ເຈົ້າແຂວງຈໍາປາສັກ ປຶກສາຫາລືນໍາໃຊ້ຢາພື້ນເມືອງ ເພື່ອປິ່ນປົວຜູ້ຕິດເຊື້ອພະຍາດໂຄວິດ

346

ທີ່ຫ້ອງວ່າການແຂວງຈຳປາສັກ ໄດ້ປະຊຸມປຶກສາຫາລື ເພື່ອຮັບຮອງໂຄງການນໍາໃຊ້ຢາພື້ນເມືອງ ເພື່ອປິ່ນປົວຜູ້ຕິດເຊື້ອພະຍາດໂຄວິດ – 19 ໃນວັນທີ 6 ສິງຫາ 2021 ຜ່ານມາ ໂດຍການເປັນປະທານຂອງ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ທ່ານ ພອນເທບ ພົນເສນາ ທີ່ປຶກສາວຽກຕ້ານໂຄວິດ – 19 ຢູ່ແຂວງຈຳປາສັກ, ມີພະອາຈານ ຄໍາຕູ້ ອິນທະວົງ ຮອງເຈົ້າຄະນະແຂວງ, ຫົວໜ້າກໍາມາທິການສາທາລະນຸປະການ, ມີຄະນະຊ່ຽວຊານຈາກໂຮງໝໍແຂວງ ແລະ ພະແນກສາທາລະນະສຸກ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

May be an image of 1 person, standing, sitting and indoor

ກອງປະຊຸມດັ່ງກ່າວໄດ້ປຶກສາຫາລື ແລະ ເພື່ອຮັບຮອງໃນການທົດລອງນໍາໃຊ້ຢາພື້ນເມືອງ ເພື່ອປິ່ນປົວຜູ້ຕິດເຊື້ອພະຍາດໂຄວິດ – 19 ຢູ່ແຂວງຈໍາປາສັກ. ຍ້ອນວ່າຈໍານວນຜູ້ຕິດເຊື້ອນັບມື້ເພີ່ມຂຶ້ນ ຢາທີ່ໃຊ້ປິ່ນປົວໂຄວິດ – 19 ແມ່ນມີບໍ່ພຽງພໍ ແລະ ການກິນຢາສະໝຸນໄພລາວ ເພື່ອປິ່ນປົວຄົນເຈັບຕິດເຊື້ອ ແມ່ນຍັງບໍ່ທັນມີການຈັດຕັ້ງປະຕິບັດ ແລະ ສຶກສາຢູ່ໃນປະເທດລາວ ເຊິ່ງຢາພື້ນເມືອງທີ່ຈະນຳໃຊ້ເປັນຢາທີ່ສະກັດຈາກກະຊາຍຂາວ ແລະ ຢາຕົ້ມ.

ທ່ານເຈົ້າແຂວງຈຳປາສັກ ໄດ້ມີຄຳເຫັນໃຫ້ພາກສ່ວນທີ່ກ່ຽວຂ້ອງຕ້ອງຮີບຮ້ອນແຕ່ງຕັ້ງຄະນະຮັບຜິດຊອບ, ກຳນົດການຈັດຕັ້ງປະຕິບັດ, ແບ່ງວຽກຂອງຄະນະຊ່ຽວຊານສ້າງແຜນ ແລະ ກຳນົດຈຸດໃນການປິ່ນປົວ, ເພື່ອການເກັບກຳ ແລະ ວິເຄາະຂໍ້ມູນ ໃຫ້ເຮົາສາມາດຮູ້ໄດ້ເຖິງປະສິດທິຜົນໃນການປິ່ນປົວພະຍາດ.