ເຊີນເຂົ້າຮ່ວມງານຕະຫຼາດນັດການກຸສົນ 7 – 10 ທັນວານີ້

195

ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ນະຄອນຫຼວງວຽງຈັນ ຮ່ວມກັບ ບໍລິສັດ ກຣິດຕະພົງ ເອັນເຕີເທນເມັ້ນ ອີເວັ້ນ ແອນ ອໍກະໄນເຊີ້ ຈໍາກັດ ແລະ ສູນການຄ້າວຽງຈັນເຊັນເຕີ ຮ່ວມກັນຈັດງານຕະຫຼາດນັດການກຸສົນຂາຍເຄື່ອງຂອງສິລະປິນ, ນັກສະແດງ ເພື່ອສົມທົບທຶນຊ່ວຍເຫຼືອສ້າງໂຮງຮຽນ ແລະ ຫ້ອງສະໝຸດຢູ່ເຂດຫ່າງໄກ.

ພິທີເປີດຕະຫຼາດນັດດັ່ງກ່າວ ຈັດຂຶ້ນໃນວັນທີ 7 ທັນວາ 2020 ທີ່ສູນການຄ້າວຽງຈັນເຊັນເຕີ ໂດຍການເຂົ້າຮ່ວມຂອງ ທ່ານ ນາງ ອໍລະໄທ ສັນຕິຄົງຄາ ຜູ້ອໍານວຍການໃຫຍ່ ບໍລິສັດ ກຣິດຕະພົງ ກຣຸບ, ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ນະຄອນຫຼວງ ພ້ອມດ້ວຍແຂກຖືກເຊີນ, ບັນດາຊາຍແບບ – ນາງແບບ ແລະ ເຈົ້າຂອງຫ້ອງເສື້ອຕ່າງໆທີ່ນໍາມາວາງຂາຍ.

ໃນພິທີ ທ່ານ ນາງ ອໍລະໄທ ສັນຕິຄົງຄາ ກ່າວວ່າ: ກິດຈະກໍາທີ່ຈັດຂຶ້ນນີ້ເຮັດໃຫ້ເຫັນໄດ້ເຖິງຄວາມຕັ້ງໃຈ, ຄວາມສາມັກຄີຄວາມເອື້ອເຟື້ອເພື່ອແຜ່ຂອງກຸ່ມຄົນໃດໜຶ່ງໃນສັງຄົມ ທີ່ພ້ອມກັນສ້າງກໍາລັງໃຈຮ່ວມແຮງຮ່ວມໃຈກັນຊ່ວຍກັນສ້າງຝັນໃຫ້ບັນດານ້ອງໆທີ່ຢູ່ຫ່າງໄກ ໂດຍສະເພາະໂຄງການໃນຄັ້ງນີ້ ຈະໄດ້ແບ່ງປັນທຶນຈໍານວນໜຶ່ງ ພ້ອມດ້ວຍອຸປະກອນການຮຽນໄປຊ່ວຍສ້າງໂຮງຮຽນປະຖົມສວນສະ ຫວ່າງ ເມືອງປາກຊ່ອງ ແຂວງ ຈໍາປາສັກ ແລະ ຈະນໍາທຶນອີກຈໍານວນໜຶ່ງໄປຊ່ວຍສ້າງຫ້ອງສະໝຸດໂຮງຮຽນ ມສ ບ້ານໂດນ ເມືອງປາກງື່ມ ນະຄອນຫຼວງວຽງຈັນ.

ແນວໃດກໍຕາມ, ຂໍເຊີນຊວນອ້າຍເອື້ອຍນ້ອງ, ພໍ່ແມ່ຊາວຄ້າຂາຍ ແລະ ໝູ່ເພື່ອນພ້ອມດ້ວຍຜູ້ທີ່ໃຈບຸນທັງຫຼາຍ ຮ່ວມກັນເຂົ້າມາສົມທົບທຶນມອບນໍ້າໃຈຊ່ວຍເຫຼືອໂຄງການນີ້, ທັງນີ້ກໍເພື່ອປະກອບສ່ວນຊ່ວຍເຫຼືອສັງຄົມ ແລະ ເຮັດໃຫ້ນ້ອງໆທີ່ຢູ່ຫ່າງໄກໄດ້ມີໂອກາດທີ່ດີຈາກນໍ້າໃຈຂອງທຸກຄົນ.

ງານຕະຫຼາດນັດການກຸສົນດັ່ງກ່າວ ຈະດໍາເນີນໄປເປັນເວລາ 3 ວັນ ນັບແຕ່ວັນທີ 7 ຫາ 10 ທັນວານີ້ ພາຍໃນງານຈະມີບັນດາຮ້ານຂາຍເຄື່ອງນຸ່ງ, ເກີບ, ກະເປົາ ແລະ ສິນຄ້າອື່ນໆອີກຫຼວງຫຼາຍ ຫາກທ່ານໃດສົນໃຈກໍສາມາດເຂົ້າໄປທ່ຽວຊົມ ຫຼື ຮ່ວມສົມທົບທຶນຊ່ວຍເຫຼືອນ້ອງໆກັບໂຄງການນີ້ໄດ້.