ສປປ ລາວ ບໍ່ພົບຜູ້ຕິດເຊື້ອໂຄວິດ – 19 ເພີ່ມ ສ່ວນການແຜ່ລະບາດທົ່ວໂລກຍັງໜ້າເປັນຫ່ວງ

331

ວັນທີ 2 ພະຈິກ 2020 ລາວເຮົາບໍ່ພົບຜູ້ຕິດເຊື້ອໂຄວິດ – 19 ເພີ່ມ. ແຕ່ສະພາບໃນໂລກແມ່ນຍັງໜ້າເປັນຫ່ວງ ຍອດຜູ້ຕິດເຊື້ອລາຍວັນຫຼາຍກວ່າ 4 ແສນຄົນ.

ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຖະແຫຼງຂ່າວປະຈຳວັນທີ 3 ພະຈິກ ວ່າ: ມາຮອດວັນທີ 3 ພະຈິກ 2020 ສະພາບການລະບາດຂອງພະຍາດໂຄວິດ – 19 ຂອງບັນດາປະເທດໃກ້ຄຽງ ແລະ ໃນໂລກ ມີການລາຍງານການລະບາດ ທັງໝົດ 215 ( ປະເທດ/ເຂດ ) ເຊິ່ງມີການຢັ້ງຢືນຜູ້ຕິດເຊື້ອ 47.275.898 ຄົນ, ເສຍຊີວິດ 1.210.311 ຄົນ ເຊິ່ງກວມເອົາ 2,56% ຂອງຜູ້ຕິດເຊື້ອທັງໝົດ; ປິ່ນປົວດີ 33.972.106 ຄົນ ເຊິ່ງກວມເອົາ 71,8% ຂອງຜູ້ຕິດເຊື້ອທັງໝົດ, ປະເທດທີ່ມີການລາຍງານການຕິດເຊື້ອ ແລະ ເສຍຊີວິດຫຼາຍກວ່າໝູ່ແມ່ນສະຫະລັດອາເມຣິກາ ເຊິ່ງມີຜູ້ຕິດເຊື້ອສະສົມ 9.549.432 ຄົນ ແລະ ເສຍຊີວິດສະສົມ 236.897 ຄົນ.

ຮອດ 17:00 ໂມງ ຂອງວັນທີ 2 ພະຈິກ 2020 ທົ່ວປະເທດມີຜູ້ເດີນທາງຈາກຈຸດຜ່ານແດນຕ່າງໆເຂົ້າມາ ທັງໝົດ 1.959 ຄົນ, ທຸກຄົນແມ່ນໄດ້ແທກອຸນຫະພູມຮ່າງກາຍ ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດ ( ຍົກເວັ້ນຜູ້ຂັບລົດຂົນສົ່ງ ແລະ ຜູ້ຕິດຕາມ ) ແລ້ວຈຶ່ງນຳສົ່ງໄປຫາສະຖານທີ່ຈຳກັດບໍລິເວນ ທີ່ກຳນົດໄວ້ຈົນກວ່າຈະຄົບກຳນົດ 14 ວັນ.

ປັດຈຸບັນສູນຈໍາກັດບໍລິເວນທີ່ຍັງເປີດຢູ່ 31 ສູນ, ມີຜູ້ຖືກຈຳກັດບໍລິເວນຢູ່ສູນ 2.741 ຄົນ, ໄດ້ເກັບຕົວຢ່າງມາກວດວິເຄາະທັງໝົດ ແລະ ບໍ່ພົບຜູ້ຕິດເຊື້ອ.

ໃນວັນທີ 2 ພະຈິກ 2020 ໄດ້ເກັບຕົວຢ່າງມາກວດວິເຄາະທັງໝົດ 578 ຄົນ, ຜົນກວດວິເຄາະທັງໝົດແມ່ນບໍ່ພົບເຊື້ອ. ໝາຍ ຄວາມວ່າໃນວັນທີ 2 ພະຈິກ 2020 ບໍ່ມີຜູ້ຕິດເຊື້ອໃໝ່.

ສັງລວມການກວດວິເຄາະແຕ່ເດືອນມັງກອນ ຮອດວັນທີ 2 ພະຈິກ 2020 ໄດ້ເກັບຕົວຢ່າງມາກວດທັງໝົດ 66.944 ຕົວຢ່າງ, ກວດພົບເຊື້ອສະສົມ 24 ຄົນ. ປັດຈຸບັນ, ຄົນເຈັບຕິດເຊື້ອພະຍາດໂຄວິດ – 19 ນ້ຳເບີ 24 ແມ່ນຍັງສືບຕໍ່ປິ່ນປົວຢູ່ໂຮງໝໍມິດຕະພາບ.