ທະນາຄານຮ່ວມພັດທະນາ ມອບພັນທະອາກອນ ປະຈໍາປີ 2020 ຈໍານວນ 26 ຕື້ກວ່າກີບ

166

ໃນວັນທີ 30 ທັນວາ 2020 ຜ່ານມາ ທີ່ກົມສ່ວຍສາອາ ກອນ ກະຊວງການເງິນ ໄດ້ມີພິທີມອບອາກອນຈາກຜົນປະ ກອບການດໍາເນີນທຸລະກິດຂອງທະນາຄານຮ່ວມພັດທະນາ ຫຼື JDB ປີ 2020 ມີຈໍານວນ26.786.310.237 ກີບ.

ກ່າວມອບໂດຍ ທ່ານ ວິໄລ ສີພະພອນ ຜູ້ອໍານວຍການໃຫຍ່ ທະນາຄານຮ່ວມພັດທະນາ ແລະ ຮັບໂດຍ ທ່ານ ພູທະນູເພັດ ໄຊສົມບັດ ຫົວໜ້າກົມສ່ວຍສາອາກອນ ກະຊວງການເງິນ, ເຂົ້າຮ່ວມໃນພິທີດັ່ງກ່າວມີ ທ່ານ ເອກະພັນ ພະພິທັກ ປະທານສະພາບໍລິຫານ ທະນາຄານຮ່ວມພັດທະນາ, ມີຄະນະກົມກະຊວງການເງິນ ແລະ ຄະນະຜູ້ບໍລິຫານ ທະນາຄານຮ່ວມພັດທະນາ.

ການມອບພັນທະອາກອນຂອງທະນາຄານຮ່ວມພັດທະນາໃນຄັ້ງນີ້ ເປັນຈໍານວນເງິນໃນລະດັບຕົ້ນໆຂອງທະນາຄານທຸລະກິດໃນ ສປປ ລາວ ເຊິ່ງສະທ້ອນໃຫ້ເຫັນການຕື່ນຕົວໃນການມອບພັນທະ. ໃນນັ້ນ, ມີອາກອນກໍາໄລລ່ວງໜ້າ ງວດ 2 ຈໍານວນ 14 ຕື້ກີບ ເປັນການປະຕິບັດພັນທະຢ່າງເອົາໃຈໃສ່ຂອງທະນາຄານຮ່ວມພັດທະນາ ໃນການປະກອບສ່ວນເຂົ້າໃນການພັດທະນາເສດຖະກິດຂອງລາວ, ສະໜັບສະໜູນຊ່ວຍເຫຼືອສັງຄົມຕະຫຼອດມາ ພາຍໃຕ້ການຊີ້ນໍາຢ່າງໃກ້ຊິດຈາກພັກ – ລັດ ກໍຄືທະນາຄານ ແຫ່ງ ສປປ ລາວ ເຮັດໃຫ້ທະນາຄານຮ່ວມພັດທະນາ ໄດ້ຮັບຄວາມເຊື່ອໝັ້ນຈາກສັງຄົມໃນທົ່ວປະເທດ ແລະ ການຕັດສິນໃຈສູງຂອງຄະນະຜູ້ບໍລິຫານທີ່ກ້າລົງທຶນໃສ່ການພັດທະນາໃຫ້ກາຍເປັນທະນາຄານທີ່ທັນສະໄໝ, ໄດ້ທຸ່ມເທເຫື່ອແຮງ, ສະຕິປັນຍາພັດທະນາ ທະນາຄານຮ່ວມພັດທະນາ ໃຫ້ມີການເຕີບໃຫຍ່ຂະຫຍາຍຕົວ ແລະ ບໍລິການລູກຄ້າດ້ວຍມາດຕະຖານສາກົນ.

ປັດຈຸບັນທະນາຄານຮ່ວມພັດທະນາ ໄດ້ຮ່ວມມືກັບຫຼາຍອົງກອນ ແລະ ຫຼາຍບໍລິສັດ ເພື່ອບໍລິການດ້ານການເງິນທີ່ຄົບວົງຈອນໃຫ້ກັບລູກຄ້າທຸກລະດັບຢ່າງເທົ່າທຽມກັນ ປະຕິບັດນະໂບຍາຍຕ່າງຝ່າຍມີຜົນປະໂຫຍດຕາມຄໍາຂວັນທີ່ວ່າ “ ເຕີບໃຫຍ່ໄປພ້ອມກັນ ”.