ເປີດຕະຫຼາດນັດສົ່ງເສີມກະສິກຳ – ຫັດຖະກຳ ບຶງທາດຫຼວງ ຄັ້ງທີ 1

492

ຕະຫຼາດນັດເພື່ອສົ່ງເສີມກະສິກຳ – ຫັດຖະກຳ ບຶງທາດຫຼວງ ຈະເປີດຈົນຮອດວັນທີ 31 ທັນວາ 2020 ນີ້ ບັນດາພໍ່ຄ້າ, ແມ່ຄ້າ ສາມາດນຳເອົາສິນຄ້າໄປວາງສະແດງ ແລະ ຈຳໜ່າຍໄດ້ ເພື່ອເຮັດໃຫ້ຕະຫຼາດມີບັນຍາກາດຟົດຟື້ນ, ມີການຊື້ – ຂາຍແລກປ່ຽນສິນຄ້າເຊິ່ງກັນ ແລະ ກັນ.

ໃນວັນທີ 22 ທັນວາຜ່ານມາ ໄດ້ມີພິທີເປີດງານຕະຫຼາດນັດ ເພື່ອສົ່ງເສີມກະສິກຳ – ຫັດຖະກຳ ບຶງທາດຫຼວງ ຄັ້ງທີ 1 ຂຶ້ນຢ່າງເປັນທາງການທີ່ເຂດເສດຖະກິດສະເພາະບຶງທາດຫຼວງ ເມືອງໄຊເສດຖາ ນະຄອນຫຼວງວຽງຈັນ ( ນວ ) ໂດຍການເຂົ້າຮ່ວມຂອງ ທ່ານ ໂພຄໍາ ໄຊຍະສອນ ເຈົ້າເມືອງໄຊເສດຖາ, ມີ ທ່ານ ສີສັງຄົມ ໂຄດໂຍທາ ຮອງຫົວໜ້າກົມສົ່ງເສີມການຄ້າ, ກະຊວງອຸດສາຫະກໍາ ແລະ ການຄ້າ, ທ່ານຮອງປະທານສະພາການຄ້າ ແລະ ອຸດສາຫະກຳແຫ່ງຊາດ ( ສຄອຊ ), ຄະນະຄຸ້ມຄອງເຂດເສດຖະກິດພິເສດ ນວ ພ້ອມດ້ວຍນັກທຸລະກິດຊາວຄ້າຂາຍ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ທະນົງໄຊ ຄຸດໄພທູນ ຫົວໜ້າຄະນະຄຸ້ມຄອງເຂດເສດຖະກິດພິເສດ ນວ ກ່າວວ່າ: ການຈັດງານຕະຫຼາດນັດໃນຄັ້ງນີ້ ຈຸດປະສົງເພື່ອປະຕິບັດຕາມແນວທາງນະໂຍບາຍຂອງພັກ – ລັດຖະບານ ໃນການຈັດສັນເຂດເສດຖະກິດພິເສດ ນວ ກໍຄືການພັດທະນາເຂດຄຸ້ມຄອງເສດຖະກິດພິເສດບຶງທາດຫຼວງ ດ້ວຍເງື່ອນໄຂຍຸດທະສາດທີ່ຕັ້ງຂອງຕະຫຼາດບຶງທາດຫຼວງຢູ່ໃຈກາງ ນວ ເຊິ່ງເປັນສະຖານທີ່ໆເໝາະສົມສຳລັບການດໍາເນີນທຸລະກິດ ຫຼື ຜູ້ທີ່ມີຄວາມສົນໃຈທີ່ຈະເຂົ້າຮ່ວມລົງທຶນພາຍໃນຕະຫຼາດ ບໍ່ວ່າຈະເປັນນັກລົງທຶນທັງພາຍໃນ ແລະ ຕ່າງປະເທດ ເພື່ອສ້າງກິດຈະກໍາເຮັດໃຫ້ຕະຫຼາດມີບັນຍາກາດຟົດຟື້ນທີ່ເຕັມໄປດ້ວຍການຊື້ – ຂາຍແລກປ່ຽນສິນຄ້າ ແລະ ເພື່ອຈະກ້າວໄປສູ່ການພັດທະນາຕະຫຼາດໃຫ້ກາຍເປັນສູນກາງການຄ້າດ້ານການນຳເຂົ້າ ແລະ ສົ່ງອອກຜະລິດຕະພັນອຸປະໂພກ – ບໍລິໂພກ ໂດຍສະເພາະແນໃສ່ເຮັດໃຫ້ເປັນສູນກາງແຫ່ງການຜະລິດ ແລະ ຈຳໜ່າຍສິນຄ້າກະສິກໍາ – ຫັດຖະກຳ ຕະຫຼອດເຖິງປະເພດສິນຄ້າກະສິກໍາປອດສານພິດຕ່າງໆໃນອະນາຄົດ.

ທ່ານ ທະນົງໄຊ ຄຸດໄພທູນ ໃຫ້ຮູ້ຕື່ມອີກວ່າ: ການພັດທະນາຂອງຕະຫຼາດ ແມ່ນໄດ້ສ້າງຕັ້ງຂຶ້ນໃນເດືອນຕຸລາ 2019 ເປັນຕົ້ນມາ ໂດຍການບໍລິຫານຄຸ້ມຄອງຂອງ ບໍລິສັດ ລາວບຶງທາດຫຼວງ ຕະຫຼາດການຄ້າກະສິກໍາສາກົນ ຈຳກັດ, ມີເນື້ອທີ່ທັງໝົດ ປະມານ 35.000 ຕາແມັດ, ມີຫ້ອງຂາຍເຄື່ອງ 668 ລ໋ອກ, ເປັນບ່ອນຈຳໜ່າຍຜະລິດ ຕະພັນກະສິກຳແບບຄົບວົງຈອນ, ເປັນຕະຫຼາດຂາຍສົ່ງ – ຂາຍຍ່ອຍ, ຕອບສະໜອງສິນຄ້າຢ່າງຄວບຄຸມ, ທັງມີບ່ອນຈັດເກັບສິນຄ້າທີ່ໄດ້ມາດຕະຖານ ແລະ ອື່ນໆ ເຊິ່ງຕະຫຼາດແຫ່ງນີ້ຈະເປັນພື້ນທີ່ສະໜອງຜະລິດຕະພັນການກະສິກຳສີຂຽວແບບຄົບວົງຈອນແຫ່ງໃໝ່ ໂດຍອີງໃສ່ການຄ້າຂາຍຜະລິດຕະພັນກະສິກໍາເປັນຫຼັກ ແລະ ຍັງເປັນບ່ອນຮອງຮັບສິນຄ້າ ແລະ ບໍລິການກິດຈະການຕ່າງໆທີ່ກ່ຽວຂ້ອງກັບຕະຫຼາດນຳອີກ.

ທັງນີ້, ງານຕະຫຼາດນັດເພື່ອສົ່ງເສີມກະສິກຳ – ຫັດຖະກຳ ບຶງທາດຫຼວງ ຄັ້ງທີ 1 ຈະໄດ້ຈັດຂຶ້ນລະຫວ່າງວັນທີ 22 – 31 ທັນວາ 2020 ນີ້ ຂໍເຊີນຊວນບັນດາທ່ານໄປແວະທ່ຽວຊົມໄດ້ ທີ່ເຂດເສດຖະກິດສະເພາະບຶງທາດຫຼວງ ເມືອງໄຊເສດຖາ ນວ.