ທະນາຄານ JDB ສະຫຼຸບຜົນງານ ປີ 2020 ແລະ ແຈກໂຊກລົດໃຫຍ່ໃຫ້ລູກຄ້າເປັນ ຄັນທີ 5

512

ໃນວັນທີ 30 ມັງກອນ 2021 ຜ່ານມາ ທີ່ໂຮງແຮມແລນມາກ, ນະຄອນຫຼວງວຽງຈັນ ທະນາຄານຮ່ວມພັດທະນາ ຫຼື JDB ໄດ້ຈັດກອງປະຊຸມສະຫຼຸບຜົນງານການດໍາເນີນທຸລະກິດທະນາຄານຮ່ວມພັດທະນາ ປະຈຳປີ 2020 ແລະ ແຜນການປີ 2021 ໂດຍການເປັນປະທານຂອງ ທ່ານ ເອກະພັນ ພະພິທັກ ປະທານສະພາບໍລິຫານ ທະນາຄານຮ່ວມພັດທະນາ ແລະ ຜູ້ອໍານວຍການໃຫຍ່, ມີຄະນະອໍານວຍການ, ຄະນະພະແນກ , ຕະຫຼອດຮອດພະນັກງານທັງໝົດທີ່ມາຈາກທົ່ວປະເທດ 600 ກວ່າຄົນເຂົ້າຮ່ວມ

ກອງປະຊຸມໄດ້ຜ່ານບົດສະຫຼຸບປີ 2020  ແລະ ວາງແຜນການປີ 2021 ເຊິ່ງໄດ້ມີການຍ້ອງຍໍ ໜ່ວຍບໍລິການທີ່ມີຜົນງານດີເດັ່ນ ໄດ້ຮັບລາງວັນໂລ້ຄໍາ ຈໍານວນ 3 ລາງວັນ ແລະ ຍ້ອງຍໍ ໜ່ວຍບໍລິການທີ່ມີຜົນງານດີເດັ່ນ ໄດ້ຮັບລາງວັນ ໂລເງິນ 12 ລາງວັນ ແລະ ໂລ້ລາງວັນ JDB ປະເພດ I 18 ລາງວັນ, ໂລ້ລາງວັນ JDB ປະເພດ II 9 ລາງວັນ, ໂລ້ລາງວັນ JDB ປະເພດ III 18 ລາງວັນ  ໃຫ້ນັກງານຜູ້ທີ່ມີຜົນງານດີເດັ່ນ ໃນການປະກອບສ່ວນເຂົ້າວຽກງານ ແລະ ປັບປຸງການຈັດຕັ້ງຂອງທະນາຄານຮ່ວມພັດທະນາ ໃຫ້ມີກຳລັງໃຈ ແລະ ຕັ້ງໜ້າປະຕິບັດວຽກງານໃຫ້ດີກວ່າເກົ່າ

ປີ 2020 ຖືວ່າເປັນປີທີ່ມີຜົນງານພົ້ນເດັ່ນຫຼາຍດ້ານ ແລະ ກໍ່ເປັນປີທີ່ມີຄວາມໝາຍສໍາຄັນຂອງທະນາຄານ JDB ຄົບຮອບ 31 ປີ ແລະ ເປັນປີທີ່ມີຜົນກໍາໄລຢ່າງໜ້າພໍໃຈ, ໄດ້ມອບອາກອນກໍາໄລລ່ວງໜ້າໃຫ້ລັດຖະບານໄປແລ້ວໃນເມື່ອບໍ່ດົນມານີ້. ປັດຈຸບັນ ທະນາຄານ JDB ມີໜ່ວຍບໍລິການ ທັງໝົດ 60 ໜ່ວຍ ແລະ ຈະຂະຫຍາຍອີກ 8 ໜ່ວຍ ໃນຂອບເຂດທົ່ວປະເທດ ໂດຍທີ່ຜ່ານມາທາງທະນາຄານໄດ້ປັບປຸງພັດທະນາ ອອກຜະລິດຕະພັນໃໝ່ ເພື່ອສະໜອງຄວາມຕ້ອງການລູກຄ້າ ເຊິ່ງໄດ້ຮັບຄວາມນິຍົມ ແລະ ປະທັບໃຈຈາກສັງຄົມເຊັ່ນວ່າ: ສິນເຊື່ອເພື່ອພະນັກງານລັດຖະກອນ,  ສິນເຊື່ອເພື່ອການສຶກສາ, ສິນເຊື່ອຫັນຊັບເປັນທຶນ, ສິນເຊື່ອຊຸກຍູ້ສັ່ງເສີມ SME ແລະ ສິນເຊື່ອທຸລະກິດລູກຄ້າລາຍໃຫຍ່

