ຮອງເຈົ້າເມືອງໄຊຍະບູລີ ລົງຕິດຕາມຜົນການສໍາຫຼວດສະຖິຕິກະສິກໍາທົ່ວປະເທດ

236

ໃນຕອນເຊົ້າຂອງວັນທີ 6 ທັນວາ 2020 ນີ້ ທ່ານ ສອນສະຫວັນ ຈັນທະວົງ ຄະນະປະຈໍາພັກເມືອງ ຮອງເຈົ້າເມືອງໄຊຍະບູລີ ພ້ອມດ້ວຍຄະນະໄດ້ລົງເຄື່ອນໄຫວຕິດຕາມຜົນຂອງການສໍາຫຼວດສະຖິຕິກະສິກໍາທົ່ວປະເທດ ຄັ້ງທີ III ປີ 2020 ຢູ່ບ້ານຫ້ວຍແກ້ງ ແລະ ບ້ານໂພນສີດາ ເມືອງໄຊຍະບູລີ.

ໃນການລົງຕິດຕາມຄັ້ງນີ້ ທ່ານ ຄໍາຊາຍ ຈັດທະກຸນ ຫົວໜ້າຈຸດເດີນສໍາຫຼວດ ເມືອງໄຊຍະບູລີ ແຂວງໄຊຍະບູລີ ໄດ້ກ່າວວ່າ: ເມືອງໄຊຍະບູລີ ແມ່ນເມືອງໜຶ່ງໃນບັນດາ 11 ເມືອງເປົ້າໝາຍ ການສໍາຫຼວດສະຖິຕິກະສິກໍາໃນຄັ້ງນີ້ເປັນເມືອງເທສະບານຂອງແຂວງ ມີເນື້ອທີ່ 3.010 ກິໂລຕາແມັດ ມີຄວາມໜາແໜ້ນຂອງພົນລະເມືອງແມ່ນ 26 ຄົນຕໍ່ກິໂລຕາແມັດ ເປັນທີ່ຕັ້ງຍຸດທະສາດສໍາຄັນດ້ານການເມືອງເສດຖະກິດ, ວັດທະນະທໍາ, ສັງຄົມ ແລະ ປ້ອງກັນຊາດ – ປ້ອງກັນ ຄວາມສະຫງົບ.

ທົ່ວເມືອງໄຊຍະບູລີ ມີ 78 ບ້ານ ມີ 1.391 ໜ່ວຍຜະລິດ, ໃນນັ້ນປະກອບມີ 6 ເຂດຈຸດສຸມພັດທະນາ ມີ 14 ບ້ານເທສະບານເມືອງ ປະກອບມີ 8 ເຜົ່າລາຍຮັບສະເລ່ຍຕໍ່ຄົນຂອງເມືອງໄຊຍະບູລີ ຜ່ານມາບັນລຸ 1.800 ໂດລາ ເທົ່າກັບ 14 ລ້ານກວ່າກີບ.

ນັບແຕ່ວັນທີ 6 ຕຸລາ – ວັນທີ 6 ພະຈິກ 2020 ເມືອງໄຊຍະບູລີ ໄດ້ສົ່ງນັກເດີນສໍາຫຼວດ ແລະ ນັກກວດກາ ເຂົ້າຮ່ວມຝຶກອົບຮົມຈໍານວນ 7 ທ່ານ ແລະ ໄດ້ແບ່ງອອກເປັນ 3 ທີມ ໃນການເດີນສໍາຫຼວດໃນຄັ້ງນີ້ ມີນັກກວດກາຂັ້ນເມືອງ 1 ທ່ານ ຮັບຜິດຊອບ 2 ທີມ ແລະ ນັກກວດກາຂັ້ນແຂວງ 1 ທ່ານ.

ການລົງສໍາຫຼວດສະຖິຕິກະສິກຳໃນຄັ້ງນີ້ ເມືອງໄຊຍະບູລີ ແມ່ນຂະແໜງການກະສິກໍາເປັນບ່ອນອີງໃນການລົງວາງແຜນຕ່າງໆ ການລົງສໍາຫຼວດແມ່ນມີຕົວແທນທັງໝົດ 22 ບ້ານ ມີ 347 ຄອບຄົວ.

ມາຮອດປັດຈຸບັນສາມາດ  ສະຫຼຸບໄດ້ ຄື: ບ້ານທີ່ໄດ້ລົງສໍາຫຼວດແລ້ວ ມີ 21 ບ້ານ ເທົ່າກັບ 95,5% ບ້ານທີ່ບໍ່ໄດ້ສໍາພາດ 1 ບ້ານ ເທົ່າກັບ 4,5%; ຈໍານວນຄອບຄົວທີ່ໄດ້ສໍາພາດແລ້ວ 331 ຄອບຄົວ ເທົ່າກັບ 95,4% ແລະ ຄອບຄົວທີ່ຍັງບໍ່ໄດ້ສໍາພາດ 16 ຄອບຄົວ ເທົ່າກັບ 4,6%.

ໃນໂອກາດທີ່ໄດ້ລົງຕິດຕາມວຽກໃນຄັ້ງນີ້ ທ່ານ ສອນສະຫວັນ ຈັນທະວົງ ຮອງເຈົ້າເມືອງໄຊຍະບູລີ ໄດ້ມີຄໍາເຫັນຕໍ່ນັກເດີນສໍາຫຼວດ.

ຈາກນັ້ນ, ທີມງານດັ່ງກ່າວກໍໄດ້ລົງກວດກາການສ້ອມແປງເສັ້ນທາງ ແລະ ວາງຕາຂ່າຍໄຟຟ້າລະຫວ່າງ ບ້ານໂຄກຟາກ ໄປຫາ ບ້ານໂພນສີດາ ແລະ ບ້ານນາຂອນແກ່ນ ຕື່ມອີກ.