JDB ມອບເງີນສະໜັບສະໜູນ ໃຫ້ກະຊວງປ້ອງກັນປະເທດ ເພື່ອຕ້ານໂຄວິດ-19

420

ໃນວັນທີ 10 ພຶດສະພາ 2021 ຢູ່ທີ່ກະຊວງປ້ອງກັນປະເທດ ທ່ານ ວິໄລ ສີພະພອນ ຜູ້ອຳນວຍການໃຫຍ່ທະນາຄານຮ່ວມພັດທະນາ (JDB) ພ້ອມດ້ວຍ ທ່ານ ປອ.ບົວວອນ ຈັນທະນີເລີດ ຫົວໜ້າຫ້ອງການທະນາຄານຮ່ວມພັດທະນາໄດ້ນໍາເອົາເງິນສົດຈໍານວນ 300.000.000 ກີບໄປມອບໃຫ້ກະຊວງປ້ອງກັນປະເທດ ເພື່ອນໍາໃຊ້ເຂົ້າໃນວຽກງານຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ໂດຍສະເພາະແມ່ນຊຸກຍູ້ກໍາລັງປະກອບອາວຸດປ້ອງກັນຊາດທີ່ພວມປະຕິບັດໜ້າທີ່ຕາມພາລະບົດບາດຂອງຕົນ ໃນການປະກອບສ່ວນເຂົ້າໃນການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຕາງໜ້າກະຊວງປ້ອງກັນປະເທດ ກ່າວຮັບໂດຍ ທ່ານ ພົນຕີ ວົງຄໍາ ພົມມະກອນ ຮອງລັດຖະມົນຕີກະຊວງປ້ອງກັນປະເທດ ຫົວໜ້າສະເພາະກິດ ການປ້ອງກັນ ແລະ ສະກັດກັ້ນພະຍາດໂຄວິດ-19 ຂອງກະຊວງປ້ອງກັນປະເທດ ພ້ອມດ້ວຍຄະນະ

ໂອກາດນີ້, ທ່ານ ພົນຕີ ວົງຄໍາ ພົມມະກອນ ກໍ່ໄດ້ສະແດງຄວາມຂອບໃຈ ແລະ ຊົມເຊີຍ ຕໍ່ ທ່ານ ວິໄລ ສີພະພອນ ພ້ອມດ້ວຍຄະນະ ທີ່ໄດ້ມອບເງິນຊ່ວຍເຫຼືອກະຊວງປ້ອງກັນປະເທດໃນຄັ້ງນີ້ ເພື່ອນຳໃຊ້ເຂົ້າໃນວຽກງານປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ໃນຄັ້ງນີ້

ໃນໂອກາດນີ້, ທ່ານຮອງລັດຖະມົນຕີກະຊວງປ້ອງກັນປະເທດ ຍັງໄດ້ຮຽກຮ້ອງມາຍັງຄະນະອຳນວຍການ ຕະຫຼອດຮອດພະນັກງານ ຂອງທະນາຄານດັ່ງກ່າວ ຈົ່ງພ້ອມກັນກັບທຸກພາກສ່ວນໃນສັງຄົມ ເພີ່ມທະວີຄວາມເປັນຈິດໜຶ່ງໃຈດຽວກັນ ໃນການເປັນເຈົ້າການ ປະຕິບັດບັນດາມາດຕະການປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢ່າງເຂັ້ມງວດ ໂດຍເລີ່ມຈາກຄວາມເປັນເຈົ້າການຂອງຕົນເອງ, ຄອບຄົວ, ຊຸມຊົນ ແລະ ການຈັດຕັ້ງທຸກຂັ້ນ ເພື່ອປະກອບສ່ວນເຮັດໃຫ້ສາມາດຄວບຄຸມການແຜ່ລະບາດຂອງພະຍາດໂຄວິດ-19 ຄັ້ງນີ້ ໄດ້ໂດຍໄວ ແລະ ທ່ານຍັງອວຍພອນໃຫ້ທຸລະກິດ ຂອງທະນາຄານຮ່ວມພັດທະນາ ໃຫ້ມີຄວາມຈະເລີນຮຸງເຮືອງຂື້ນໄປເລື້ອຍ