ພິດໂຄວິດ – 19 ດຶງເສດຖະກິດ ແຂວງຈຳປາສັກ ຂະຫຍາຍຕົວພຽງ 3,63% ໃນປີ 2020

450

ຜົນກະທົບຈາກການລະບາດຂອງພະຍາດໂຄວິດ – 19 ດຶງເສດຖະກິດ ແຂວງຈຳປາສັກ ໃນປີ 2020 ເຕີບໂຕພຽງ 3,63%. ຢ່າງໃດກໍຕາມ, ການສົ່ງອອກຖືວ່າບັນລຸໄດ້ເກີນແຜນການ 5,5%, ສ່ວນການລົງທຶນຂອງນັກທຸລະກິດພາຍໃນ ແລະ ຕ່າງປະເທດ ບັນລຸໄດ້ 2.178 ຕື້ກີບ.

ທ່ານ ວິໄລວົງ ບຸດດາຄໍາ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຈຳປາສັກລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ ປະຈຳປີ 2020 ແລະ ທິດທາງແຜນການ ປະຈຳປີ 2021 ຕໍ່ກອງປະຊຸມສະໄໝສາມັນ ເທື່ອທີ 10 ຂອງສະພາປະຊາຊົນແຂວງ ຊຸດທີ I ເມື່ອວັນທີ 30 ທັນວາ 2020 ວ່າ: ໃນປີ 2020 ຜ່ານມາ ເຖິງວ່າແຂວງໄດ້ພະຍາຍາມສຸມກໍາລັງຈັດຕັ້ງປະຕິບັດແຜນ ເພື່ອໃຫ້ບັນລຸບັນດາຄາດໝາຍທີ່ວາງໄວ້ ແຕ່ກໍຍັງມີບາງດ້ານບໍ່ບັນລຸຕາມແຜນວາງໄວ້ ຍ້ອນຜົນກະທົບຈາກສະພາບໂຄວິດ – 19 ສະແດງອອກໃນປີ 2020 ເສດຖະກິດຂອງແຂວງ ( GDP ) ຂະຫຍາຍຕົວໃນລະດັບ 3,63% ທຽບໃສ່ແຜນຫຼຸດ 0,87% ( ມະຕິສະພາ 4,5% ), ມູນຄ່າລວມຍອດຜະລິດຕະພັນພາຍໃນປີ ປະຕິບັດໄດ້ 20,55 ຕື້ກີບ ສະເລ່ຍລາຍໄດ້ຕໍ່ຫົວຄົນ ເທົ່າກັບ 3.054 ໂດລາສະຫະລັດ.

ໂຄງປະກອບເສດຖະກິດຂະແໜງກະສິກໍາ – ປ່າໄມ້ ກວມ 23,99%, ຂະແໜງອຸດສາຫະກໍາ ກວມ 23,88% ແລະ ຂະແໜງບໍລິການ ກວມ 52,13% ຂອງ GDP. ໃນນັ້ນ, ມູນຄ່າລວມຂອງຂະແໜງກະສິກໍາ – ປ່າໄມ້ ແລະ ການປະມົງ ປະຕິບັດໄດ້ 4.931 ຕື້ກີບ ທຽບໃສ່ໄລຍະດຽວເພີ່ມຂຶ້ນ 10,15%, ທຽບໃສ່ແຜນປີປະຕິບັດໄດ້ 109,87% ( ແຜນ 4.488 ຕື້ກີບ ); ຂະແໜງອຸດສາຫະກໍາປະຕິບັດໄດ້ 4.907 ຕື້ກີບ ທຽບໃສ່ໄລຍະດຽວເພີ່ມຂຶ້ນ 7,96%, ທຽບໃສ່ແຜນປີປະຕິບັດໄດ້ 110,98% ( ແຜນ 4.421 ຕື້ກີບ ); ຂະແໜງການບໍລິການປະຕິບັດໄດ້ 10.713 ຕື້ກີບ, ທຽບໃສ່ແຜນປີປະຕິບັດໄດ້ 93,41% ( ແຜນ 11.469 ຕື້ກີບ ), ທຽບໃສ່ໄລຍະດຽວຫຼຸດລົງ 3,58%.

