5 ປີ ເສດຖະກິດແຫ່ງຊາດ ຂະຫຍາຍຕົວສະເລ່ຍ 5,8% ລາຍໄດ້ຕໍ່ຄົນບັນລຸ 2.664 ໂດລາ ໃນປີ 2020

264

ໃນໄລຍະ 5 ປີຜ່ານມາ ເສດຖະກິດແຫ່ງຊາດ ຂະຫຍາຍຕົວສະເລ່ຍຢູ່ໃນລະດັບ 5,8% ຕໍ່ປີ, ລາຍໄດ້ສະເລ່ຍຕໍ່ຄົນຄາດວ່າຈະເພີ່ມຂຶ້ນເປັນ 2.664 ໂດລາ ໃນປີ 2020, ການສົ່ງອອກບັນລຸ 26.429 ລ້ານໂດລາ, ອັດຕາຄວາມທຸກຍາກມີທ່າອ່ຽງຫຼຸດລົງ.

ສະຫາຍ ທອງລຸນ ສີສຸລິດ ກຳມະການກົມການເມືອງສູນກາງພັກ, ນາຍົກລັດຖະມົນຕີ ໄດ້ລາຍງານຕໍ່ກອງປະຊຸມ   ໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນ ປະຕິວັດລາວ ໃນວັນທີ 13 ມັງກອນ 2021 ວ່າ: ໃນຕະຫຼອດໄລຍະການຈັດຕັ້ງປະຕິບັດແຜນ 5 ປີ ຄັ້ງທີ VIII ທີ່ຜ່ານມາ ແມ່ນປະສົບກັບສະພາບແວດລ້ອມທັງພາຍນອກ ແລະ ພາຍໃນ ທີ່ມີ ຄວາມຫຍຸ້ງຍາກ ແລະ ມີເຫດການທີ່ບໍ່ຄາດຄິດເກີດຂຶ້ນຫຼາຍຢ່າງ ເຊັ່ນ: ສະພາບພາຍນອກ:  ແມ່ນເສດຖະກິດໂລກມີທ່າອ່ຽງການຂະຫຍາຍຕົວຫຼຸດລົງ, ຄວາມບໍ່ແນ່ນອນຂອງລາຄານໍ້າມັນ ແລະ ລາຄາອາຫານໂລກ, ສົງຄາມການຄ້າຂອງປະເທດມະຫາອຳນາດ, ຄວາມຂັດແຍ່ງທາງການເມືອງ – ການທະຫານ, ການລະບາດຂອງພະຍາດໂຄວິດ – 19 ໃນທົ່ວໂລກ; ສະພາບພາຍໃນ: ຄວາມຫຍຸ້ງຍາກທາງດ້ານເສດຖະກິດທີ່ສະສົມຜ່ານມາ ເຮັດໃຫ້ເສດຖະກິດມະຫາພາກມີຄວາມບອບບາງ ເປັນຕົ້ນແມ່ນບັນຫາໜີ້ສິນຄຸມເຄືອ, ລາຍຮັບບໍ່ກຸ້ມລາຍຈ່າຍ, ອັດຕາການເຕີບໂຕມີທ່າອ່ຽງຫຼຸດລົງໃນທ້າຍສະໄໝຂອງແຜນການ 5 ປີ ຄັ້ງທີ VIII, ສະພາບໄພພິບັດທໍາມະຊາດພາຍຸ, ໄພແລ້ງ, ເຂື່ອນແຕກ, ການລະບາດຂອງສັດຕູພືດ, ພະຍາດໂຄວິດ – 19 ແລະ ອື່ນໆ.

