ຕະຫຼາດບຶງທາດຫຼວງ ຈັດເທສະການສົ່ງເສີມໂຄງການ ອາຫານທະເລ ສ້າງຄວາມໝັ້ນໃຈໃຫ້ແກ່ຜູ້ບໍລິໂພກ

174

ລະຫວ່າງວັນທີ 20 – 22 ສິງຫາຜ່ານມາ ທີ່ຕະຫຼາດບຶງທາດຫຼວງ ເມືອງໄຊເສດຖາ ນະຄອນຫຼວງວຽງຈັນ ສຳນັກງານສົ່ງເສີມການຄ້າໃນຕ່າງປະເທດ ຣາຊະອານາຈັກໄທ ທີ່ນະຄອນຫຼວງວຽງຈັນ ຮ່ວມກັບຕະຫຼາດບຶງທາດຫຼວງ ໄດ້ຈັດກິດຈະກຳປະຊາສຳພັນ ຄວາມປອດໄພຂອງການບໍລິໂພກອາຫານທະເລ ບໍ່ມີການປົນເປື້ອນໂຄວິດ – 19.

ມີ ທ່ານ ເຈດສະດາ ກະຕະເວທິນ ເອກອັກຄະຣາຊະທູດຣາຊະອານາຈັກໄທ ປະຈໍາ ສປປ ລາວ, ທ່ານ ພອນປະເສີດ ອິນທະສອນ ປະທານກຸ່ມບໍລິສັດ 3S ຜູ້ສໍາປະທານຕະຫຼາດບຶງທາດຫຼວງ ໂດຍມີພາກລັດ – ທຸລະກິດເຂົ້າຮ່ວມ ເພື່ອສົ່ງເສີມການບໍລິໂພກອາຫານທະເລຢ່າງປອດໄພ, ສະອາດ, ສົດ ແລະ ສ້າງຄວາມໝັ້ນໃຈໃຫ້ແກ່ຜູ້ບໍລິໂພກ ເຖິງຄວາມປອດໄພຂອງອາຫານທະເລ ຕັ້ງແຕ່ແຫຼ່ງທີ່ມາຈົນເຖິງຂະບວນການເກັບຮັກສາ ແລະ ຂົນສົ່ງ.

ທ່ານ ພອນປະເສີດ ອິນທະສອນ ກ່າວວ່າ: ການຈັດງານດັ່ງກ່າວ ເພື່ອສົ່ງເສີມໃຫ້ຜູ້ປະກອບການໄດ້ນໍາສິນຄ້າອາຫານທະເລ ມາວາງຈໍາໜ່າຍ ເພື່ອເຮັດໃຫ້ຜູ້ບໍລິໂພກໄດ້ມີໂອກາດເຂົ້າເຖິງອາຫານທະເລສົດ, ດີ, ລາຄາຖືກຢູ່ໃນຈຸດດຽວ.