ຮອງນາຍົກ ລົງຊີ້ນຳວຽກງານແກ້ໄຂໄພນ້ຳຖ້ວມທີ່ເມືອງຈຳພອນ

313

ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ – ການລົງທຶນ ທັງເປັນປະທານຄະນະຄຸ້ມຄອງໄພພິບັດຂັ້ນສູນກາງ ພ້ອມຄະນະ ໄດ້ເດີນທາງລົງຊີ້ນຳ ການແກ້ໄຂໄພພິບັດນ້ຳຖ້ວມທີ່ເມືອງຈຳພອນ ແຂວງສະຫວັນນະເຂດ ເມື່ອວັນທີ 5 ພະຈິກ 2020 ຜ່ານມາ ພ້ອມທັງມອບເຄື່ອງຊ່ວຍເຫຼືອຈຳເປັນໃຫ້ປະຊາຊົນ.

ຮ່ວມເດີນທາງໃນຄັ້ງນີ້ມີ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມພະແນກການກົມກອງທີ່ກ່ຽວຂ້ອງຂອງແຂວງ.

ທ່ານ ຄຳລຸຍ ຍາດຕິວົງ ເຈົ້າເມືອງຈຳພອນ ໄດ້ລາຍງານໃຫ້ຮູ້ວ່າ: ໃນລະຫວ່າງວັນທີ 13 – 26 ຕຸລາ 2020 ຢູ່ເມືອງຈຳພອນ ໄດ້ປະເຊີນກັບສະພາບພາຍຸຝົນຫຼາຍຄັ້ງຕິດຕໍ່ກັນ ເຮັດໃຫ້ນ້ຳເຊຈຳພອນບວກກັບນ້ຳຍູ້ຈາກແມ່ນ້ຳເຊບັ້ງຫຽງ ເຮັດໃຫ້ລະດັບນ້ຳເຊຈຳພອນເພີ່ມຂຶ້ນສູງສຸດ ວັດແທກໄດ້ 10,24 ແມັດ ເຊິ່ງເກີນເຂດອັນຕະລາຍກວ່າ 2 ແມັດ ເຮັດໃຫ້ນ້ຳຖ້ວມບ້ານ 18 ບ້ານ ມີຈຳນວນ 2.042 ຄອບຄົວ. ໃນນີ້, ໄດ້ຍົກຍ້າຍປະຊາຊົນ 1.212 ຄອບຄົວ ມີ 6.150 ຄົນ ແລະ ສັດລ້ຽງງົວ, ຄວາຍໄປຢູ່ບ່ອນສູງ ຈຸດພັກຊົ່ວຄາວ; ມີເນື້ອທີ່ນາປີຖືກຖ້ວມ 6.920 ເຮັກຕາ ກວມໃນ 60 ບ້ານ, ເນື້ອທີ່ຖ້ວມເສຍຫາຍ 4.694 ເຮັກຕາ; ເນື້ອທີ່ປູກພືດຖືກຖ້ວມ 123 ເຮັກຕາ, ເສຍຫາຍ 13 ເຮັກຕາ.

ນອກນັ້ນ, ຍັງມີລະບົບຊົນລະປະທານຖືກຖ້ວມ 23 ໂຄງການ, ມີອ່າງເກັບນ້ຳ 2 ແຫ່ງ, ຄອງຊົນລະປະທານ 10 ໂຄງການ, ປະຕູນ້ຳ 1 ແຫ່ງ, ໜອງປາຖືກຖ້ວມ 218 ໜອງ ແລະ ສັດລ້ຽງ ( ເປັດ, ໄກ່ ) ຈຳນວນໜຶ່ງຖືກເສຍຫາຍ, ມີເສັ້ນທາງຖືກຖ້ວມ 10 ເສັ້ນ ເຮັດໃຫ້ການສັນຈອນຖືກຕັດຂາດ 15 ບ້ານ, ຖ້ວມນໍ້າສ້າງ 306 ໜ່ວຍ, ວິດຖ່າຍ 1.758 ໜ່ວຍ, ສຸກສາລາ 1 ແຫ່ງ, ໂຮງຮຽນຖືກຖ້ວມ 7 ແຫ່ງ, ໂຮງຮຽນທີ່ປິດການຮຽນຍ້ອນນ້ຳຖ້ວມ ແລະ ເສັ້ນທາງຖືກຕັດຂາດ 16 ແຫ່ງ, ປະເມີນມູນຄ່າເສຍຫາຍເບື້ອງຕົ້ນ 58,5 ຕື້ກີບ ( ດ້ານກະສິກຳ 48 ຕື້ກີບ ແລະ ດ້ານໂຍທາ 10,5 ຕື້ກີບ ).

