ສະພາແຫ່ງຊາດ ຮັບຮອງການແຕ່ງຕັ້ງສະມາຊິກລັດຖະບານ ຕາມການສະເໜີຂອງນາຍົກ

237

ໃນວາລະການດໍາເນີນກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VIII ຄັ້ງວັນທີ 30 ຕຸລາ 2020 ພາຍໃຕ້ການເປັນປະທານຂອງ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ສະມາຊິກສະພາແຫ່ງຊາດ ໄດ້ພ້ອມກັນພິຈາລະນາຮັບຮອງການແຕ່ງຕັ້ງບຸກຄະລາກອນຂອງລັດຖະບານບາງຕໍາແໜ່ງ ຕາມການສະເໜີຂອງນາຍົກລັດຖະມົນຕີ ແຫ່ງ ສປປ ລາວ.

ທ່່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ກ່າວວ່າ: ໃນວາລະທໍາອິດຂອງກອງປະຊຸມໃນມື້ນີ້    ( ວັນທີ 30 ຕຸລາ 2020 ) ກອງປະຊຸມພວກເຮົາຈະໄດ້ພິຈາລະນາຄໍາສະເໜີຂອງທ່ານນາຍົກລັດຖະມົນຕີ ກ່ຽວກັບການຍົກຍ້າຍ ແລະ ການແຕ່ງຕັ້ງບຸກຄະລາກອນຂອງລັດຖະບານ; ອີງຕາມກົດໝາຍ ວ່າດ້ວຍສະພາແຫ່ງຊາດ ສະບັບປັບປຸງ ປີ 2020 ໂດຍສະເພາະມາດຕາ 33 ຂໍ້ 2. 3. 2. 9 ກ່ຽວກັບການຍົກຍ້າຍສະມາຊິກລັດຖະບານແມ່ນສິດ ແລະ ໜ້າທີ່ຂອງຄະນະປະຈໍາສະພາແຫ່ງຊາດ.

ສະນັ້ນ, ໃນຕອນແລງວັນທີ 29 ຕຸລາ 2020 ກອງປະຊຸມຄະນະປະຈໍາສະພາແຫ່ງຊາດ ກໍໄດ້ມີການປຶກສາຫາລື ແລະ ເຫັນດີຕາມການສະເໜີຂອງທ່ານນາຍົກລັດຖະມົນຕີ ກ່ຽວກັບການຍົກຍ້າຍສະມາຊິກລັດຖະບານ ຈໍານວນ 2 ທ່ານ ເຊິ່ງມີລາຍລະອຽດດັ່ງນີ້: 1. ເຫັນດີຍົກຍ້າຍ ທ່ານ ລຽນ ທິແກ້ວ ລັດຖະມົນຕີກະຊວງກະສິກໍາ ແລະ ປ່າໄມ້ ໄປຮັບໜ້າທີ່ໃໝ່ເປັນລັດຖະມົນຕີປະຈໍາສໍານັກງານນາຍົກລັດຖະມົນຕີ; 2. ເຫັນດີຍົກຍ້າຍ ທ່ານ ເພັດ ພົມພິພັກ ລັດຖະມົນຕີ ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ໄປຮັບໜ້າທີ່ໃໝ່ເປັນລັດຖະມົນຕີກະຊວງກະສິກໍາ ແລະ ປ່າໄມ້.

ສໍາລັບການສະເໜີແຕ່ງຕັ້ງສະມາຊິກລັດຖະບານຕາມການສະເໜີຂອງນາຍົກລັດຖະມົນຕີ ແມ່ນຈະພິຈາລະນາ ແລະ ຮັບຮອງເອົາໃນວາລະມື້ນີ້ ( 30 ຕຸລາ 2020 ).

ຈາກນັ້ນ, ທ່ານ ນາງ ສວນສະຫວັນ ວິຍະເກດ ຄະນະປະຈຳສະພາແຫ່ງຊາດ, ເລຂາທິການສະພາແຫ່ງຊາດ ໄດ້ຂຶ້ນຜ່ານຄຳສະເໜີຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງທ່ານ ຄໍາເຈນ ວົງໂພສີ ຮອງຫົວໜ້າຄະນະໂຄສະນາອົບຮົມສູນກາງພັກ ໄປຮັບໜ້າທີ່ເປັນລັດຖະມົນຕີ ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ແລະ ສະເໜີແຕ່ງຕັ້ງ ທ່ານ ທອງຈັນ ມະນີໄຊ ຮອງລັດຖະມົນຕີກະຊວງພາຍໃນ ຂຶ້ນເປັນລັດຖະມົນຕີກະຊວງພາຍໃນ.

ພາຍຫຼັງການພິຈາລະນາຢ່າງຖີ່ຖ້ວນ ແລະ ກົງໄປກົງມາຕາມຊີວະປະຫວັດ, ຄຸນວຸດທິການສຶກສາ ແລະ ການເຄື່ອນໄຫວວຽກງານຕົວຈິງ, ສະມາຊິກສະພາແຫ່ງຊາດກໍໄດ້ລົງຄະແນນສຽງຮັບຮອງເອົາຢ່າງເປັນເອກະສັນ.