ເຈົ້າເມືອງຊົນນະບູລີ ລົງຕິດຕາມກວດກາແຮງງານທີ່ສູນ ມສ ໂນນສະຫວ່າງ

251

ທ່ານ ສຸວິໄລ ຫຼວງຊະລາດ ເຈົ້າເມືອງຊົນນະບູລີ ພ້ອມດ້ວຍຄະນະສະເພາະກິດ ປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ – 19 ຂັ້ນເມືອງ ໄດ້ລົງຢ້ຽມຢາມ ແລະ ຕິດຕາມກວດກາແຮງງານທີ່ສູນຈໍາກັດບໍລິເວນ ມສ ໂນນສະຫວ່າງ ພ້ອມທັງມອບເຄື່ອງຊ່ວຍເຫຼືອ ໃນວັນທີ 4 ສິງຫາ 2021.

May be an image of one or more people, grass and tree

ທ່ານ ທອງຄໍາ ແກ້ວອາສາ ຫົວໜ້າຫ້ອງວ່າການປົກຄອງເມືອງ ໄດ້ລາຍງານສະພາບລວມໂດຍຫຍໍ້ຂອງສູນຈໍາກັດບໍລິເວນ ມສ ໂນນສະຫວ່າງ ເຊິ່ງໃຫ້ຮູ້ວ່າ: ສູນ ມສ ໂນນສະຫວ່າງ ໄດ້ເປີດຮັບແຮງງານລາວເຂົ້າມາຈຳກັດບໍລິເວນຕໍ່ຈາກສູນຂອງແຂວງ ເພື່ອຕິດຕາມອາການຕື່ມອີກ 14 ວັນ ນັບແຕ່ວັນທີ 30 ກໍລະກົດເປັນຕົ້ນມາ ຈົນມາຮອດວັນທີ 4 ສິງຫາ ມີແຮງງານເຂົ້າສູນແລ້ວທັງໝົດ 86 ຄົນ ຍິງ 39 ຄົນ, ໃນນັ້ນທາງຄະນະສະເພາະກິດ ແມ່ນໄດ້ສົ່ງຕໍ່ໃຫ້ອໍານາດການປົກຄອງບ້ານກັກກັນຕື່ມອີກ ຈຳນວນ 64 ຄົນ ຍິງ 30 ຄົນ. ໃນປັດຈຸບັນຍັງມີແຮງງານທີ່ຖືກຈໍາກັດບໍລິເວນຢູ່ສູນແຫ່ງນີ້ ຈໍານວນ 22 ຄົນ ຍິງ 9 ຄົນ.

ຈາກນັ້ນ, ທ່ານ ດຣ. ສີໂຫ ທໍາມະບຸນມີ ຫົວໜ້າຫ້ອງການສາທາລະນະສຸກເມືອງ ກໍໄດ້ຂຶ້ນແນະນໍາວິທີການປ້ອງກັນພະຍາດໂຄວິດ – 19 ໃຫ້ກັບແຮງງານທີ່ຖືກກັກກັນໃນສູນ ພ້ອມທັງເນັ້ນໜັກຕື່ມອີກວ່າ: ພາຍຫຼັງຈໍາກັດບໍລິເວນຄົບ 14 ວັນແລ້ວ ໃຫ້ບັນດາທ່ານເຂົ້າໄປພົວພັນລົງທະບຽນ ເພື່ອຮັບການສັກວັກແຊັງທີ່ໂຮງໝໍເມືອງຊົນນະບູລີ.