ເປີດສະຖາບັນການເງິນຈຸລະພາກ ບໍ່ຮັບຝາກເງິນສີເມືອງເງິນດ່ວນ ບໍລິການເງິນກູ້ແບບດ່ວນພິເສດ

449

ເປີດສໍານັກງານ ສີເມືອງເງິນດ່ວນ ເພີ່ມໂອກາດການເຂົ້າເຖິງແຫຼ່ງທຶນ, ບໍລິການສະໜອງເງິນກູ້ແບບດ່ວນພິເສດ ໃຫ້ແກ່ບັນດາຫົວໜ່ວຍທຸລະກິດ, ນິຕິບຸກຄົນ ແລະ ຊາວຄ້າຂາຍ

ໃນວັນທີ 2 ທັນວາ 2020 ທີ່ກຸ່ມບໍລິສັດ ສີເມືອງກຣຸບ, ນະຄອນຫຼວງວຽງຈັນ ໄດ້ມີພິທີເປີດສະຖາບັນການເງິນຈຸລະພາກ ທີ່ບໍ່ຮັບເງິນຝາກ ຊື່ວ່າ ສີເມືອງເງິນດ່ວນ SML ຂຶ້ນຢ່າງເປັນທາງການ ເຊິ່ງເປັນທຸລະກິດໃນເຄືອຂອງກຸ່ມບໍລິສັດ ສີເມືອງກຣຸບ ເປັນກ່ຽດເຂົ້າຮ່ວມໂດຍ ທ່ານ ສອນໄຊ ສິດພະໄຊ ຜູ້ວ່າການ ທະນາຄານແຫ່ງ ສປປ ລາວ, ມີ ທ່ານ ເອກະພັນ ພະພິທັກ ປະທານບໍລິສັດ ສີເມືອງກຣຸບ ພ້ອມດ້ວຍຜູ້ບໍລິຫານ ແລະ ພະນັກງານວິຊາການທີ່ກ່ຽວຂ້ອງ, ແຂກທີຖືກເຊີນເຂົ້າຮ່ວມ

ທ່ານ ເອກະພັນ ພະພິທັກ ໄດ້ກ່າວເຖິງພາບລວມຂອງສີເມືອງເງິນດ່ວນ ວ່າ: ແມ່ນສະຖາບັນການເງິນຈຸນລະພາກ ທີ່ບໍ່ຮັບເງິນຝາກ ຖືກສ້າງຕັ້ງຂຶ້ນດ້ວຍທຶນຈົດທະບຽນ 10 ຕື້ກີບ ໂດຍ ບໍລິສັດ ສີເມືອງກຣູບ ຈຳກັດຜູ້ດຽວ ຖືຮຸ້ນ 90% ແລະ ກຸ່ມບໍລິສັດ ສີເມືອງກຣູບ ຖືເປັນກຸ່ມບໍລິສັດ ທີ່ຢູ່ໃນອັນດັບແຖວໜ້າຂອງ ສປປ ລາວ ທີ່ປະສົບຜົນສຳເລັດໃນການເຮັດຫຼາຍໆທຸລະກິດ. ທ່ານໃຫ້ຮູ້ຕື່ມອີກວ່າ: ການເປິດສະຖາບັນການເງິນຈຸລະພາກນີ້ ພວກເຮົາໄດ້ເບິ່ງເຫັນໄດ້ໂອກາດທາງທຸລະກິດ ແລະ ຄວາມສຳຄັນຂອງສະຖາບັນການເງິນຈຸນລະພາກ ໃນການປະກອບສ່ວນສົ່ງເສີມການເຕີບໃຫຍ່ຂອງຈຸລະວິສາຫະກິດ ເພື່ອກາຍເປັນທຸລະກິດ SME ແລະ ທຸລະກິດຂະໝາດໃຫຍ່ ໃນອານາຄົດ ຈຶ່ງໄດ້ກ້າຕັດສິນໃຈລົງທຶນໃສ່ການສ້າງຕັ້ງ ສີເມືອງເງິນດ່ວນ ຂຶ້ນໂດຍມີເປົ້າໝາຍ ເພື່ອຕອບສະໜອງຄວາມຮຽກຮ້ອງຕ້ອງການທາງການເງິນໃຫ້ແກ່ສັງຄົມ ແລະ ແນໃສ່ເພື່ອປະກອບສ່ວນເຂົ້າໃນການສ້າງ ແລະ ພັດທະນາເສດຖະກິດ, ຊີວິດການເປັນຢູ່ຂອງສັງຄົມ ຜູ້ທີ່ບໍ່ມີໂອກາດເຂົ້າເຖິງແຫຼ່ງທຶນໃຫ້ໄດ້ຮັບໂອກາດເຂົ້າເຖິງແຫຼງທຶນງ່າຍຂຶ້ນ ຈະໃຫ້ບໍລິການສະໜອງເງິນກູ້ຢືມແບບດ່ວນພິເສດ ໃຫ້ແກ່ບັນດາຫົວໜ່ວຍທຸລະກິດ, ນິຕິບຸກຄົນ ແລະ ຊາວຄ້າຂາຍ ໃນຂອບເຂດນະຄອນຫລວງວຽງຈັນ. ຈາກນັ້ນ ກໍ່ຈະສືບຕໍ່ຂະຫຍາຍຕາໜ່າງການບໍລິການໄປສູ່ບັນດາແຂວງອ້ອມຂ້າງ ແລະ ທົ່ວປະເທດ ເຊິ່ງພວກເຮົາມີຜະລິດຕະພັນຄື: 1) ເງິນດ່ວນໄດ້ໃຈ, 2) ສິນເຊື່ອເຖົ້າແກ່ນ້ອຍ, 3) ຜະລິດຕະພັນຊື້ໜີ້

ໃນໂອກາດດັ່ງກ່າວ ທ່ານ ສອນໄຊ ສິດພະໄຊ ໄດ້ກໍ່ໄດ້ກ່າວຍ້ອງຍໍຊົມເຊີຍ ຕໍ່ຜົນງານຂອງບໍລິສັດສີເມືອງກຣຸບ ທີ່ໄດ້ມີຜົນງານດີເດັ່ນຫຼາຍດ້ານ ໃນການປະກອບສ່ວນສ້າງສາພັດທະນາປະເທດຊາດ ໄດ້ສ້າງວຽກເຮັດງານທໍາໃຫ້ແກ່ປະຊາຊົນລາວ ແລະ ຊ່ວຍເຫຼືອສັງຄົມຕະຫຼອດມາ, ມີການຂະຫຍາຍຕົວຢ່າງຕໍ່ເນື່ອງ ແລະ ໄດ້ສ້າງຕັ້ງສະຖາບັນການເງິນຈຸລະພາກ ທີ່ບໍ່ຮັບເງິນຝາກຄື ສີເມືອງເງິນດ່ວນ ເພື່ອເພີ່ມທາງເລືອກ ໃຫ້ແກ່ປະຊາຊົນ ໄດ້ເຂົ້າເຖິງການບໍລິການທາງດ້ານການເງິນ ເພື່ອໄປພັດທະນາເສດຖະກິດ, ຄອບຄົວໃຫ້ຫຼຸດພົ້ນຈາກຄວາມທຸກຍາກເທື່ອລະກ້າວ ແລະ ອວຍພອນໃຫ້ ທຸລະກິດຂອງ ສີເມືອງ ເງິນດ່ວນ ປະສົບຜົນສໍາເລັດ ແລະ ບັນລຸເປົ້າໝາຍທີ່ວາງໄວ້