ສະພາປະຊາຊົນນະຄອນຫຼວງວຽງຈັນ ຈະໄຂກອງປະຊຸມ ໃນວັນທີ 28 ທັນວານີ້

200

ທ່ານ ສາລະພິດ ສູນວໍລະວົງ ຄະນະປະຈຳ, ເລຂາທິການສະພາປະຊາຊົນ ນະຄອນຫຼວງວຽງຈັນ ( ນວ ) ໄດ້ຖະແຫຼງຂ່າວຕໍ່ສື່ມວນຊົນ ໃນວັນທີ 23 ທັນວາ 2020 ທີ່ສໍານັກງານອົງການປົກຄອງ ນວ ກ່ຽວກັບການກະກຽມ ແລະ ດໍາເນີນກອງປະຊຸມສະໄໝສາມັນ ເທື່ອທີ 10 ຂອງສະພາປະຊາຊົນ ນະຄອນຫຼວງ ວຽງຈັນ ( ສປນວ ) ຊຸດທີ I ຈະຈັດຂຶ້ນໃນວັນທີ 28 ທັນວານີ້ ແລະ ຈະດຳເນີນໄປເປັນເວລາ 3 ວັນ.

ທ່ານ ສາລະພິດ ສູນວໍລະວົງ ກ່າວວ່າ: ເປັນກອງປະຊຸມທ້າຍສະໄໝຂອງ ສປນວ ຊຸດທີ I ເຊິ່ງມີຄວາມໝາຍສຳຄັນທາງດ້ານການເມືອງທີ່ຢັ້ງຢືນເຖິງຄວາມເປັນເອກະພາບ ແລະ ຄວາມເຊື່ອໝັ້ນຂອງປວງຊົນຊາວ ນວ ຕໍ່ການນຳພາຂອງພັກ – ລັດ, ທັງແມ່ນໝາກຜົນແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ, ມະຕິກອງປະຊຸມໃຫຍ່ ຄັ້ງທີ VI, ຄັ້ງທີ VII ຂອງອົງຄະນະພັກ ນວ, ກ່ຽວກັບການປະຕິບັດພາລະບົດບາດເປັນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນຊາວນະຄອນຫຼວງ ໃນການພິຈາລະນາ, ຮັບຮອງເອົາບັນຫາສຳຄັນພື້ນຖານຕ່າງໆຂອງ ນວ.

Image may contain: 1 person, sitting

ທັງນີ້, ກອງປະຊຸມຈະໄດ້ດຳເນີນຂຶ້ນໃນລະຫວ່າງວັນທີ   28 – 30 ທັນວາ 2020 ( ເປັນເວລາ 3 ວັນ ລັດຖະການ ) ທີ່ຫ້ອງປະຊຸມສໍານັກງານອົງການປົກຄອງ ນວ ເພື່ອພິຈາລະນາ ຮັບຟັງແລະ ຮັບຮອງເອົາບັນຫາສຳຄັນຕ່າງໆ.

ຕະຫຼອດໄລຍະກອງປະຊຸມຂໍເຊີນຊວນບັນດາອົງການຈັດຕັ້ງພັກ – ລັດ, ອົງການຈັດຕັ້ງສັງຄົມທຸກພາກສ່ວນ, ພະນັກງານ, ທະຫານ, ຕຳຫຼວດ, ຕະຫຼອດຮອດພໍ່ແມ່ປະຊາຊົນບັນດາເຜົ່າໃນທົ່ວປະເທດ ໂດຍສະເພາະຊາວ ນວ ຈົ່ງໃຫ້ການຕິດຕາມຂ່າວສານທາງໂທລະພາບ ( ຈະໄດ້ມີການຖ່າຍທອດສົດບາງວາລະຂອງການດຳເນີນກອງປະຊຸມ ໂດຍສະເພາະແມ່ນວາລະທີ່ມີການຊີ້ແຈງຕໍ່ບັນຫາທີ່ສັງຄົມໃຫ້ ຄວາມສົນໃຈ ), ວິທະຍຸກະຈາຍສຽງ, ສື່ສິ່ງພິມຕ່າງໆ ແລະ ສາມາດມີຄໍາເຫັນ ຫຼື ຄໍາສະເໜີ ຜ່ານທາງໂທລະສັບສາຍດ່ວນ ໝາຍເລກ 1156 ( ໝາຍເລກໂທລະສັບ 021 260 242 ).