JDB ລົງນາມຮ່ວມມືກັບເອັມພອຍມາກ ພ້ອມເປີດໂຕຜະລິດຕະພັນບັດ Union Pay ແລະ ບັດ Visa

198

ໃນວັນທີ 25 ທັນວາ 2020 ຜ່ານມາ ທີ່ສໍານັກງານໃຫຍ່ທະນາຄານຮ່ວມພັດທະນາ ຫຼື JDB, ນະຄອນຫຼວງວຽງຈັນ ໄດ້ມີພິທີລົງນາມໃນບົດບັນທຶກ ຄວາມເຂົ້າໃຈ ກັບ ບໍລິສັດ ເອັມພອຍມາກການຄ້າ ຈໍາກັດ ( MINI Big C ) ແລະ ຈັດງານເປີດໂຕ ບັດແບບໃໝ່ ທີ່ທັນສະໄໝຄື Union Pay ແລະ ບັດ Visa Contactless ເປັນກຽດເຂົ້າຮ່ວມໂດຍ ທ່ານ ເອກະພັນ ພະພິທັກ ປະທານສະພາບໍລິຫານ JDB, ທ່ານ ສຸລິສັກ ທໍານຸວົງ ຫົວໜ້າກົມຄຸ້ມຄອງລະບົບຊໍາລະສະສາງ, ທະນາຄານແຫ່ງ ສປປ ລາວ ພ້ອມດ້ວຍແຂກຖືກເຊີນ, ຜູ້ບໍລິຫານລະດັບສູງ ແລະ ວິຊາການທີ່ກ່ຽວຂ້ອງ ເຂົ້າຮ່ວມ.

ໃນພິທີເຊັນບົດບັນທຶກຕາງໜ້າ JDB ໂດຍ ທ່ານ ວິໄລ ສີພະພອນ ຜູ້ອໍານວຍການໃຫຍ່ JDB ແລະ ຕາງໜ້າບໍລິສັດ ເອັມພອຍມາກ ໂດນ ທ່ານ ນາງ ປະພາວະດີ ກຸວະສານ ປະທານກໍາມະການຜູ້ບໍລິຫານ ບໍລິສັດ ເອັມພອຍມາກການຄ້າ ຈໍາກັດ. ຕາມບົດບັນທຶກ ທັງສອງຝ່າຍຈະໄດ້ຮ່ວມມືໃນການໃຫ້ບໍລິການເຄື່ອງຮູດບັດ EDC ທີ່ທັນສະໄໝຮອງຮັບການຊໍາລະຄ່າສິນຄ້າ ແລະ ຄ່າບໍລິການໄດ້ຫຼາຍຮູບແບບໃນເຄື່ອງຮູດດຽວເຊັ່ນ: ຊໍາລະດ້ວຍການສະແກນ Yes Pay QR Code, Alipay, Union Pay ແລະ ບັດສາກົນ ພ້ອມມີລະບົບຮອງຮັບການ ຊໍາລະເງິນດ້ວຍບັດ Contectless ເພື່ອບໍລິການໃຫ້ແກ່ຮ້ານຄ້າ Mini Big C ທຸກສາຂາໃນ ສປປ ລາວ, ຮ່ວມມືໃນການບໍລິການຕິດຕັ້ງຕູ້ ATM ຂອງ JDB ໃນສະຖານທີ່ຂອງຮ້ານຄ້າ ມິນິບິກຊີ ທຸກສາຂາ, ຮ່ວມມືໃນການສຶກສາຄວາມເປັນໄປໄດ້ໃນການບໍລິການໃຫ້ ມິນິບິກຊີ ເປັນຕົວແທນທາງດ້ານການເງິນ ແລະ ຊໍາລະຜ່ານລະບົບ Bank Agent ແລະ ການເຊື່ອມຕໍ່ຜ່ານລະບົບຂອງ JDB, ຮ່ວມມືໃນການໃຫ້ບໍລິການອອກບັດ Co-Brand ແລະ ໂປຼໂມຊັ່ນ, ຮ່ວມມືກັນໃນການໂຄສະນາ ແລະ ປະຊາສໍາພັນຜະລິດຕະພັນຂອງສອງຝ່າຍ ແລະ ຈະໄດ້ຮ່ວມມືກັນໃນການບໍລິການດ້ານອື່ນໆ ໃນຕໍ່ໜ້າຕາມການຕົກລົງຂອງສອງຝ່າຍ.

ການເປີດໂຕຜະລິດຕະພັນບັດ Union Pay Visa Contactless, ການໃຊ້ບັດດັ່ງກ່າວເພື່ອຫຼຸດຜ່ອນການຖືເງິນສົດ ເຊິ່ງນໍາໄປສູ່ການຫຼຸດຜ່ອນຕົ້ນທຶນຂອງຜູ້ບໍລິໂພກ ແລະ ຜູ້ປະກອບການ ໃນການຂົນຍ້າຍ, ການຈັດເກັບ ແລະ ຫຼຸດຜ່ອນຄວາມສ່ຽງຕໍ່ການໂຈລະກໍາ, ທັງຍັງເປັນການເພີ່ມຄວາມສະດວກ, ວ່ອງໄວໃນການເຮັດທຸລະກໍາທາງການເງິນ, ການພັດທະນາເຕັກໂນໂລຊີດັ່ງກ່າວຂຶ້ນມາ ແມ່ນເພື່ອໃຫ້ສັງຄົມລາວໄດ້ນໍາໃຊ້ ປະກອບມີບັດ Union Pay Contactess ບັດ Visa Dibit Contactless. ນອກຈາກນນີ້, JDB ຍັງໄດ້ພັດທະນາເຄື່ອງຮູດບັດ EDC ທີ່ຮອງຮັບການຊໍາລະ ແລະ ມີຮ້ານຄ້າທີ່ນໍາໃຊ້ຫຼາຍກ່ວາ 600 ຮ້ານຄ້າໃນຂອບເຂດທົ່ວປະເທດ, ການຊໍາລະເງິນແບບບໍ່ໄດ້ສໍາພັດ ກໍເປັນອີກທາງເລືອກໜຶ່ງທີ່ມີການຂະຫຍາຍໂຕໃນຫຼາຍປະເທດທົ່ວໂລກ

ປັດຈຸບັນ JDB ໄດ້ຮ່ວມມືກັບຫຼາຍອົງກອນ, ຫຼາຍສະຖາບັນ ແລະ ຫຼາຍບໍລິສັດ-ຫຼາຍໂຮງງານ ເພື່ອບໍລິການດ້ານການເງິນທີ່ຄົບວົງຈອນໃຫ້ກັບລູກຄ້າທຸກລະດັບຢ່າງເທົ່າທຽມກັນໂດຍປະຕິບັດຄໍຳຂວັນທີ່ວ່າ: ພວກເຮົາຈະ “ ເຕີບໃຫ່ຍໄປພ້ອມກັນ “