ບໍລິສັດ ໄຟຟ້າຫົງສາ ມອບເງິນຄ່າອະນາໄມ, ປົກປັກຮັກສາແລວສາຍໄຟຟ້າແຮງສູງ 500 ກິໂລໂວນ

219

ໃນວັນທີ 23 ທັນວາ 2020 ນີ້ ທີ່ຫ້ອງວ່າການເມືອງເງິນ ແຂວງໄຊຍະບູລີ ໄດ້ຈັດພິທີມອບຮັບ – ເງິນຄ່າອະນາໄມ ແລະ ປົກປັກຮັກສາແລວສາຍສົ່ງໄຟຟ້າແຮງສູງ 500 ກິໂລໂວນ ຂອງບໍລິສັດ ໄຟຟ້າຫົງສາ ຈຳກັດ ໃຫ້ອົງການປົກຄອງບ້ານທີ່ໄດ້ຮັບຜິດຊອບອະນາໄມ ແລະ ສ້າງແລວກັນໄຟ ປະຈຳງວດ 2 ປີ 2020.

ເຂົ້າຮ່ວມພິທີມີ ທ່ານ ທອງພັນ ສຸກສະຫວັດ ຫົວໜ້າຫ້ອງວ່າການເມືອງເງິນ, ມີຄະນະກຳມະການຄຸ້ມຄອງ – ປົກປັກຮັກສາແລວສາຍສົ່ງໄຟຟ້າແຮງສູງ 500 ກິໂລໂວນ ຂັ້ນເມືອງ, ທີມງານ ບໍລິສັດ ໄຟຟ້າຫົງສາ ຈຳກັດ, ນາຍບ້ານ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ລະບົບສາຍສົ່ງໄຟຟ້າແຮງສູງ 500 ກິໂລໂວນ ຈາກໂຄງການໄປຫາຊາຍແດນໄທ ຍາວ 67 ກິໂລແມັດ ຜ່ານ 3 ເມືອງ ຄື:ເມືອງຫົງສາ, ເມືອງເງິນ ແລະ ເມືອງຊຽງຮ່ອນ. ໃນນີ້, ຢູ່ເມືອງເງິນ ມີ 6 ບ້ານ.

ເພື່ອເປັນການສ້າງຜົນປະໂຫຍດຮ່ວມກັນ ລະຫວ່າງບໍລິສັດ ກັບ ປະຊາຊົນ ໃນການຄຸ້ມຄອງ, ປົກປັກຮັກສາລະບົບສາຍສົ່ງໄຟຟ້າແຮງສູງ 500 ກິໂລໂວນ ເປັນຕົ້ນການອະນາໄມ – ສ້າງແລວກັນໄຟ ໂດຍທາງບໍລິສັດໄດ້ຈ່າຍຄ່າຄຸ້ມຄອງ ແລະ ປົກປັກຮັກສາແລວສາຍສົ່ງ 1 ກິໂລແມັດຕໍ່ປີ 3 ລ້ານກີບ, ປີໜຶ່ງອະນາໄມ 2 ຄັ້ງ.

ການມອບ – ຮັບເງິນຄ່າອະນາໄມ ແລະ ປົກປັກຮັກສາແລວສາຍສົ່ງໄຟຟ້າແຮງສູງ 500 ກິໂລໂວນ ໃຫ້ອົງການປົກຄອງບ້ານ 3 ບ້ານ ທີ່ຮັບຜິດຊອບ ປະຈຳງວດ 2 ປີ 2020   ຄື: ບ້ານນາຍາງຄຳ, ບ້ານບີໝີ ແລະ ບ້ານດອກເກດ ຈຳນວນເງິນທັງໝົດ 19 ລ້ານກີບ ເຊິ່ງໃຫ້ກຽດມອບໂດຍ ທ່ານ ຄົມເພັດ ແກ້ວພິລາ ຮອງຫົວໜ້າໜ່ວຍງານປະຊາສຳພັນສື່ສານ ອົງກອນ ບໍລິສັດ ໄຟຟ້າຫົງສາ ຈຳກັດ.

ສ່ວນບ້ານທີ່ຍັງເຫຼືອຈະໄດ້ສືບຕໍ່ມອບໃຫ້ສຳເລັດໃນວັນທີ 11 ມັງກອນ 2021.