ກຽມຈັດງານວາງສະແດງສິນຄ້າເຟີນີເຈີລາວ ຄັ້ງທີ 7

210

ສະມາຄົມເຟີນີເຈີລາວ    ( ສຟລ ) ກຽມຈັດງານວາງສະແດງເຟີນີເຈີໄມ້ລາວ ຄັ້ງທີ 7 ປະຈໍາປີ 2021 ຂຶ້ນ ໂດຍມີຜູ້ປະກອບການເຂົ້າຮ່ວມຫຼາຍກວ່າ 60 ຫົວໜ່ວຍ ຈາກ 1 ນະຄອນຫຼວງ ແລະ 9 ແຂວງ ຄາດຄະເນມູນຄ່າການຊື້ – ຂາຍພາຍໃນງານ 10 ຕື້ກີບ ແລະ ຜູ້ເຂົ້າທ່ຽວຊົມ 1 ແສນຄົນ.

ພິທີຖະແຫຼງຂ່າວ ຈັດງານວາງສະແດງເຟີນີເຈີໄມ້ລາວຄັ້ງທີ 7 ມີຂຶ້ນວັນທີ 18 ທັນວາ 2020 ທີ່ສະພາການຄ້າ ແລະ ອຸດສາຫະກໍາແຫ່ງຊາດລາວ ( ສຄອຊ ) ໂດຍການເຂົ້າຮ່ວມຂອງ ທ່ານ ກອງມາລາ ພົມມາໄລ ຮອງປະທານ ສຟລ, ພ້ອມດ້ວຍຄະນະບໍລິຫານງານ ສຟລ ເຂົ້າຮ່ວມ.

Image may contain: 5 people, people sitting

ທ່ານ ກອງມາລາ ພົມມາໄລ ກ່າວວ່າ: ອີງຕາມຂໍ້ຕົກລົງເລກທີ 1007/ອຄ ລົງວັນທີ 9 ພະຈິກ 2020 ເຫັນດີອະນຸມັດຈັດງານວາງສະແດງເຟີນີເຈີລາວ ຄັ້ງທີ 7 ຂຶ້ນ ໃນລະຫວ່າງວັນທີ 9 – 17 ມັງກອນ 2021 ທີ່ສູນການຄ້າລາວ – ໄອເຕັກ.

ທ່ານກ່າວວ່າ: ການຈັດງານດັ່ງກ່າວເພື່ອປະຕິບັດນະໂຍບາຍສົ່ງເສີມການຜະລິດເຄື່ອງເຟີນີເຈີໄມ້ລາວ ໃຫ້ຜູ້ຜະລິດສາມາດເຂົ້າເຖິງຕະຫຼາດ ແລະ ຈໍາໜ່າຍສິນຄ້າໄດ້ທັງພາຍໃນ ແລະ ຕ່າງປະເທດ, ພ້ອມທັງຜັນຂະຫຍາຍແຈ້ງການເລກທີ 15/ນຍ ໃຫ້ປາກົດຜົນເປັນຈິງ, ເພື່ອສົ່ງເສີມການປູກໄມ້ ແລະ ຫັນມາຊົມໃຊ້ຜະລິດຕະພັນພາຍໃນ.

No photo description available.

ງານດັ່ງກ່າວ ສຟລ ໄດ້ກະກຽມຫ້ອງວາງສະແດງທັງໝົດ 175 ຫ້ອງ, ມີຜູ້ປະກອບການ 66 ຫົວໜ່ວຍ, ຜູ້ປະກອບການບັນດາແຂວງເຂົ້າຮ່ວມ 9 ແຂວງ ລວມມີ 19 ຫົວໜ່ວຍ. ພິເສດ 25 ຫ້ອງສໍາລັບສິນຄ້າໂອດ໊ອບ ເຊິ່ງຄາດຄະເນມູນຄ່າຈໍລະຈອນຊື້ – ຂາຍສິນຄ້າໃນງານ ຈໍານວນ 10 ຕື້ກີບ ແລະ ຜູ້ເຂົ້າທ່ຽວຊົມ 1 ແສນເທື່ອຄົນ.

ສໍາລັບກິດຈະກໍາໃນງານ ນອກຈາກການວາງສະແດງສິນຄ້າເຟີນີເຈີໄມ້ລາວ ຍັງມີການສາທິດການຜະລິດສິນຄ້າ, ກິດຈະກໍາມອບລາງວັນໃຫ້ລູກຄ້າທີ່ໂຊກດີ, ສະແດງສິລະປະ ແລະ ແຂ່ງຂັນດົນຕີແບບເຕັມວົງ ເພື່ອສ້າງບັນຍາກາດໃຫ້ຜູ້ເຂົ້າທ່ຽວຊົມ.