ປີ 2020 ເສດຖະກິດແຂວງ ໄຊຍະບູລີ ຂະຫຍາຍຕົວ 4,8%

180

ເສດຖະກິດແຂວງໄຊຍະບູລີ ປີ2020 ຂະຫຍາຍຕົວ4,8%, ສ່ວນການເກັບລາຍຮັບປະຕິບັດໄດ້ 93,1% ຂອງແຜນດັດແກ້. ສຳລັບປີ2021 ແມ່ນຕັ້ງເປົ້າພັດທະນາເສດຖະກິດ ໃຫ້ຂະຫຍາຍຕົວໃນລະດັບບໍ່ຫຼຸດ5%.

ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 10 ຂອງສະພາປະຊາຊົນແຂວງ ໄຊຍະບູລີ ຊຸດທີ I ທີ່ໄຂຂຶ້ນໃນວັນທີ 29 ທັນວາ 2020 ນີ້ວ່າ: ການພັດທະນາເສດຖະກິດ-ສັງຄົມຂອງແຂວງ ໄຊຍະບູລີໃນປີ 2020 ເຖິງແມ່ນວ່າໄດ້ຮັບຜົນກະທົບຈາກບັນຫາໄພທໍາມະຊາດ, ສັດຕູພືດທໍາລາຍເຄື່ອງປູກຂອງຝັງ, ການລະບາດຂອງພະຍາດສັດເກີດຂຶ້ນຢ່າງຕໍ່ເນື່ອງ ແລະ ການແຜ່ລະບາດພະຍາດໂຄວິດ-19 ທີ່ສົ່ງຜົນກະທົບໂດຍກົງ ແລະ ເປັນອຸປະສັກໃນການພັດທະນາເສດຖະກິດ-ສັງຄົມຂອງແຂວງ, ແຕ່ພາຍໃຕ້ການຊີ້ນຳ-ນຳພາຂອງອົງຄະນະພັກ, ອົງການປົກຄອງທຸກຂັ້ນ ແລະ ຂະແໜງການທີ່ກ່ຽວຂ້ອງໄດ້ເຮັດໃຫ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານຂອງແຂວງ ໄດ້ດໍາເນີນໄປຕາມທິດທີ່ກຳນົດໄວ້, ເຮັດໃຫ້ສະພາບໂດຍລວມຂອງແຂວງຍັງຮັກສາໄດ້ຄວາມສະຫງົບ, ປອດໄພ ແລະ ມີຄວາມເປັນລະບຽບຮຽບຮ້ອຍໃນສັງຄົມໂດຍພື້ນຖານ.

ພ້ອມດຽວກັນນັ້ນບັນດາພື້ນຖານໂຄງລ່າງດ້ານເສດຖະກິດກໍໄດ້ຮັບການປັບປຸງເຮັດໃຫ້ເສດຖະກິດຂອງແຂວງສືບຕໍ່ຂະຫຍາຍຕົວຢ່າງຕໍ່ເນື່ອງໃນລະດັບ 4,8% ແລະ ສ້າງມູນຄ່າເພີ່ມລາຄາໃນປີໄດ້ປະມານ 10.706 ຕື້ກີບ ສະເລ່ຍຕໍ່ຫົວຄົນໃຫ້ໄດ້ 3.031 ໂດລາສະຫະລັດ.

ໃນນີ້ ຂະແໜງກະສິກຳຂະຫຍາຍຕົວ 2,1% ກວມເອົາ 26,3%, ອຸດສາຫະກຳຂະຫຍາຍຕົວ 8,4% ກວມເອົາ 35,9%, ບໍລິການຂະຫຍາຍຕົວ 3,4% ກວມເອົາ 37,8% ຂອງລວມຍອດຜະລິດຕະພັນພາຍໃນ. ສາມາດເກັບລາຍຮັບເຂົ້າງົບປະມານໄດ້ທັງໜົດ 1.038,92 ຕື້ກີບ ເທົ່າກັບ 93,1% ຂອງແຜນດັດແກ້, ທຽບໃສ່ໄລຍະດຽວກັນປີຜ່ານມາປະຕິບັດໄດ້ລື່ນ 13,73%; ໃນນີ້ ລາຍຮັບພູດສູນກາງ 842,12 ຕື້ກີບ ເທົ່າກັບ 93,24% ຂອງແຜນດັດແກ້, ລາຍຮັບພາຍໃນ 196,8 ຕື້ກີບ ລື່ນແຜນດັດແກ້ 10%; ປະຕິບັດລາຍຈ່າຍໄດ້ 477,06 ຕື້ກີບ ເທົ່າກັບ 91,75% ຂອງແຜນດັດແກ້, ທຽບໃສ່ໄລຍະດຽວກັນປີຜ່ານມາ ເທົ່າກັບ 94,25%.

ສໍາລັບທິດທາງແຜນການປີ 2021 ນີ້ ແຂວງ ໄຊຍະບູລີ ຈະສູ້ຊົນເຮັດໃຫ້ການຂະຫຍາຍຕົວຂອງເສດຖະກິດຢູ່ໃນລະດັບ 5% ສ້າງມູນຄ່າເພີ່ມໃຫ້ໄດ້ 11.262 ຕື້ກີບ, ສະເລ່ຍຕໍ່ຫົວຄົນໃຫ້ໄດ້ 3.157 ໂດລາ,

ຂ່າວ-ພາບ: ອຸ່ນເຮືອນ ໂພທິລັກ