ປີ 2020 ດ່ານພາສີສາກົນປາກຊັນ ເກັບລາຍຮັບໄດ້ 201 ຕື້ກວ່າກີບ

135

ປີ 2020 ດ່ານພາສີສາກົນປາກຊັນ ສາມາດປະຕິບັດໄດ້ 201 ຕື້ກວ່າກີບ ເທົ່າກັບ 91,33% ຂອງແຜນດັດແກ້. ສ່ວນປີ 2021 ຈະສູ້ຊົນເກັບລາຍຮັບໃຫ້ໄດ້ຕາມແຜນທີ່ວາງໄວ້ໃນຄາດໝາຍ 361 ຕື້ກວ່າກີບ.
ທ່ານ ໄຊຊະນະ ວົງຊົມພູ ຮອງຫົວໜ້າດ່ານພາສີສາກົນປາກຊັນ ແຂວງບໍລິຄຳໄຊ

ໃຫ້ສຳພາດວ່າ: ປີ 2020ຜ່ານມາ ດ່ານພາສີສາກົນປາກຊັນໄດ້ຮັບຕົວເລກມອບໝາຍທັງໝົດໃນເບື້ອງຕົ້ນ 280 ຕື້ກວ່າກີບ, ແຕ່ຍ້ອນການລະບາດຂອງພະຍາດໂຄວິດ – 19 ໄດ້ດັດແກ້ແຜນຈັດເກັບລາຍຮັບມາເປັນ 220 ຕື້ກວ່າກີບ, ຜ່ານການຈັດຕັ້ງປະຕິບັດຈັດເກັບລາຍຮັບໝົດປີ 2020 ສາມາດປະຕິບັດໄດ້ 201 ຕື້ກວ່າກີບ, ຖ້າທຽບໃສ່ແຜນປີໃນເບື້ອງຕົ້ນ ເທົ່າກັບ 71,97%, ຖ້າທຽບໃສ່ແຜນການດັດແກ້ ເທົ່າກັບ 91,33%.

ສາເຫດ ແລະ ປັດໄຈທີ່ບໍ່ສາມາດເກັບລາຍຮັບໄດ້ຕາມແຜນແມ່ນມາຈາກການວາງຕົວເລກສູງເກີນໄປທັງຕົວເລກໃນເບື້ອງຕົ້ນ ແລະ ຕົວເລກແຜນດັດແກ້, ຖ້າທຽບໃສ່ຖານລາຍຮັບຂອງດ່ານ, ການນຳເຂົ້າພາຫະນະໃໝ່, ນໍ້າມັນເຊື້ອໄຟຫຼຸດລົງ, ຍ້ອນນິຕິກຳມີການປ່ຽນແປງ ເປັນຕົ້ນແມ່ນກົດໝາຍວ່າດ້ວຍອາກອນຊົມໃຊ້ ສະບັບປັບປຸງ, ການປະຕິບັດແຜນຫຼຸດຜ່ອນອັດຕາພາສີໃນຂອບຮ່ວມມືອາຊຽນ ແລະ ຂອບສັນຍາຮ່ວມມືຕ່າງໆທີ່ ສປປ ລາວ ເຂົ້າຮ່ວມ.

ນອກນັ້ນ, ການນຳເຂົ້າສິນຄ້າ, ເຄື່ອງອຸປະໂພກ – ບໍລິໂພກຕາມນະໂຍບາຍສົ່ງເສີມການລົງທຶນ ເຊິ່ງໄດ້ຮັບການຍົກເວັ້ນພາສີ – ອາກອນ, ຍ້ອນການລະບາດຂອງພະຍາດໂຄວິດ – 19 ເຮັດໃຫ້ຜູ້ປະກອບການທຸລະກິດໄດ້ຢຸດຕິນຳເຂົ້າ – ສົ່ງອອກບາງສິນຄ້າ ຈຶ່ງເຮັດໃຫ້ດ່ານສາກົນປາກຊັນ ບໍ່ສາມາດຈັດເກັບໄດ້ຕາມແຜນການທີ່ວາງໄວ້.

ທ່ານ ໄຊຊະນະ ວົງຊົມພູ ໃຫ້ຮູ້ຕື່ມອີກວ່າ: ປີ 2021 ຈະສູ້ຊົນເກັບລາຍຮັບໃຫ້ໄດ້ຕາມແຜນທີ່ວາງໄວ້ໃນຄາດໝາຍ 361 ຕື້ກວ່າກີບ ໂດຍຈະເພີ່ມທະວີການສຶກສາອົບຮົມການເມືອງແນວຄິດໃຫ້ພະນັກງານ, ສະມາຊິກພັກ, ເພີ່ມທະວີຄວາມເຂັ້ມງວດ, ຕິດຕາມ ແລະ ກວດກາການປະຕິບັດໜ້າທີ່ຂອງພະນັກງານທຸກພາກສ່ວນ, ແບ່ງຄວາມຮັບຜິດຊອບນັບແຕ່ຄະນະດ່ານ, ໜ່ວຍງານລວມເຖິງພະນັກງານວິຊາການ, ເອົາໃຈໃສ່ຕິດຕາມກວດກາ – ຄຸ້ມຄອງການເສຍພາສີໃຫ້ຖືກຕ້ອງ, ຊອກຫາຖານຂໍ້ມູນລາຍຮັບທີ່ເປັນທ່າແຮງບົ່ມຊ້ອນ, ສືບຕໍ່ປຸກລະດົມ, ຊຸກຍູ້ຜູ້ປະກອບການໃຫ້ປະຕິບັດມອບພັນທະເຂົ້າງົບປະມານ, ສືບຕໍ່ໂຄສະນາເຜີຍແຜ່ກົດໝາຍພາສີ, ມະຕິຄໍາສັ່ງຕ່າງໆກ່ຽວກັບພາສີໃຫ້ຜູ້ປະກອບການ ແລະ ບຸກຄົນ ເພື່ອພ້ອມກັນນໍາໄປຈັດຕັ້ງປະຕິບັດໃຫ້ມີປະສິດທິຜົນ.

[ ຂ່າວ: ກະຊວງການເງິນ ]