ງານວາງສະແດງການທ່ອງທ່ຽວແບບຍືນຍົງອາຊຽນ ຈະມີຂຶ້ນ 5 – 7 ພະຈິກ

276

ງານວາງສະແດງແນວທາງການພັດທະນາການທ່ອງທ່ຽວແບບຍືນຍົງອາຊຽນ ຈະຈັດຂຶ້ນໃນລະຫວ່າງວັນທີ 5 – 7 ພະຈິກ 2020 ທີ່ໂຮງແຮມ ຄຣາວພລາຊາ ນະຄອນຫຼວງ ວຽງຈັນ ເພື່ອຊຸກຍູ້ສົ່ງເສີມການທ່ອງທ່ຽວ.

ພິທີຖະແຫຼງຂ່່າວການກະກຽມງານດັ່ງກ່າວ ມີຂຶ້ນໃນຕອນບ່າຍຂອງວັນທີ 4 ພະຈິກ 2020 ທີ່ໂຮງແຮມຄຣາວພລາຊາ ນະຄອນຫຼວງວຽງຈັນ ໂດຍມີ ທ່ານ ນາງ ພອນມະລີ ອິນທະພົມ ຮອງຫົວໜ້າກົມພັດທະນາການທ່ອງທ່ຽວ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ, ທ່ານ ນາງ Nguyen Phuong Thuy ຫົວໜ້າອົງປະກອບຂອງ GIZ, ທ່ານ ດາວວອນ ພະຈັນທະວົງ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ. ພ້ອມຕາງໜ້າຈາກພາກສ່ວນທີ່ກ່ຽວຂ້ອງ, ພາກທຸລະກິດເຂົ້າຮ່ວມ.

ທ່ານ ນາງ ພອນມະລີ ອິນທະພົມ ກ່າວວ່າ: ໃນໄລຍະຜ່ານມາຢູ່ ສປປ ລາວ ໄດ້ຈັດງານວາງສະແດງໃນລັກສະນະນີ້ມາແລ້ວ 2 ຄັ້ງ ເຊິ່ງເປັນງານພາຍໃນປະເທດ; ຄັ້ງທີ 1 ແມ່ນໄດ້ຈັດທີ່ແຂວງຫຼວງພະບາງ ໃນປີ 2018; ຄັ້ງທີ 2 ແມ່ນໄດ້ຈັດຂຶ້ນທີ່ນະຄອນຫຼວງວຽງຈັນ ໃນປີ 2019, ຍ້ອນເຫັນໄດ້ຜົນສໍາເລັດໃນການຈັດງານວາງສະແດງດັ່ງກ່າວໃນ 2 ປີທີ່ຜ່ານມາ, ປີນີ້ກະຊວງຖະແຫຼງຂ່າວ, ວັດ ທະນະທໍາ ແລະ ທ່ອງທ່ຽວ  ( ຖວທ ) ຈຶ່ງໄດ້ຍົກລະດັບງານດັ່ງກ່າວຂຶ້ນເປັນລະດັບອາຊຽນ ເຊິ່ງເປັນຄັ້ງທໍາອິດຂອງຂົງເຂດທ່ອງທ່ຽວໃນລະດັບພາກພື້ນທີ່ໄດ້ລິເລີ່ມຈັດງານດັ່ງກ່າວນີ້ຂຶ້ນມາ.

ການຈັດງານຄັ້ງນີ້ແມ່ນເພື່ອນໍາສະເໜີຜະລິດຕະພັນທີ່ເປັນມິດກັບສິ່ງແວດລ້ອມ ໃຫ້ບັນດາຫົວໜ່ວຍທຸລະກິດການທ່ອງທ່ຽວ ເປັນຕົ້ນແມ່ນທຸລະກິດສະຖານທີ່ພັກແຮມ, ສະຖານທີ່ທ່ອງທ່ຽວ, ບໍລິສັດທ່ອງທ່ຽວ, ທຸລະກິດຈໍາໜ່າຍເຄື່ອງຫັດຖະກໍາ ແລະ ກະສິກໍາ ແລະ ການນໍາໃຊ້ພະລັງງານທົດແທນທີ່ເປັນມິດກັບສິ່ງແວດລ້ອມ ເພື່ອປະກອບສ່ວນເຂົ້າໃນການປະຕິບັດເປົ້າໝາຍການພັດທະນາແບບຍືນຍົງ ຫຼື SDGs ຂອງ ສປປ ລາວ ໂດຍສະເພາະແມ່ນເປົ້າໝາຍທີ 12 ການຜະລິດ ແລະ ການບໍລິໂພກ ທີ່ມີຄວາມຮັບຜິດຊອບ.

ພ້ອມນັ້ນ, ກໍເພື່ອໂຄສະນາໃຫ້ອາຊຽນເປັນຈຸດໝາຍປາຍທາງການທ່ອງທ່ຽວທີ່ຍືນຍົງ, ທັງເປັນເວທີພົບປະແລກປ່ຽນທຸລະກິດຢູ່ບັນດາປະເທດສະມາຊິກອາຊຽນ ແລະ ບັນດາຜູ້ຊ່ຽວຊານຈາກພາກພື້ນໄດ້ແລກປ່ຽນຄວາມຮູ້ ແລະ ປະສົບການໃນການດຳເນີນທຸລະກິດໃຫ້ຍືນຍົງ.

ໃນງານດັ່ງກ່າວນີ້ ແມ່ນຈະມີງານວາງສະແດງ ແລະ ງານສໍາມະນາຜ່ານລະບົບອອນລາຍ ເຊິ່ງມີພາກສ່ວນທີ່ເຂົ້າຮ່ວມວາງສະແດງທາງໄກ ຈໍານວນທັງໝົດ 20 ພາກສ່ວນທີ່ມາຈາກ ສປປ ລາວ, ຫວຽດນາມ, ອິນໂດເນເຊຍ, ສິງກະໂປ, ມາເລເຊຍ, ໄທ, ອົສຕຣາລີ, ຝຣັ່ງ ແລະ ແອັດສະປາຍ.

ພ້ອມນີ້, ຍັງມີງານສະແດງ, ສໍາມະນາຫຼາຍຫົວຂໍ້ ແລະ ກິດຈະກໍາແຂ່ງຂັນປຸງແຕ່ງອາຫານລາວ ເຊິ່ງຈະຈັດຂຶ້ນທີ່ໂຮງແຮມຄຣາວພລາຊາ.