ພາຍຫຼັງນ້ຳຖ້ວມ ທາງເມືອງຂອງພວກເຮົາກໍໄດ້ມີການປຸກລະດົມທຸກພາກສ່ວນ, ນັກທຸລະກິດ, ຜູ້ປະກອບການ ແລະ ປະຊາຊົນໃນແຕ່ລະກຸ່ມບ້ານ ແລະ ບ້ານຕ່າງໆພາຍໃນເມືອງ ສ້າງຂະບວນການປະກອບສ່ວນສ້ອມແປງເສັ້ນທາງ ເພື່ອໃຫ້ທຽວໄປ – ມາສະດວກ, ສ້າງຂະບວນການອະນາໄມ ພາຍຫຼັງນໍ້າຫຼຸດລົງໃຫ້ຄືນສູ່ປົກກະຕິ.

ສ່ວນແຜນການໃນຕໍ່ໜ້າຈະເລັ່ງໃສ່ການຟື້ນຟູ – ສ້ອມແປງລະບົບຊົນລະປະທານໃຫ້ທັນຮັບໃຊ້ການຜະລິດນາແຊງ, ຈັດຫາແນວພັນເຂົ້າ – ພືດສະໜອງໃຫ້ປະຊາຊົນບ່ອນທີ່ຈຳເປັນຂາດເຂີນ, ສະໜອງຢາປ້ອງກັນ ແລະ ປິ່ນປົວພະຍາດຄົນ ແລະ ສັດ, ຟື້ນຟູ – ສ້ອມແປງຖະໜົນຫົນທາງທີ່ເປ່ເພ ໂດຍສະເພາະໃນບ້ານທີ່ຖືກຕັດຂາດ, ທ່ານເຈົ້າເມືອງ ກ່າວ.

ໂອກາດນີ້, ທ່ານ ສອນໄຊ ສີພັນດອນ ກໍໄດ້ກ່າວສະແດງ ຄວາມເຫັນອົກເຫັນໃຈຕໍ່ເຫດການໄພທຳມະຊາດໃນຄັ້ງນີ້ ແລະ ຂໍເປັນກຳລັງໃຈຊ່ວຍອຳນາດການປົກຄອງ ແລະ ພໍ່ແມ່ປະຊາຊົນຊາວເມືອງຈຳພອນ ກໍຄືຊາວແຂວງສະຫວັນນະເຂດ. ພ້ອມນີ້, ກໍມີຄວາມເຊື່ອໝັ້ນມູນເຊື້ອລູກຫຼານພໍ່ກະດວດ ແລະ ປະທານໄກສອນ ພົມວິຫານ ວ່າຈະສາມາດຜ່ານຜ່າວິກິດການໃນຄັ້ງນີ້ໄປດ້ວຍຜົນສຳເລັດ, ສະແດງຄວາມຍ້ອງຍໍຊົມເຊີຍອຳນາດການປົກຄອງແຂວງ – ເມືອງ ທີ່ສາມາດແກ້ໄຂສະຖານະການເບື້ອງຕົ້ນໄດ້ດີ ແລະ ປະຊາຊົນກໍມີຄວາມຕື່ນຕົວໃນການກຽມຮັບມືນ້ຳຖ້ວມແຕ່ຫົວທີ ສະແດງອອກເຖິງໄດ້ຮັບຜົນກະທົບໜ້ອຍຕໍ່ຊີວິດຂອງປະຊາຊົນທີ່ເປັນສິ່ງສຳຄັນທີ່ສຸດ.

