ປະຊາຊົນເມືອງຕະໂອ້ຍ ໄດ້ມີໂຮງໝໍນ້ອຍຫຼັງໃໝ່

228

ພິທີດັ່ງກ່າວໄດ້ຈັດຂຶ້ນໃນວັນທີ 9 ສິຫາ 2021 ໂດຍການເຂົ້າຮ່ວມຂອງ ທ່ານ ດຣ. ຄຳຄ້າຍ ຄຳສິງສະຫວັດ ຮອງຫົວໜ້າພະແນກສາທາລະນະສຸກແຂວງ, ທ່ານ ເພັດສະໝອນ ຫຼວງລາດ ຮອງເຈົ້າເມືອງຕະໂອ້ຍ ຜູ້ຊີ້ນຳວຽກງານວັດທະນະທຳ – ສັງຄົມ ແລະ ທ່ານ ເພັງພະຈັນ ພົນອາສາ ຫົວໜ້າຫ້ອງການບໍລິຫານອົງການແຟຣນສາກົນ ປະຈຳ ແຂວງສາລະວັນ, ມີບັນດາທ່ານຫົວໜ້າຫ້ອງການສາທາເມືອງ, ພະນັກງານວິຊາການແພດໝໍ, ບໍລິສັດ, ອຳນາດການປົກຄອງ ແລະ ພໍ່ແມ່ປະຊາຊົນເຂົ້າຮ່ວມ.

May be an image of 2 people

ເພື່ອເປັນການເຮັດໃຫ້ປະຊາຊົນໄດ້ເຂົ້າເຖິງການບໍລິການດ້ານສາທາລະນະສຸກ ແລະ ມີສຸຂະພາບທີ່ດີຂຶ້ນເທື່ອລະກ້າວ ໂດຍສະເພາະກໍແມ່ນໃນ 4 ບ້ານ ຄື: ຕຸງຊະ, ທົ່ງກາໄຕ້, ທົ່ງກາໄຮ່ ແລະ ບ້ານປະໂສມ ເຊິ່ງມີປະຊາກອນທັງໝົດ 1.752 ຄົນ ຍິງ 870 ຄົນ, ມີ 227 ຫຼັງຄາເຮືອນ ແລະ 316 ຄອບຄົວ.

ໂຮງໝໍນ້ອຍແຫ່ງນີ້ແມ່ນຕັ້ງຢູ່ບ້ານທົ່ງກາໄຮ່ ໄດ້ລົງມືກໍ່ສ້າງໃນວັນທີ 24 ກຸມພາ 2020 ແລະ ໄດ້ສຳເລັດ 100% ໃນວັນທີ 4 ສິງຫາ 2021, ຮັບເໝົາກໍ່ສ້າງໂດຍບໍລິສັດເທບໄກສອນ ກໍ່ສ້າງຈຳກັດຜູ້ດຽວ, ເປັນອາຄານຊັ້ນດຽວ, ອາຄານຫຼັງນີ້ມີ ຄວາມຍາວ 22,4 ແມັດ ແລະ ກວ້າງ 12,8 ແມັດ, ມີ 10 ຫ້ອງບໍລິການ, ພ້ອມທັງຕິດຕັ້ງລະບົບນໍ້າ – ໄຟຟ້າ, ( ໄຟສຸກເສີນ ) ແລະ ມີຕູ້ໃສ່ເອກະສານ, ຕູ້ໃສ່ອາຫານ, ໂຕະ, ຕັ້ງ – ຕຽງ, ຊຸດບ່ອນນອນ ແລະ ອຸປະກອນການແພດ ຈຳນວນ 40 ກວ່າລາຍການ, ໃນ 10 ຫ້ອງບໍລິການ ເຊິ່ງມີມູນຄ່າທັງໝົດ 700 ລ້ານກວ່າກີບ.

ທີ່ປະຊຸມກໍໄດ້ມີການເຊັນບົດບັນທຶກມອບ – ຮັບລະຫວ່າງອົງການແຟຣນ ກັບ ພະແນກສາທາລະນະສຸກແຂວງ ເພື່ອມອບຕໍ່ໃຫ້ກັບອຳນາດການປົກເມືອງ ແລະ ສາທາລະນະສຸກເມືອງນຳໃຊ້ເຂົ້າໃນວຽກງານຕົວຈິງຂອງຕົນເອງ ເປັນຕົ້ນແມ່ນວຽກງານການບໍລິການໃຫ້ກັບພໍ່ແມ່ປະຊາຊົນທີ່ມາໃຊ້ບໍລິການໃນການກວດກາສຸຂະພາບ ແລະ ປິ່ນປົວອື່ນໆ.