JDB ມອບເຄື່ອງຊ່ວຍເຫຼືອ ມູນຄ່າ 400 ລ້ານກີບ ໃຫ້ກະຊວງສາທາລະນະສຸກ ເພື່ອຕ້ານໂຄວິດ-19

261

ໃນວັນທີ 10 ພຶດສະພາ 2021, ຢູ່ທີ່ກະຊວງສາທາລະນະສຸກ ທ່ານ ວິໄລ ສີພະພອນ ຜູ້ອຳນວຍການໃຫຍ່ ທະນາຄານຮ່ວມພັດທະນາ (JDB) ພ້ອມດ້ວຍ ທ່ານ ປອ. ບົວວອນ ຈັນທະນີເລີດ ຫົວໜ້າຫ້ອງການທະນາຄານຮ່ວມພັດທະນາ ໄດ້ນໍາເອົາອຸປະກອນການແພດມູນຄ່າ 400.000.000 ກີບ ໄປມອບໃຫ້ກະຊວງສາທາລະນະສຸກ ເຊີ່ງປະກອບມີ ຊຸດເຄື່ອງນຸ່ງປ້ອງກັນສໍາລັບແພດໝໍ ຈໍານວນ 1,500 ຊຸດ ແລະ ຖົງມືການແພດຈໍານວນ 5,000 ຄູ່ ເພື່ອນໍາໃຊ້ເຂົ້າໃນວຽກງານຕ້ານ ແລະ ສະກັດກັ້ນການແຜ່ລະບາດ ຂອງພະຍາດໂຄວິດ-19 ເປັນກຽດກ່າວຮັບໂດຍ ທ່ານ ປອ ດຣ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ຮອງຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19

ໂອກາດດັ່ງກ່າວ ທ່ານ ລັດຖະມົນຕີກະຊວງສາທາລະນະສຸກ ໄດ້ສະແດງຄວາມຂອບໃຈເປັນຢ່າງສູງ ມາຍັງປະທານສະພາບໍລິຫານທະນາຄານຮ່ວມພັດທະນາ ທີ່ໄດ້ມີນໍ້າໃຈອັນສູງສົ່ງ ເຫັນໄດ້ຄວາມຈໍາເປັນໃນການຕ້ານການແຜ່ລະບາດຂອງພະຍາດໂຄວິດ-19 ແລະ ໃຫ້ການຊ່ວຍເຫຼືອທາງດ້ານອຸປະກອນການແພດ ໃຫ້ແກ່ກະຊວງສາທາລະນະສຸກ ເຊີ່ງພວມປະເຊີນໜ້າກັບການແຜ່ລະບາດຂອງພະຍາດໂຄວິດ-19 ເປັນການປະກອບສ່ວນທີ່ສໍາຄັນ ໃນການສະໜັບສະໜູນແຜນປະຕິບັດງານຂອງຄະນະສະເພາະກິດ ເພື່ອຄວບຄຸມ ແລະ ຕ້ານການລະບາດຂອງພະຍາດ ໂຄວິດ-19 ເພື່ອສ້າງຄວາມເຂັ້ມແຂງໃນການປ້ອງກັນ ການແຜ່ລະບາດຂອງພະຍາດໂຄວິດ-19 ໃຫ້ມີປະສິດທິຜົນ

ທ່ານຍັງໄດ້ອວຍພອນໃຫ້ທຸລະກິດ ຂອງທະນາຄານຮ່ວມພັດທັດທະນາ ໃຫ້ມີຄວາມຈະເລີນຮຸ່ງເຮືອງຂື້ນໄປເລື້ອຍ.