ເປີດແລ້ວ! ທາງດ່ວນວຽງຈັນ-ວັງວຽງ ຄວາມຍາວ 109,11 ກິໂລ ມູນຄ່າ 1,30 ຕື້ໂດລາ

213

ພິທີເປີດນຳໃຊ້ເສັ້ນທາງດ່ວນ ນະຄອນຫລວງວຽງຈັນ-ວັງວຽງໄດ້ຈັດຂຶ້ນທີ່ດ່ານເກັບເງິນ ສີເກີດເມືອງນາຊາຍທອງ ນະຄອນຫລວງວຽງຈັນ ໃນຕອນເຊົ້າວັນທີ 20 ທັນວາ 2020

ໂດຍເປັນກຽດເຂົ້າຮ່ວມ ຂອງພະນະທ່ານ ບຸນຍັງວໍລະຈິດ ປະທານປະເທດ ແຫ່ງສປປລາວ,ມີທ່ານ ສອນໄຊສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະການລົງທຶນ, ທ່ານຈ້າຍ ຕົງ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງສປຈີນປະຈຳລາວ,ທ່ານ ຢວນເສິງຟາ ເລຂາພັກແຂວງແຂວງຢຸນນານ ສປຈີນ,ພ້ອມດ້ວຍແຂກຮັບເຊີນຈາກຝ່າຍລາວແລະຈີນເຂົ້າຮ່ວມ.

ເສັ້ນທາງດ່ວນ ແຕ່ນະຄອນຫລວງວຽງຈັນ ຫາເມືອງວັງວຽງແຂວງວຽງຈັນ ມີຄວາມຍາວທັງຫມົດ 109,11 ກິໂລແມັດ,ຕັດຜ່ານ 4ເມືອງຄື: ເມືອງນາຊາຍທອງ,ເມືອງໂພນໂຮງ,ເມືອງຫີນເຫີບ ແລະເມືອງວັງວຽງ. ການກໍ່ສ້າງເສັ້ນທາງ ແມ່ນມີຄວາມກ້ວາງ23ແມັດ, ປູດ້ວຍຢາງຂົ້ວ ຫນາ 12ຊັງຕີແມັດ,ປະກອບມີ 4 ຊ່ອງທາງຈໍລະຈອນ ກວ້າງ 3 ແມັດ, ການອອກແບບປະຕິບັດຕາມມາດຕະຖານ ເຕັກນິກທາງດ່ວນຂອງອາຊຽນເປັນພື້ນຖານ,

ປະສານສົມທົບກັບພື້ນຖານເຕັກນິກຂອງຈີນ ແລະສປປລາວ.ມີອຸມົງ 1 ແຫ່ງ ເບື້ອງທາງຂື້ນຍາວ 845 ແມັດ, ແລະເບື້ອງທາງລອງຍາວ 875 ແມັດ,ມີຂົວ 45ແຫ່ງ ຍາວທັງຫມົດ 2.408 ແມັດ,ອອກແບບ ຮັບຄວາມໄວສູງສຸດ 100ກິໂລແມັດຕໍ່ຊົ່ວໂມງ ໃນເຂດທົ່ງພຽງ, 80 ກິໂລແມັດຕໍ່ຊົ່ວໂມງ ໃນເຂດພູດອຍ. ຕອນທາງດັ່ງກ່າວປະກອບມີ ຈຸດເຊື່ອມຕໍ່ທັງຫມົດ 7ແຫ່ງ, ຈຸດເກັບເງິນ 8ແຫ່ງ,ມີຈຸດພັກລົດ 2 ຈຸດ, ສູນຄວບຄຸມ 2 ຈຸດແລະສູນສ້ອມແປງ 2 ແຫ່ງ.ລວມມູນຄ່າກໍ່ສ້າງທັງຫມົດ 1,30 ຕື້ໂດລາ.
Cr: Lao Natoinal Radio