ກະເສດນາບົງ ວາງສະແດງຜົນງານ 45 ປີ ການພັດທະນາວິຊາການສາຂາກະເສດສາດ

197

ຄະນະກະເສດສາດ ມະຫາວິທະຍາໄລແຫ່ງຊາດ ໄດ້ຈັດງານວາງສະແດງຜົນງານເຕີບໃຫຍ່ຂະຫຍາຍຕົວຂອງການພັດທະນາວິຊາການ ສາຂາກະເສດສາດ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກະເສດນາບົງ ຄົບຮອບ 45 ປີ ຂຶ້ນໃນລະຫວ່າງວັນທີ 23 – 25 ທັນວາ.

ພິທີເປີດງານສະເຫຼີມສະຫຼອງວັນສ້າງຕັ້ງກະເສດນາບົງ ຄົບຮອບ 45 ປີ ແລະ ງານພົບປະອະດີດຄູ – ອາຈານ ໄດ້ຈັດຂຶ້ນໃນວັນທີ 23 ທັນວາ 2020 ທີ່ກະເສດນາບົງ ບ້ານປາກຊາບໃໝ່ ເມືອງໄຊທານີ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ຮສ. ປອ. ພຸດ ສິມມາລາວົງ ຮອງລັດຖະມົນຕີ ກະຊວງສຶກສາທິການ ແລະ ກີລາ, ທ່ານ ຄໍາບຸນນັດ ໄຊຍານົນ ຮອງລັດຖະມົນຕີ ກະຊວງກະສິກໍາ ແລະ ປ່າໄມ້, ທ່ານເຈົ້າເມືອງໄຊທານີ, ຮອງອະທິການບໍດີ ມະຫາວິທະຍາໄລແຫ່ງຊາດ ( ມຊ ) ພ້ອມດ້ວຍອະດີດຄະນະນໍາ ຄະນະກະເສດສາດ, ພະນັກງານຄູ – ອາຈານ ແລະ ນັກສຶກສາ ພ້ອມດ້ວຍບັນດາແຂກທີ່ຖືກເຊີນເຂົ້າຮ່ວມ.

Image may contain: 2 people, suit

ທ່ານ ຮສ. ຟອງສະໝຸດ ສຸທຳມະວົງ ຄະນະບໍດີຄະນະກະເສດສາດ ກ່າວວ່າ: ວິທະຍາໄລກະເສດນາບົງແມ່ນສະຖາບັນການສຶກສາກະສິກໍາລະດັບຊັ້ນກາງແຫ່ງທໍາອິດ ທີ່ໄດ້ສ້າງຂຶ້ນພ້ອມກັບການສະຖາປະນາ ສປປ ລາວ ໂດຍສ້າງຕັ້ງຂຶ້ນໃນວັນທີ 9 ທັນວາ 1975. ປະຕິບັດຕາມແຜນພັດທະນາການສຶກສາຊັ້ນສູງໃນປີ 1995 ລັດຖະບານໄດ້ຕົກລົງໃຫ້ກະຊວງສຶກສາທິການ ແລະ ກີລາ ເຕົ້າໂຮມເອົາບັນດາໂຮງຮຽນຊັ້ນສູງແຫ່ງຕ່າງໆມາເຕົ້າໂຮມກັນ ເພື່ອສ້າງເປັນມະຫາວິທະຍາໄລແຫ່ງຊາດ, ໂຮງຮຽນກະເສດນາບົງ ພາຍໃຕ້ການຄຸ້ມຄອງຂອງກະຊວງກະສິກໍາ ແລະ ປ່າໄມ້ ເປັນເວລາ 20 ປີ ກໍໄດ້ຖືກມອບໂອນໃຫ້ກະຊວງສຶກສາທິການ ແລະ ກີລາ ພາຍໃຕ້ການຄຸ້ມຄອງຂອງ ມຊ ໂດຍມີຊື່ວ່າຄະນະກະເສດສາດ – ປ່າໄມ້.

Image may contain: 20 people, people standing

ຕະຫຼອດໄລຍະ 45 ປີຜ່ານມາ ສະຖາບັນແຫ່ງນີ້ໄດ້ສ້າງວິຊາການ ເພື່ອຮັບໃຊ້ແກ່ປະເທດຊາດ ແລະ ສັງຄົມ 8.725 ຄົນ ຍິງ 2.814 ຄົນ ໃນລະດັບຕ່າງໆ ຄື: ຊັ້ນກາງ ໄດ້ 1.573 ຄົນ ຍິງ 268 ຄົນ; ຊັ້ນສູງ 2.412 ຄົນ ຍິງ 1.033 ຄົນ; ປະລິນຍາຕີ 4.620 ຄົນ ຍິງ 1.464 ຄົນ ແລະ ປະລິນຍາໂທ 120 ຄົນ ຍິງ 49 ຄົນ, ແຕ່ຖ້າທຽບໃສ່ ຄວາມຕ້ອງການຕົວຈິງຂອງຂະແໜງການກະສິກໍາ ແລະ ສັງຄົມແລ້ວເຫັນວ່າຍັງບໍ່ພຽງພໍໃນບັນດາສາຂາວິຊາສະເພາະ ເຊັ່ນ: ສັດຕະວະແພດ, ການປະມົງ, ປ້ອງກັນພືດ, ເສດຖະກິດ ແລະ ເຕັກໂນໂລຊີອາຫານ.

ໃນງານສະແດງຜົນງານ 45 ປີ ກະເສດນາບົງ ໄດ້ມີການຈັດກິດຈະກໍາຫຼາກຫຼາຍ ຄື: ການສະເໜີຜົນການຄົ້ນຄວ້າວິທະຍາສາດຂອງຄູ – ອາຈານ ແລະ ນັກສຶກສາ, ການສະເໜີຜົນສໍາເລັດຂອງອະດີດນັກສຶກສາໃນການປະກອບອາຊີບ, ການວາງສະແດງຜົນງານດ້ານວິຊາການ, ຝຶກອົບຮົມຫົວຂໍ້ພິເສດ, ວາງສະແດງຜະລິດຕະພັນກະສິກໍາ, ການຫຼິ້ນກີລາມິດຕະພາບລະຫວ່າງ ອະດີດນັກສຶກສາ ແລະ ຄູອາຈານ. ນອກນັ້ນ, ຍັງມີກິດຈະກໍາອື່ນໆນຳອີກ.