ, ແຂວງ ບໍ່ແກ້ວ; 2 ກໍລະນີ ແມ່ນ ບ້ານປ່າສັກ, ເມືອງຕົົ້ນເຜີ້ງ, ແຂວງ ບໍ່ແກ້ວ; 3 ກໍລະນີ ແມ່ນ ບ້ານ ກໍ່ສ້າງ, ເມືອງຕົົ້ນເຜີ້ງ, ແຂວງ ບໍ່ແກ້ວ ທັງໝົດ ແມ່ນ ມີການພົວພັນມາຈາກບ້ານ ສີເມືອງງາມ, ເມືອງຕົ້ນເຜີ້ງ ປະຈຸບັນຜູ້ຕິດເຊື້ອໃໝ່ທັງໝົດ ໄດ້ເຂົ້ານອນແຍກປ່ຽວ ແລະ ຮັບການປິ່ນປົວຢູ່ສະຖານທີ່ປິ່ນປົວທີ່ຖືກກຳນົດໄວ້ຂອງແຂວງ.