ສຟລ ເຂົ້າພົບປະລັດຖະມົນຕີ ກະຊວງກະສິກຳ ແລະ ປ່າໄມ້

262

ເມື່ອອາທິດຜ່ານມາ ຄະນະສະມາຄົມເຟີນີເຈີລາວ ( ສຟລ ) ສະໄໝທີ IV ນຳພາໂດຍ ທ່ານ ກອງມາລາ ພົມມາໄລ ປະທານ ສຟລ ໄດ້ເຂົ້າພົບປະຢ້ຽມຢາມ ທ່ານ ເພັດ ພົມພິພັກ ລັດຖະມົນຕີກະຊວງກະສິກຳ ແລະ ປ່າໄມ້, ໃນໂອກາດທີ່ຄັດເລືອກໄດ້ຄະນະ ສຟລ ຊຸດໃໝ່ ແລະ ຫາລືແລກປ່ຽນວຽກງານໃນໄລຍະຜ່ານມາ ພ້ອມກັບການແກ້ໄຂບັນຫາຂໍ້ຄົງຄ້າງໃນຕໍ່ໜ້າ ໂດຍສະເພາະແມ່ນເລື່ອງວັດຖຸດິບ.

May be an image of 1 person, sitting and indoor

ທ່ານ ກອງມາລາ ພົມມາໄລ ໄດ້ລາຍງານໃຫ້ທ່ານລັດຖະມົນຕີກະຊວງກະສິກຳ ແລະ ປ່າໄມ້ ຊາບວ່າ: ສຟລ ແມ່ນອົງການຈັດຕັ້ງໜຶ່ງທາງດ້ານທຸລະກິດໄມ້ ຢູ່ພາຍໃຕ້ການຊີ້ນຳຂອງສະພາການຄ້າ ແລະ ອຸດສາຫະກຳແຫ່ງຊາດ ຖືກສ້າງຕັ້ງຂຶ້ນໃນປີ 2003 ໂດຍມີສະມາຊິກ 100 ກວ່າໂຮງງານຂອບເຂດທົ່ວປະເທດ ເພື່ອຮັກສາ ແລະ ສົ່ງເສີມສິດຜົນປະໂຫຍດອັນຊອບທຳຂອງສະມາຊິກຕາມກົດໝາຍວາງອອກ ແລະເພື່ອເປັນເສນາທິການໃຫ້ແກ່ອົງການຈັດຕັ້ງຂອງລັດຖະບານທີ່ກ່ຽວຂ້ອງໃນການຄຸ້ມຄອງ ອຳນວຍຄວາມສະດວກ ແລະ ຊຸກຍູ້ການເຄື່ອນໄຫວຂອງສະມາຄົມໃຫ້ຖືກຕ້ອງຕາມລະບຽບກົດໝາຍ ສົ່ງເສີມໃຫ້ສະມາຄົມປະກອບສ່ວນເຂົ້າໃນການພັດທະນາເສດຖະກິດ – ສັງຄົມ ແລະ ລົບລ້າງຄວາມທຸກຍາກຂອງປະຊາຊົນ.

May be an image of 3 people, people sitting and indoor

ໃນໂອກາດນີ້ ຄະນະ ສຟລ ໄດ້ສະເໜີເຖິງລັດຖະບານ ຜ່ານທ່ານລັດຖະມົນຕີກະຊວງກະສິກຳ ແລະ ປ່າໄມ້ ບາງບັນຫາສຳຄັນ ຄື: 1. ວັດຖຸດິບກໍຄືໄມ້( ການເຂົ້າເຖິງວັດຖຸດິບ, ການປະມູນໄມ້ຂອງກະຊວງ ຫຼື ລັດຖະບານຈາກແຫຼ່ງຕ່າງໆ ); 2. ສະຖານທີ່ຈັດງານວາງສະແດງສິນຄ້າ ແລະ ຕະຫຼາດຈຳໜ່າຍຜະລິດຕະພັນໄມ້; 3. ມາດຕະຖານຜະລິດຕະພັນໄມ້ ເພື່ອສົ່ງອອກ; 4. ການຕະຫຼາດທັງພາຍໃນ ແລະ ຕ່າງປະເທດ ສຳລັບພາຍໃນແມ່ນຂໍສິດທິພິເສດໃນການເຂົ້າເຖິງການປະມູນວຽກເຟີນີເຈີທີ່ນຳໃຊ້ງົບປະມານລັດຖະບານ ສ່ວນຕ່າງປະເທດຂໍໃຫ້ພາກລັດສ້າງເງື່ອນໄຂຊ່ວຍເຈລະຈາກັບຕ່າງປະເທດໃນການຊື້ – ຂາຍເຟີນີເຈີຈາກລາວ.