ຮອງເຈົ້າເມືອງຫົງສາ ລົງຕິດຕາມກວດກາ ເພ້ຍໄຟທຳລາຍຕົ້ນເຂົ້າປະຊາຊົນເສຍຫາຍ 67 ກວ່າເຮັກຕາ

226

ເມື່ອອາທິດຜ່ານມາ ທ່ານ ຈັນເພັງ ອູ່ທອງຄຳ ຮອງເຈົ້າເມືອງຫົງສາ ແຂວງໄຊຍະບູລີ ແລະ ທ່ານ ພູວົງ ກອງຊັບ ຫົວໜ້າຫ້ອງການກະສິກຳ ແລະ ປ່າໄມ້ເມືອງ ພ້ອມດ້ວຍພະນັກງານວິຊາການຫ້ອງການດັ່ງກ່າວ ໄດ້ລົງຕິດຕາມກວດກາເບິ່ງສະພາບການເກີດເພ້ຍໄຟໃນເຂົ້ານາຂອງປະຊາຊົນຢູ່ຫຼາຍບ້ານພາຍໃນເມືອງ.

ທ່ານ ພູວົງ ກອງຊັບ ຫົວໜ້າຫ້ອງການກະສິກຳ ແລະ ປ່າໄມ້ ເມືອງຫົງສາ ໄດ້ລາຍງານໃຫ້ຮູ້ວ່າ: ປັດຈຸບັນການລະບາດຂອງເພ້ຍໄຟ ( ໃບສີນ້ຳໝາກກ້ຽງ ) ນໍາຕົ້ນເຂົ້ານາຂອງປະຊາຊົນຢູ່ພາຍໃນເມືອງ ແມ່ນມີ 7 ບ້ານ ທີ່ຖືກຜົນກະທົບ ລວມເນື້ອທີ່ນາທີ່ຖືກຜົນກະທົບຈາກການລະບາດຂອງເພ້ຍໄຟ ມີທັງໝົດ 67,86 ເຮັກຕາ.

ທ່ານ ຈັນເພັງ ອູ່ທອງຄຳ ຮອງເຈົ້າເມືອງຫົງສາ ກໍໄດ້ໃຫ້ທິດຊີ້ນຳວ່າ: ເພື່ອບໍ່ໃຫ້ມີການແຜ່ລາມອອກໄປ ເຊິ່ງອາດຈະເຮັດໃຫ້ຜົນຜະລິດຂອງຊາວກະສິກອນຫຼຸດລົງນັ້ນ ໃຫ້ພາກສ່ວນທີ່ກ່ຽວຂ້ອງ ກໍຄືຫ້ອງການກະສິກຳ ແລະ ປ່າໄມ້ເມືອງ, ອົງການປົກຄອງບ້ານ ແລະ ເຈົ້າຂອງນາເຂົ້າ ຈົ່ງພ້ອມກັນເອົາໃຈໃສ່, ຕິດຕາມເຝົ້າລະວັງເກັບກຳຂໍ້ມູນຜົນກະທົບຢ່າງລະອຽດ, ສົ່ງວິຊາການລົງເຄື່ອນໄຫວແນະນຳວິທີການກຳຈັດໃນເບື້ອງຕົ້ນ, ການສີດພົ່ນສານຊີວະພາບກຳຈັດເພ້ຍໄຟ ເພື່ອບໍ່ໃຫ້ແຜ່ລາມອອກໄປສູ່ເຂດອື່ນຕື່ມອີກ.