JDB ມອບເງີນສະໜັບສະໜູນ ໃຫ້ນະຄອນຫຼວງວຽງຈັນ 100 ລ້ານກີບ ເພື່ອຕ້ານໂຄວິດ-19

225

ໃນວັນທີ 10 ພຶດສະພາ 2021 ນີ້, ຢູ່ທີ່ຫ້ອງການປົກຄອງ ນະຄອນຫຼວງວຽງຈັນ ທ່ານ ວິໄລ ສີພະພອນ ຜູ້ອຳນວຍການໃຫຍ່ທະນາຄານຮ່ວມພັດທະນາ (JDB) ພ້ອມດ້ວຍ ທ່ານ ປອ. ບົວວອນ ຈັນທະນີເລີດ ຫົວໜ້າຫ້ອງການທະນາຄານຮ່ວມພັດທະນາ ໄດ້ນໍາເອົາເງິນສົດ ຈໍານວນ 100.000.000 ກີບ ໄປມອບໃຫ້ນະຄອນຫຼວງວຽງຈັນ ເພື່ອນໍາໃຊ້ເຂົ້າໃນວຽກງານຕ້ານ ແລະ ສະກັດກັ້ນການແຜ່ລະບາດ ຂອງພະຍາດໂຄວິດ-19 ເປັນກຽດກ່າວຮັບໂດຍ ທ່ານ ພູວົງ ວົງຄໍາຊາວ ຮອງເຈົ້າຄອງນະຄອນຫຼວງວຽງຈັນ ຫົວໜ້າສະເພາະກິດ ປ້ອງກັນ,ຄວບຄຸມ ແລະ ແກ້ໄຂການແຜ່ລະບາດ ຂອງພະຍາດໂຄວິດ-19 ນະຄອນຫຼວງວຽງຈັນ

ໂອກາດດັ່ງກ່າວທ່ານຮອງເຈົ້າຄອງນະຄອນຫຼວງວຽງຈັນ ໄດ້ສະແດງຄວາມຂອບໃຈເປັນຢ່າງສູງ ມາຍັງປະທານສະພາ ບໍລິຫານທະນາຄານຮ່ວມພັດທະນາ ທີ່ໄດ້ມີນໍ້າໃຈອັນສູງສົ່ງ ເຫັນໄດ້ຄວາມຈໍາເປັນ ໃນການຕ້ານການແຜ່ລະບາດຂອງພະຍາດໂຄວິດ-19 ແລະ ໃຫ້ການຊ່ວຍເຫຼືອນະຄອນຫຼວງວຽງຈັນ, ເຊີ່ງເປັນການປະກອບສ່ວນທີ່ສໍາຄັນໃນການສະໜັບສະໜູນແຜນປະຕິບັດງານຂອງຄະນະສະເພາະກິດເພື່ອຄວບຄຸມ ແລະ ຕ້ານການລະບາດຂອງພະຍາດ ໂຄວິດ-19 ຂັ້ນນະຄອນຫຼວງວຽງຈັນ ເພື່ອສ້າງຄວາມເຂັ້ມແຂງໃນການປ້ອງກັນ ການແຜ່ລະບາດຂອງພະຍາດໂຄວິດ-19 ໃຫ້ມີມີປະສິດທິຜົນ

ໃນຕອນທ້າຍທ່ານຍັງໄດ້ອວຍພອນໃຫ້ທຸລະກິດ ຂອງທະນາຄານຮ່ວມພັດທັດທະນາ ໃຫ້ມີຄວາມຈະເລີນຮຸ່ງເຮືອງຂື້ນໄປເລື້ອຍໆ ພ້ອມມອບໃບຍ້ອງຍໍໃຫ້ປະທານສະພາ ບໍລິຫານທະນາຄານຮ່ວມພັດທະນາ ທີ່ໄດ້ມີນໍ້າໃຈອັນສູງສົ່ງປະກອບສ່ວນເຂົ້າໃນການຕ້ານການແຜ່ລະບາດຂອງພະຍາດໂຄວິດ-19