ສຳລັບວຽກງານອັນເລັ່ງດ່ວນ ແມ່ນການຟື້ນຟູຫຼັງນ້ຳຖ້ວມ ແມ່ນການຊ່ວຍເຫຼືອຜູ້ທີ່ໄດ້ຮັບຜົນກະທົບຈາກນ້ຳຖ້ວມ ໂດຍໃຫ້ພາກສ່ວນຕ່າງໆທີ່ກ່ຽວຂ້ອງທັງຂັ້ນສູນກາງ ແລະ ທ້ອງຖິ່ນ ປະສານສົມທົບກັນ ເພື່ອປະເມີນ ແລະ ເກັບກຳຂໍ້ມູນລະອຽດ ເພື່ອຊ່ວຍເຫຼືອປະຊາຊົນຢ່າງຮີບດ່ວນ ໂດຍສະເພາະແມ່ນໃຫ້ສະໜອງເຂົ້າກິນ ຈຳນວນ 3 ເດືອນ ຕາມລະບຽບຜູ້ໜຶ່ງ 12 ກິໂລຕໍ່ຄົນຕໍ່ເດືອນ ໂດຍໃຫ້ຂຶ້ນແຜນ 3 ເດືອນກ່ອນ. ຈາກນັ້ນ, ກໍໃຫ້ເລັ່ງຟື້ນຟູເຮືອນຊານບ້ານຊ່ອງຂອງປະຊາຊົນ ໂດຍລະດົມກຳລັງແຮງຂອງແຕ່ລະພາກສ່ວນໃນສັງຄົມ ກໍຄືບັນດາອົງການຈັດຕັ້ງມະຫາຊົນເຂົ້າມາຊ່ວຍ, ສ່ວນເຮືອນປະຊາຊົນທີ່ຖືກເສຍຫາຍເປ່ເພ ກໍໃຫ້ທາງພະແນກແຮງງານ ແລະ ສະຫວັດດີການສັງຄົມແຂວງ ປະສານສົມທົບໃນການຊອກວັດສະດຸອຸປະກອນທີ່ຈຳເປັນສະໜອງໃຫ້ປະຊາຊົນ. ຈາກນັ້ນ, ກໍໃຫ້ເລັ່ງຟື້ນຟູສາທາລະນູປະໂພກຕ່າງໆ, ຖະໜົນຫົນທາງ ເພື່ອໃຫ້ກັບຄືນມາສູ່ສະພາບປົກກະຕິໂດຍໄວ ແລະ ໃຫ້ເອົາໃຈໃສ່ໃນວຽກງານປ້ອງກັນພະຍາດຄົນ – ສັດ ຫຼັງນ້ຳຖ້ວມ.

ພ້ອມນີ້, ທ່ານຮອງນາຍົກຍັງໄດ້ຊີ້ນຳວຽກງານອື່ນໆທີ່ສຳຄັນຕໍ່ການພັດທະນາເສດຖະກິດ – ສັງຄົມຂອງແຂວງ ແລະ ໃນໂອກາດນີ້, ທ່ານຍັງໄດ້ມອບເຄື່ອງຊ່ວຍເຫຼືອໃຫ້ການນຳເມືອງຈຳພອນ ເພື່ອນຳໄປແຈກຢາຍຊ່ວຍເຫຼືອຜູ້ໄດ້ຮັບຜົນກະທົບຈາກໄພນ້ຳຖ້ວມ ປະກອບມີ: ເຂົ້າສານ 12 ພັນກິໂລ, ນ້ຳດື່ມ 250 ແພັກ, ໝໍ້ຕົ້ມນ້ຳ 210 ໜ່ວຍ, ເຄື່ອງໃຊ້ໃນຄົວເຮືອນ 15 ຊຸດ, ຟີລາ 50 ຊຸດ, ເກືອ 1.100 ຖົງ ລວມມູນຄ່າ 207 ລ້ານກວ່າກີບ ພ້ອມດ້ວຍເງິນສົດ ຈຳນວນ 50 ລ້ານກີບ.

ວາລະດຽວກັນນີ້, ທ່ານເຈົ້າແຂວງສະຫວັນນະເຂດ ກໍໄດ້ສະເໜີມາຍັງທ່ານຮອງນາຍົກລັດຖະມົນຕີ ກ່ຽວກັບການສ້າງຄອງລັດ ເພື່ອລະບາຍນ້ຳຈາກເຊບັ້ງຫຽງ, ເຊຈຳພອນ, ເຊຊຳຊອຍ ເຊິ່ງຕາມການສຳຫຼວດແລ້ວເຫັນວ່າບັນດາເຊເຫຼົ່ານີ້ ມີລັກສະນະຄົດລ້ຽວຫຼາຍ ເມື່ອນ້ຳໄຫຼມາຫຼາຍ ເຮັດໃຫ້ນ້ຳໄຫຼບໍ່ທັນ ແລະ ເຂົ້າຖ້ວມບ້ານເຮືອນ ແລະ ເນື້ອທີ່ການຜະລິດ. ສະນັ້ນ, ຈຶ່ງຂໍສະເໜີໃຫ້ຂັ້ນເທິງພິຈາລະນາ ເພື່ອເອົາເຂົ້າແຜນການຂອງລັດຖະບານໃນຕໍ່ໜ້າ. ທັງນີ້, ກໍເພື່ອເປັນການແກ້ໄຂສະພາບການນ້ຳຖ້ວມ ແລະ ທັງເປັນການເກັບນ້ຳໄວ້ເຮັດການຜະລິດນຳອີກ.

ຫຼັງຈາກນັ້ນ, ທ່ານຮອງນາຍົກ ພ້ອມຄະນະນຳຂັ້ນຕ່າງໆກໍໄດ້ລົງຢ້ຽມຢາມ ແລະ ມອບເຄື່ອງຊ່ວຍເຫຼືອໃຫ້ພໍ່ແມ່ປະຊາຊົນທີ່ກຸ່ມບ້ານຕາແຫຼວ ເມືອງຈຳພອນຕື່ມອີກ.