ในภาพอาจจะมี 1 คน, ดอกไม้

ທັງໝົດໄດ້ກາຍເປັນສິ່ງກົດດັນ ແລະ ຫຼໍ່ແຫຼມ ຕໍ່ການພັດທະນາເສດຖະກິດ – ສັງຄົມຂອງປະເທດເຮົາ; ດັ່ງນັ້ນໃນປີທໍາອິດຂອງແຜນ 5 ປີ ຄັ້ງທີ VIII ລັດຖະບານຈຶ່ງໄດ້ສະເໜີຕໍ່ສະພາແຫ່ງຊາດ ເພື່ອດັດປັບຕົວເລກອັດຕາການຂະຫຍາຍຕົວຂອງເສດຖະກິດໃນ 5 ປີ ລົງຈາກ 7,5% ມາເປັນ 7,2% ແລະ ຕົວເລກມະຫາພາກອື່ນໆ. ມາຮອດປີ 2020 ເຊິ່ງເປັນປີສຸດທ້າຍຂອງແຜນການ 5 ປີ ຄັ້ງທີ VIII ນີ້ ປະເທດເຮົາກໍຖືກກະທົບແຮງພໍສົມຄວນຈາກການແຜ່ລະບາດຂອງພະຍາດໂຄວິດ – 19 ແລະ ໄດ້ດັດປັບຕົວເລກການຂະຫຍາຍຕົວຂອງເສດຖະກິດ ປີ 2020 ລົງຈາກ 6,5% ມາເປັນ 3,3% – 3,6% ພ້ອມດ້ວຍຄາດໝາຍທາງດ້ານມະຫາພາກຈໍານວນໜຶ່ງ ເຊິ່ງຄາດວ່າຈະເຮັດໃຫ້ອັດຕາການຂະຫຍາຍຕົວ ສະເລ່ຍໃນແຜນການ 5 ປີ ຄັ້ງທີ VIII ຈະໄດ້ພຽງ 5,8% ຫຼຸດແຜນທີ່ວາງໄວ້ 7,2%.

ไม่มีคำอธิบายรูปภาพ

ແຕ່ເຖິງຢ່າງໃດກໍຕາມ, ໃນໄລຍະ 5 ປີຜ່ານມາ ໂດຍພາຍໃຕ້ການຊີ້ນໍາຢ່າງໃກ້ຊິດຂອງລັດຖະບານ ບວກກັບຄວາມບຸກບືນສູງຂອງບັນດາຂະແໜງການ, ອໍານາດການປົກຄອງທ້ອງຖິ່ນ ແລະ ຂອງປະຊາຊົນ ບວກກັບການສະໜັບສະໜູນຂອງບັນດາປະເທດເພື່ອນມິດຍຸດທະສາດ ແລະ ຄູ່ຮ່ວມພັດທະນາ ໄດ້ເຮັດໃຫ້ການພັດທະນາເສດຖະກິດ – ສັງຄົມ ເຖິງຈະປະເຊີນກັບຄວາມຫຍຸ້ງຍາກຕ່າງໆອັນໜັກໜ່ວງກໍຕາມ ແຕ່ກໍຍັງສາມາດປະຄອງຕົວ ແລະ ຜ່ານບັນດາຄວາມຫຍຸ້ງຍາກໃນລະດັບດີສົມຄວນ, ຮັບປະກັນການຜະລິດ ແລະ ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນ, ໂຄງການລົງທຶນຂະໜາດໃຫຍ່ໃນຫຼາຍຂົງເຂດ ຍັງສືບຕໍ່ໄດ້ຮັບການຈັດຕັ້ງປະຕິບັດ ເປັນຕົ້ນ: ໂຄງການກໍ່ສ້າງ ທາງລົດໄຟ ລາວ – ຈີນ, ໂຄງການກໍ່ສ້າງທາງດ່ວນນະຄອນຫຼວງວຽງຈັນ – ວັງວຽງ, ໂຄງການພະລັງງານ – ບໍ່ແຮ່, ໂຄງການພັດທະນາເຂດເສດຖະກິດພິເສດ, ໂຄງການພັດທະນາການທ່ອງທ່ຽວ; ສ້າງຈຸດເລີ່ມຕົ້ນອັນສໍາຄັນໃຫ້ແກ່ການຫັນປ່ຽນຈາກການເພິ່ງພາການຂຸດຄົ້ນຊັບພະຍາກອນທໍາມະຊາດຢ່າງດຽວ ໄປສູ່ການເສີມຂະຫຍາຍທຸກທ່າແຮງຂອງຊາດດ້ວຍການພັດທະນາຕາມທິດຍືນຍົງ ແລະ ສີຂຽວ, ການຫັນໄປສູ່ທັນສະໄໝ ແລະ ນໍາໃຊ້ຜົນສໍາເລັດທາງດ້ານເຕັກໂນໂລຊີໃໝ່ ໄດ້ມີບັນຍາກາດອັນໃໝ່, ຜົນສໍາເລັດອັນພົ້ນເດັ່ນແມ່ນພວກເຮົາສາມາດບັນລຸຄາດໝາຍທີ່ສໍາຄັນໃນການນໍາພາປະເທດຊາດຫຼຸດພົ້ນອອກຈາກສະຖານະພາບດ້ອຍພັດທະນາ, ສັງຄົມມີຄວາມສະຫງົບ ແລະ ມີສະຖຽນລະພາບຢ່າງໜັກແໜ້ນ, ອັດຕາຄວາມທຸກຍາກມີທ່າອ່ຽງຫຼຸດລົງ.

