ບໍ່ພົບຜູ້ຕິດເຊື້ອໂຄວິດ – 19 ເພີ່ມ ຈາກການເກັບຕົວຢ່າງມາກວດວິເຄາະ 769 ຄົນ

368

ສະພາບການລະບາດຂອງພະຍາດໂຄວິດ – 19 ມາຮອດວັນທີ 9 ພະຈິກ 2020 ສປປ ລາວ ແມ່ນບໍ່ພົບຜູ້ຕິດເຊື້ອພະຍາດໂຄວິດ – 19 ເພີ່ມ ຈາກການເກັບຕົວຢ່າງມາກວດທັງໝົດ 769 ຄົນ, ປັດຈຸບັນຍັງມີພຽງຄົນເຈັບນໍ້າເບີ 24 ທີ່ນອນປິ່ນປົວຢູ່ໂຮງໝໍ.

ທ່ານ ດຣ. ນາງ ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ຖະແຫຼງຂ່າວ ປະຈຳວັນທີ 10 ພະຈິກວ່າ: ມາຮອດວັນທີ 10 ພະຈິກ 2020, ທົ່ວໂລກມີການລາຍງານການລະບາດ ທັງໝົດ 216 ( ປະເທດ/ເຂດ ) ເຊິ່ງມີການຢັ້ງຢືນຜູ້ຕິດເຊື້ອພະຍາດໂຄວິດ – 19 ຈຳນວນ 51.209.890 ຄົນ; ເສຍຊີວິດ 1.268.404 ຄົນ. ໃນນີ້, ຢູ່ຂົງເຂດອາຊີ ແມ່ນປະເທດອິນເດຍ ທີ່ມີທ່າອ່ຽງໃນການຕິດເຊື້ອໂຄວິດ – 19 ເພີ່ມຂຶ້ນ ໂດຍມີຜູ້ຕິດເຊື້ອສະສົມ 8.591.075 ຄົນ ແລະ ຜູ້ຕິດເຊື້ອມື້ດຽວສູງເຖິງ 37.211 ຄົນ; ໃນບັນດາກຸ່ມປະເທດອາຊຽນ ມາຮອດວັນທີ 10 ພະຈິກ 2020 ມີການຢັ້ງຢືນຜູ້ຕິດເຊື້ອພະຍາດໂຄວິດ – 19 ແມ່ນ 1.005.762 ຄົນ ແລະ ເສຍຊີວິດ 24.193 ຄົນ.

ສໍາລັບການເຝົ້າລະວັງໂຄວິດ – 19 ຢູ່ ສປປ ລາວ ຮອດ 17:00 ໂມງ ຂອງວັນທີ 9 ພະຈິກ 2020 ທົ່ວປະເທດມີຜູ້ເດີນທາງເຂົ້າມາຜ່ານຈຸດຜ່ານແດນຕ່າງໆ ທັງໝົດ 2.110 ຄົນ; ໃນນັ້ນຈຸດຜ່ານດ່ານ ລາວ – ໄທ 972 ຄົນ, ຈຸດຜ່ານດ່ານ ລາວ – ຈີນ 60 ຄົນ, ຈຸດຜ່ານດ່ານ ລາວ – ຫວຽດນາມ 695 ຄົນ, ຈຸດຜ່ານດ່ານ ລາວ – ກຳປູເຈຍ ແລະ ດ່ານ ລາວ – ມຽນມາ ແມ່ນບໍ່ມີຜູ້ເດີນທາງເຂົ້າມາ; ຜ່ານສະໜາມບິນສາກົນວັດໄຕ ທັງໝົດ 383 ຄົນ. ທຸກຄົນແມ່ນໄດ້ແທກອຸນຫະພູມຮ່າງກາຍ, ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດ   ( ຍົກເວັ້ນຜູ້ຂັບລົດຂົນສົ່ງ ແລະ ຜູ້ຕິດຕາມ ) ແລ້ວຈຶ່ງນຳສົ່ງໄປຫາສະຖານທີ່ຈຳກັດບໍລິເວນທີ່ກຳນົດໄວ້ຈົນກວ່າຈະຄົບກຳນົດ 14 ວັນ.

ປັດຈຸບັນທົ່ວປະເທດມີສູນຈໍາກັດບໍລິເວນທີ່ຍັງເປີດຢູ່ທັງໝົດ 33 ສູນ, ມີຜູ້ຖືກຈຳກັດບໍລິເວນ 2.773 ຄົນ, ໄດ້ເກັບຕົວຢ່າງມາກວດວິເຄາະທັງໝົດ ແລະ ບໍ່ພົບຜູ້ຕິດເຊື້ອ.

ໃນວັນທີ 9 ພະຈິກ 2020 ໄດ້ເກັບຕົວຢ່າງມາກວດວິເຄາະທັງໝົດ 769 ຄົນ, ໃນນັ້ນຈາກບຸກຄົນທົ່ວໄປບໍ່ມີອາການ 167 ຕົວຢ່າງ, ແຮງງານລາວມາແຕ່ໄທ 236 ຕົວຢ່າງ, ແຮງງານຈີນ 256 ຕົວຢ່າງ, ແຮງງານຫວຽດນາມ 108 ຕົວຢ່າງ ແລະ ແຮງງານໄທ 2 ຕົວຢ່າງ; ຜົນກວດວິເຄາະທັງໝົດແມ່ນບໍ່ພົບເຊື້ອ.

ໝາຍຄວາມວ່າໃນວັນທີ 9 ພະຈິກ 2020 ບໍ່ມີຜູ້ຕິດເຊື້ອໃໝ່; ສັງລວມການກວດວິເຄາະແຕ່ເດືອນມັງກອນ ຮອດວັນທີ 9 ພະຈິກ 2020 ໄດ້ເກັບຕົວຢ່າງມາກວດທັງໝົດ 70.252 ຕົວຢ່າງ, ກວດພົບເຊື້ອສະສົມ 24 ຄົນ, ຜູ້ຕິດເຊື້ອກໍລະນີທີ 24 ແມ່ນຍັງສືບຕໍ່ປິ່ນປົວຢູ່ໂຮງໝໍມິດຕະພາບ.