ເຈົ້າໜ້າທີ່ແຂວງບໍ່ແກ້ວ ກັກໂຕຄົນມຽນມາ ພ້ອມຂອງກາງສານເສບຕິດ 7 ກວ່າໂຕນ

173

ໃນວັນທີ 04 ທັນວາ 2020 ຄະນະສະເພາະກິດ ກອງບັນຊາການທະ ຫານແຂວງ ບໍ່ແກ້ວ ໄດ້ຮັບແຫຼງຂ່າວວ່າ: ຈະມີກຸ່ມຄົນບໍ່ດີເຄື່ອນໄຫວລັກລອບຂົນສົ່ງສານເສບຕິດ ຢູ່ທີ່ຂອບເຂດຊາຍແດນລາວ-ມຽມມາ ດັ່ງນັ້ນ ທາງກອງບັນຊາການການທະຫານແຂວງບໍ່ແກ້ວ ຈຶ່ງອອກຄຳສັ່ງໃຫ້ບັນດາປ້ອມທະຫານຊາຍແດນອອກເຄື່ອນໄຫວລາດຕະເວນຕາມຂອບເຂດຮັບຜິດຊອບ

ເວລາປະມານ 23 ໂມງ 00 ນາທີ, ປ້ອມທະຫານຊາຍແດນ 121 ທີ່ຂື້ນກັບກອງບັນຊາການທະຫານແຂວງບໍ່ແກ້ວ ໄດ້ພົບເຫັນເຮືອບັນທຸກສິນຄ້າ ຈອດຢູ່ເຂດບ້ານ ປຸງເລະ ເມືອງເມິງ ແຂວງບໍ່ແກ້ວ ດັ່ງນັ້ນ ອ້າຍນ້ອງທະຫານ ຂອງພວກເຮົາຈື່ງໄດ້ສະແດງຕົວເຂົ້າກວດຄົ້ນ ແມ່ນໄດ້ພົບເຫັນສິ່ງທີ່ຜິດກົດໝາຍຄື: ແປ້ງຝຸ່ນສີຂາວ (ຄາເຟອິນ) ຈໍານວນ 290 ເປົາ ເທົ່າກັບ 7.250 ກິໂລກຼາມ, ເຮືອບັນທຸກສິນຄ້າ ຈຳນວນ 01 ລຳ

ພ້ອມທັງກັກຕົວຜູ້ຕ້ອງຫາໄດ້ຈໍານວນ 3 ຄົນ ຄື: ທ້າວ ນວນ ອາຍຸ 32 ປີ ອາຊີບ ເຮັດນາ, ທ້າວ ໜານມາ ອາຍຸ 35 ປີ, ອາຊີບ ເຮັດນາ, ທ້າວ ອິນ ອາຍຸ 65ປີ ອາຊີບ ຂັບເຮືອ ຜູ້ກ່ຽວທັງ 03 ແມ່ນສັນຊາດມຽນມາ, ຊົນເຜົ່າລື້, ຢູ່ບ້ານ ຊຽງລາບ ເມືອງ ຊຽງລາບ ແຂວງທ່າຂີ້ເຫຼັກ

ປັດຈຸບັນໄດ້ມອບຂອງກາງ ແລະ ຜູ້ຕ້ອງຫາ ໃຫ້ເຈົ້າໜ້າທີ່ ຕຳຫຼວດແຂວງບໍ່ແກ້ວ ດໍາເນີນການສືບສວນ-ສອບສວນຂະຫຍາຍຜົນຫາກຸ່ມແກ້ງ-ພັກພວກທີ່ຮ່ວມຂະ ບວນການຄ້າຂາຍໃນຄັ້ງນີ້ ມາດໍາເນີນຄະດີຕາມລະບຽບກົດໝາຍຕໍ່ໄປ

ໜັງສືພິມບໍ່ແກ້ວ