ในภาพอาจจะมี ท้องฟ้า, ต้นไม้ และสถานที่กลางแจ้ง

ລວມຍອດຜະລິດຕະພັນພາຍໃນ ( GDP ) ສະເລ່ຍຕໍ່ຫົວຄົນ ໄດ້ເພີ່ມຂຶ້ນຈາກ 2.025 ໂດລາສະຫະລັດ ປີ 2016 ມາເປັນ 2.654 ໂດລາສະຫະລັດ ໃນປີ 2019 ແລະ ຄາດວ່າຈະເພີ່ມຂຶ້ນເປັນ 2.664 ໂດລາສະຫະລັດ ໃນປີ 2020 ( ແຜນການ 2.978 ໂດລາສະຫະລັດ ), ໃນ 5 ປີຄາດວ່າຈະສາມາດເກັບລາຍຮັບທັງໝົດໄດ້ 120.422 ຕື້ກີບ ເທົ່າກັບ 98,4% ຂອງແຜນ ( ທີ່ໄດ້ຮັບການດັດແກ້ໃນແຕ່ລະປີ ) ສະເລ່ຍເທົ່າກັບ 15,9% ຂອງ GDP ຫຼື ທຽບໃສ່ການປະຕິບັດ 5 ປີຜ່ານມາ ( 2011 – 2015 ) ເພີ່ມຂຶ້ນ 20%, ລາຍຈ່າຍທັງໝົດປະຕິບັດໄດ້ 156.351 ຕື້ກີບ ເທົ່າກັບ 95,9% ຂອງແຜນການ ( ທີ່ໄດ້ຮັບການດັດແກ້ໃນແຕ່ລະປີ ) ສະເລ່ຍເທົ່າກັບ 20,6% ຂອງ GDP, ຂາດດຸນງົບປະມານສະເລ່ຍໄລຍະ 5 ປີ ຢູ່ໃນລະດັບ 4,73% ຂອງ GDP ( ມະຕິສະພາ: ບໍ່ເກີນ 5% ຂອງ GDP ).

ไม่มีคำอธิบายรูปภาพ

ການນໍາເຂົ້າ – ສົ່ງອອກ ຄາດວ່າປະຕິບັດໄດ້ 52.976 ລ້ານໂດລາສະຫະລັດ; ໃນນັ້ນມູນຄ່າການສົ່ງອອກ ປະຕິບັດໄດ້ 26.429 ລ້ານໂດລາສະຫະລັດ ແລະ ມູນຄ່າການນໍາເຂົ້າ ປະຕິບັດໄດ້ 26.547 ລ້ານໂດລາສະຫະລັດ, ຂາດດຸນການຄ້າ 118 ລ້ານໂດລາສະຫະລັດ.

ອີງຕາມຜົນການສໍາຫຼວດຕາມມາດຖານ 309/ນຍ ຂອງລັດຖະບານ ໃນປີ 2019 ຄອບຄົວທຸກຍາກຍັງເຫຼືອ 62.384 ຄອບຄົວ ເທົ່າກັບ 5,16% ຂອງຄອບຄົວທັງໝົດ. ອີງຕາມຜົນການສໍາຫຼວດການຊົມໃຊ້ ແລະ ການໃຊ້ຈ່າຍຄົວເຮືອນ ຄັ້ງທີ 6 ( LECS6 ) ໂດຍສູນສະຖິຕິແຫ່ງຊາດທີ່ໄດ້ໃນປີ 2018 – 2019 ເຫັນວ່າອັດຕາຄວາມທຸກຍາກຍັງເຫຼືອ ປະມານ 18,3% ຂອງຈໍານວນປະຊາກອນທັງໝົດ ( ຫຼຸດລົງຈາກ 23,2% ອີງຕາມຜົນການສໍາຫຼວດ LECS5 ໃນປີ 2012 – 2013 ) ຫຼື ເທົ່າກັບ 13,5% ຂອງຈຳນວນຄົວເຮືອນທັງໝົດ ( ມະຕິສະພາ: ອັດຕາຄອບຄົວທຸກຍາກໃຫ້ຕໍ່າກວ່າ 10% ໃນ ປີ2020 ).