ສປປ ລາວ ໄດ້ຮັບເຂົ້າສານ 627 ໂຕນ ຈາກລັດຖະບານຍີ່ປຸ່ນ

215

ໃນວັນທີ 23 ສິງຫາ 2021 ທີ່ນະຄອນຫຼວງວຽງຈັນ, ລັດຖະບານຍີ່ປຸ່ນ ໃຫ້ການຊ່ວຍເຫຼືອເຂົ້າສານ ຈໍານວນ 627 ໂຕນ ແກ່ ສປປ ລາວ ເພື່ອຊ່ວຍເຫຼືອແກ່ບັນດາແຂວງສະຫວັນນະເຂດ ແລະ ແຂວງອື່ນໆ ໃນພາກໃຕ້ຂອງປະເທດລາວ ເພື່ອຈະຊ່ວຍຟື້ນຟູຈາກໄພນໍ້າຖ້ວມ ໂດຍມອບຜ່ານໂຄງການອົງການອາຫານໂລກ.

ກ່າວມອບໂດຍ ທ່ານ ທາເກວະກະ ເຄໂຊ ( TAKEWAKA Keizo ) ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ, ກ່າວຮັບໂດຍ ທ່ານ ລີປາວ ຢ່າງ ຮອງລັດຖະມົນຕີ ກະຊວງແຮງງານ ແລະ ສະຫວັດດີການ – ສັງຄົມ, ມີ ທ່ານ Jan Delbaere ຜູ້ຕາງໜ້າ ແລະ ອໍານວຍການອົງການອາຫານໂລກ ປະຈໍາລາວ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ໃນຕົ້ນເດືອນກຸມພາ ປະເທດຍີ່ປຸ່ນ ໄດ້ມອບການຊ່ວຍເຫຼືອ ຈໍານວນ 180 ລ້ານເຢນ ( ປະມານ 1,7 ລ້ານໂດລາສະຫະລັດອາເມຣິກາ ) ໃນໄລຍະເວລາ 2 ປີ ເພື່ອຊ່ວຍເຫຼືອບັນເທົາຜົນກະທົບຈາກເຫດການຝົນຕົກໜັກ ແລະ ໄພນໍ້າຖ້ວມ ໃນເດືອນຕຸລາ 2020 ໃນແຂວງສະຫວັນນະເຂດ ແລະ ບັນດາແຂວງພາກໃຕ້ຂອງ ສປປ ລາວ ໂດຍການຊ່ວຍເຫຼືອຂອງປະຊາຊົນຍີ່ປຸ່ນ, ອົງການອາຫານໂລກໄດ້ຊື້ເຂົ້າ ຈໍານວນ 627 ໂຕນ ໃນຄັ້ງທໍາອິດ ໃຫ້ຜູ້ໄດ້ຮັບຜົນກະທົບ ຈໍານວນ 35.000 ຄົນ, ໃນ 65 ຊຸມຊົນ ໃນບັນດາແຂວງພາກກາງ ແລະ ພາກໃຕ້ຂອງ ສປປ ລາວ.