ລາວສະກາຍເວ ຢາກໃຫ້ທຸກທ່ານໄດ້ບິນ

247

ບໍລິສັດ ລັດວິສາຫະກິດລາວເດີນອາກາດ ຫຼື ລາວສະກາຍເວ ໄດ້ຈັດງານພົບປະເພື່ອນໍາສະເໜີຜະລິດຕະພັນດ້ານການບໍລິການຂອງລາວສະກາຍເວ ໃຫ້ຜູ້ເຂົ້າຮ່ວມຮັບຮູ້ຂໍ້ມູນດ້ານການບໍລິການ.

ພິທີດັ່ງກ່າວຈັດຂຶ້ນວັນທີ 11 ທັນວາ 2020 ທີ່ບໍລິສັດລາວເດີນອາກາດ ເຂົ້າຮ່ວມຂອງ ທ່ານ ສົມບູນ ອິນທະປະຖາ ຫົວໜ້າຫ້ອງການກະຊວງການເງິນ, ຮອງປະທານສະພາບໍລິຫານ ບໍລິສັດ ລັດວິສາຫະກິດ ລາວເດີນອາກາດ ມີທ່ານຜູ້ອໍານວຍການບໍລິສັດ ຕາງໜ້າພາກລັດ ແລະ ທຸລະກິດເຂົ້າຮ່ວມ.

ທ່ານ ພັນເອກ ສີວຽງທອງ ກອນນິວົງ ອໍານວຍການ ບໍລິສັດລັດວິສາຫະກິດລາວເດີນອາກາດ ໄດ້ກ່າວວ່າ: ບໍລິສັດໄດ້ຮັບການສ້າງຕັ້ງຂຶ້ນປີ 2002 ຕາມຂໍ້ຕົກລົງເລກທີ 0147/ກງ ໃຫ້ບໍລິການເໝົາລໍາ ( Charter Flight ), ໂຄງການທໍາອິດແມ່ນການບິນຮັບໃຊ້ໂຄງການຊອກຫາສິ່ງເສດເຫຼືອຂອງທະຫານອາເມຣິກາ ທີ່ຫາຍສາບສູນໃນປາງສົງຄາມຢູ່ລາວ. ຫຼັງຈາກນັ້ນ, ໄດ້ເຊັນສັນຍາບິນຮັບໃຊ້ໂຄງການບໍ່ຄໍາເຊໂປນ ຂອງ ບໍລິສັດ ລ້ານຊ້າງມີເນີໂຣນສ໌ ໃນປີ 2003 ໃນການຂົນສົ່ງຜູ້ໂດຍສານ ແລະ ວັດຖຸມີຄ່າ; ປີ 2005 ແມ່ນບິນຮັບໃຊ້ໂຄງການບໍ່ຄໍາພູເບ້ຍມາຍນິງ ແລະ ໂຄງການໄຟຟ້ານໍ້າຕົກນໍ້າເທີນ 2; ປີ 2007 ລາວເດີນອາກາດໄດ້ບິນຮັບໃຊ້ສາຍການບິນ ຈາກນະຄອນຫຼວງວຽງຈັນ ໄປ 3 ແຂວງພາກເໜືອ ຄື: ຜົ້ງສາລີ, ຫົວພັນ ແລະ ໄຊຍະບູລີ; ປີ 2013 ກະຊວງປ້ອງກັນປະເທດໄດ້ມອບຍົນ MIA 60 ຈໍານວນ 2 ລໍາ ໃຫ້ລາວເດີນອາກາດ ບິນຮັບໃຊ້ສາຍການບິນ. ພາຍຫຼັງການກະກຽມຄວາມພ້ອມສໍາເລັດປີ 2014 ລາວເດີນອາກາດ ໄດ້ຂະຫຍາຍສາຍການບິນ ເພີ່ມ 4 ເສັ້ນບິນ ຈາກນະຄອນຫຼວງວຽງຈັນ ໄປຍັງແຂວງພາກເໜືອ ຄື: ແຂວງຫຼວງພະບາງ, ອຸດົມໄຊ, ຫຼວງນໍ້າທາ, ບໍ່ແກ້ວ; ປີ 2017 ໄດ້ເປີດເສັ້ນບິນເພີ່ມ 2 ເສັ້ນບິນ: ນະຄອນຫຼວງວຽງຈັນ – ຈໍາປາສັກ, ນະຄອນຫຼວງວຽງຈັນ – ຊຽງຂວາງ – ຫຼວງພະບາງ; ປີ 2019 ບໍລິສັດ ໄດ້ສໍາເລັດການຕັ້ງ 3 ບໍລິສັດລູກຂຶ້ນກັບ ຄື: ບໍລິສັດ ລັດວິສາຫະກິດ ໂຮງແຮມ ລາວສະກາຍເວ ວຽງຈັນ, ບໍລິສັດ ລັດວິສາຫະກິດ ໂຮງແຮມລາວສະກາຍເວ ຊຽງຂວາງ ແລະ ບໍລິສັດລັດວິສາຫະກິດທ່ອງທ່ຽວ ລາວສະກາຍ.

ທ່ານກ່າວວ່າ: ງານພົບປະພາຍໃຕ້ຫົວຂໍ້ “ ລາວສະກາຍເວ ຢາກໃຫ້ທຸກທ່ານ ໄດ້ບິນ ” Event 2020 “ Lao Skyway …POSSIBLE …YOU CAN FLY ” ເພື່ອເຊື່ອມໂຍງການບໍລິການໆບິນຂອງ ບໍລິສັດ Lao Skyway ກັບ ບໍລິສັດຂອງບັນດາທ່ານ, ກັບການຈັດຕັ້ງພາກລັດເພື່ອຄຸ້ມຄອງ, ສົ່ງເສີມທຸລະກິດຂົນສົ່ງທາງອາກາດໃຫ້ມີປະສິດທິພາບ, ມີປະສິດທິຜົນ ແລະ ສອດຄ່ອງກັບກົດໝາຍວ່າດ້ວຍວິສາຫະກິດ, ກົດໝາຍສົ່ງເສີມການລົງທຶນ, ກົດໝາຍການບິນພົນລະເຮືອນ ແລະ ກົດໝາຍທີ່ກ່ຽວຂ້ອງຂອງ ສປປ ລາວ ກໍານົດໄວ້ຢ່າງຖືກຕ້ອງ.

ໃນພິທີຜູ້ອໍານວຍການການຄ້າ ແລະ ຜູ້ອໍານວຍການ ບໍລິສັດ ທ່ອງທ່ຽວ ໄດ້ຂຶ້ນຜັດປ່ຽນກັນນໍາສະເໜີຜະລິດຕະພັນທີ່ໃຫ້ບໍລິການໃນໄລຍະຜ່ານມາ ແລະ ສັກກະຍະພາບໃນການຂະຫຍາຍການບໍລິການໃນຊຸມປີຕໍ່ໜ້າ ພ້ອມທັງມີການແລກປ່ຽນຂໍ້ມູນກັນລະຫວ່າງຜູ້ໃຫ້ບໍລິການ ແລະ ລູກຄ້າ.