ພ້ອມດຽວກັນນັ້ນ, ທະນາຄານສໍາເລັດອອກຜະລິດຕະພັນ ເຮັດທຸລະກໍາທາງການເງິນຜ່ານມືຖື ( Mobile Banking ) ຫຼື JDB Yes ແລະ Yes pay ( QR Code ) ອອກຜະລິດຕະພັນໃໝ່ເຊັ່ນ: ອອກບັດ ATM Union Pay ບັດ VISA Debit , ບັດ VISA Credit ແລະ ແອັບ JDB Yes ກໍສາມາດ ຊໍາລະຄ່ານໍ້າປະປາ, ຄ່າໄຟຟ້າ ແລະ ສາມາດໂອນເງິນຂ້າມທະນາຄານໄດ້ເທີງມືຖື. ນອກຈາກນີ້, ໄດ້ເຂົ້າຮ່ວມຫຼາຍໂຄງການກັບທະນາຄານອື່ນເຊັ່ນ: ການຊໍາລະພາສີທີ່ດິນ, ເສຍຄ່າທາງລົດປະຈໍາປີ, ປະກອບສ່ວນແກ້ໄຂຊີວິດການເປັນຢູ່, ເສີມສ້າງເສດຖະກິດຄອບຄົວຂອງພະນັກງານ-ລັດຖະກອນ ໃຫ້ທີ່ດີຂື້ນ ໂດຍການຕອບສະໜອງສິນເຊື່ອພະນັກງານໂດຍບໍ່ມີຫຼັກຊັບຄໍ້າປະກັນໃຫ້ແກ່ພະນັກງານ-ລັດຖະກອນ ທີ່ເບີກຈ່າຍເງິນເດືອນຜ່ານ ທະນາຄານ JDB ແລະ ທະນາຄານ ການຄ້າຕ່າງປະເທດລາວມະຫາຊົນ. ນອກຈາກນັ້ນຍັງໄດ້ ປ່ອຍສິນເຊື່ອ ເຂົ້າໃນການສ້າງສາເສດຖະກິດ-ສັງຄົມ ກໍ່ຄືການກໍ່ສ້າງພື້ນຖານໂຄງລ່າງຂອງປະເທດແລະ ໃນແຜນການປີ 2021 ທະນາຄານ JDB ວາງແຜນອອກແຮງສູ້ຊົນສ້າງຜົນກໍາໄລ ໃຫ້ບັນລຸເປົ້າໝາຍທີ່ວາງໄວ້ ເພື່ອປະກອບສ່ວນໃນການສ້າງສາພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງ ໂດຍໄປຕາມຄໍາຂວັນຂອງທະນາຄານຄື “ ເຕີບໃຫ່ຍໄປພ້ອມກັນ ”

ທັງນີ້, ໃນພາກຄໍ່າຂອງວັນດຽວກັນ ກໍ່ໄດ້ມີງານລ້ຽງຊົມເຊີຍຜົນງານປະຈໍາປີ 2020 ແລະ ຊົມເຊີຍຜົນສໍາເລັດ ການດໍາເນີນທຸລະກິດຂອງ ທະນາຄານຮ່ວມພັດທະນາ ແລະ ງານຈົກສະຫຼາກ ມອບລາງວັນລົດໃຫຍ່ TOYOTA Land Cruiser ເພື່ອກໍາໄລໃຫ້ລູກຄ້າທີ່ຝາກເງິນນໍາທະນາຄານ ໃຫ້ມີຄວາມພາກພູມໃຈ ເຊີ່ງປີນີ້ ເປັນຄັນທີ່ 5 ທີ່ JDB ຄືນກຳໄລໃຫ້ລູກຄ້າ ໂດຍໃຫ້ກຽດ ຈົກສະຫຼາກໂດຍ ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