Image may contain: one or more people, people on stage, plant, sky and outdoor

ການສົ່ງອອກປະຕິບັດໄດ້ 263,61 ລ້ານໂດລາສະຫະລັດ, ທຽບໃສ່ແຜນປີໄດ້ 105,5%; ສ່ວນການນໍາເຂົ້າ ປະຕິບັດໄດ້ 219,27 ລ້ານໂດລາສະຫະລັດ, ທຽບໃສ່ແຜນປີປະຕິບັດໄດ້ 72,2% ( ສາເຫດທີ່ເຮັດໃຫ້ມູນຄ່າການນໍາເຂົ້າຫຼຸດລົງຍ້ອນຢູ່ໃນໄລຍະການປະຕິບັດມາດຕະການປ້ອງກັນ, ຕ້ານການແຜ່ລະບາດຂອງພະຍາດໂຄວິດ – 19, ຫຼາຍກິດຈະກໍາການປະຕິບັດໂຄງການກໍ່ສ້າງຕ່າງໆແມ່ນຖືກຢຸດຊົ່ວຄາວ ).

ຍອດມູນຄ່າຜະລິດຕະພັນພະລັງງານໄຟຟ້າ – ບໍ່ແຮ່ ສາມາດປະຕິບັດໄດ້ 1.092 ຕື້ກີບ ທຽບໃສ່ແຜນປີລື່ນ 1,4 ເທົ່າ ມູນຄ່າການຈຳໜ່າຍປະຕິບັດໄດ້ 1.688 ຕື້ກີບ ທຽບໃສ່ແຜນປີລື່ນ 1,5 ເທົ່າ ລວມທົ່ວແຂວງມີໄຟຟ້າຊົມໃຊ້ 640 ບ້ານ ເທົ່າກັບ 99,84%.
ແຂວງຈຳປາສັກ ມີແຫຼ່ງຜະລິດໄຟຟ້າທີ່ດຳເນີນການຜະລິດແລ້ວ 7 ແຫ່ງ ສາມາດຜະລິດພະລັງງານໄຟຟ້າໄດ້ 2,09 ລ້ານ MWh ຄິດເປັນມູນຄ່າ 866,14 ຕື້ກີບ ທຽບໃສ່ແຜນລື່ນ 3,6 ເທົ່າ.

Image may contain: sky, outdoor and nature

ການເກັບລາຍຮັບງົບປະມານ ຄາດຄະເນປະຕິບັດໝົດປີໄດ້ 1.310 ຕື້ກີບ ທຽບໃສ່ແຜນປີປະຕິບັດໄດ້ 90,01% ( ມະຕິສະພາຮັບຮອງ 1.456 ຕື້ກີບ ), ໃນນັ້ນລາຍຮັບຂອງສູນກາງ 737,7 ຕື້ກີບ ແລະ ລາຍຮັບຂອງແຂວງ 573,18 ຕື້ກີບ. ສ່ວນລາຍຈ່າຍ ປະຕິບັດໄດ້ 708,95 ຕື້ກີບ, ທຽບໃສ່ແຜນປີ ປະຕິບັດໄດ້ 96,96%.

ການລົງທຶນຂອງລັດໃນປີ 2020 ປະຕິບັດການລົງທຶນ ມູນຄ່າ 330,75 ຕື້ກີບ, ທຽບໃສ່ແຜນປະຕິບັດໄດ້ 2,1 ເທົ່າ. ໃນນັ້ນ, ການລົງທຶນຂອງລັດບ້ວງທຶນປົກກະຕິປະຕິບັດໄດ້ 172 ໂຄງການ ມູນຄ່າ 81 ຕື້ກີບ.

ການລົງທຶນຂອງເອກະຊົນພາຍໃນ ແລະ ຕ່າງປະເທດ ມີຈໍານວນ 10 ໂຄງການ ມູນຄ່າອະນຸມັດການລົງທຶນທັງໝົດ 2.178 ຕື້ກີບ ຫຼື ເທົ່າກັບ 272,25 ລ້ານໂດລາສະຫາລັດ ແລະ ມີທຶນນໍາເຂົ້າຕົວຈິງ 190,8 ລ້ານໂດລາສະຫາລັດ ຫຼື ເທົ່າກັບ 1.659,95 ຕື້ກີບ, ທຶນຈາກລະບົບສິນເຊື່ອຂອງທະນາຄານ ປະຕິບັດໄດ້ 3.218 ຕື້ກີບ ທຽບໃສ່ໄລຍະດຽວເພີ່ມຂຶ້ນ 9,8% ທຽບໃສ່ແຜນປີປະຕິບັດໄດ້ 93,03%.

[ ໂດຍ: ເກດສະໜາ ແກ້ວສຸວັນນະແສງ ]